រាជធានីភ្នំពេញ ៖ ថ្ងៃទី១៩ មករា ឆ្នាំ២០១១ ទីភ្នាក់ងារសារព័ត៌មានកម្ពុជា AKP នៃក្រសួងព័ត៌មាន ប្រារព្ធពិធីសម្ពោធដាក់ឱ្យប្រើប្រាស់ជាផ្លូវការគេហទំព័រអ៊ីនធើរណែតថ្មី ដែលមានអាសយដ្ឋាន www.akp.gov.kh ក្រោមអធិបតីភាពលោកខៀវ កាញារីទ្ធ រដ្ឋមន្ត្រីក្រសួងព័ត៌មាន និងពិធីចុះហត្ថលេខាលើអនុស្សរណៈស្តីពីកិច្ចសហប្រតិបត្តិការវិស័យព័ត៌មានវិទ្យា និងសារគមនាគមន៍។
គេហទំព័ររបស់ទីភ្នាក់ងារសារព័ត៌មានកម្ពុជាផ្សាយជាភាសាខ្មែរ ភាសាអង់គ្លេស និងភាសាបារាំង បើកទូលាយជូនអ្នកអាននៅទូទាំងពិភពលោក ដោយមិនចាំបាច់ជាវ ឬចុះឈ្មោះ។ ក្រៅពីដំណឹងចុះផ្សាយជាលាយល័ក្ខអក្សរ ទីភ្នាក់ងារសារព័ត៌មានកម្ពុជាក៏ចុះផ្សាយជារូបថត ឬដំណឹងតាមរូបភាព បង្ហាញពីសកម្មភាពនានារបស់ ស្ថាប័ននីតិប្បញ្ញត្តិ ស្ថាប័ននីតិប្រតិបត្តិ ស្ថាប័នតុលាការ។ល។ នៅព្រះរាជាណាចក្រកម្ពុជា។ គេហទំព័រ AKP ក៏មានចុះផ្សាយព័ត៌មានអន្តរជាតិផងដែរ។
ទស្សនវិជ្ជាខាងវិស័យសារព័ត៌មានរបស់លោកខៀវ កាញារីទ្ធ គឺប្លែក លឿន និងទុកចិត្តបាន ហើយគ្រប់បណ្តាញផ្សព្វផ្សាយទាំងអស់ក្រោមការគ្រប់គ្រងរបស់ក្រសួងព័ត៌មាន ទូរទស្សន៍ វិទ្យុ និងសេវាផ្សព្វផ្សាយព័ត៌មានជាច្រើនទៀតកំពុងប្រតិបត្តិការបំពេញការងារដោយគោរពទៅតាមទស្សនៈនេះ។ សមិទ្ធផលខាងលើនេះមិនអាចកាត់ផ្តាច់ចេញពីការជួយឧបត្ថម្ភផ្នែកបច្ចេកទេសពីសំណាក់ក្រុមហ៊ុនមេគង្គណិត ដែលបាននិងកំពុងផ្តល់សេវាមួយចំនួនដូចជាមធ្យោបាយអ៊ីនធើរណែត ប្រព័ន្ធគ្រប់គ្រងទិន្នន័យ ទីតាំងរក្សាទុកទិន្នន័យ និងប្រព័ន្ធបញ្ជូនសារអេឡិចត្រូនិកជាដើម។
មេគង្គណិត (www.mekongnet.com.kh) គឺជាផ្នែកមួយនៃក្រុមហ៊ុនអង្គរដាតា ខមម្ញូនីខេសិន គ្រុប ជាក្រុមហ៊ុនផ្តល់សេវាអ៊ីនធើរណែត និងបច្ចេកវិទ្យាទំនើបតាមខ្សែកាប្លិ៍អុបទិក និងមុនគេនៅព្រះរាជាណាចក្រកម្ពុជា។ មេគង្គណិតក៏បានរួមចំណែកអភិវឌ្ឍខាងវិស័យព័ត៌មានវិទ្យាផងដែរ ដោយបានផ្តល់សេវាអ៊ីនធើរណែតមិនគិតប្រាក់ ជូនសាលារៀនសាធារណៈមួយចំនួននៅរាជធានីភ្នំពេញ៕
ចែករំលែកព័តមាននេះ