រាជធានីភ្នំពេញ ៖ អាជ្ញាធររាជធានីភ្នំពេញ បានសម្រេចឱ្យផ្សាររដ្ឋនិងផ្សារឯកជននានាចាប់ផ្ដើមធ្វើអាជីវកម្មនិងឱ្យអាជីវករចូលលក់ដូរក្នុងផ្សារឡើងវិញ ប៉ុន្តែគេមើលឃើញថាអាជីវកម្មរបស់អាជីវករមួយចំនួននៅតែមិនទាន់ល្អប្រសើរឬលក់ដូរដាច់ដូចមុនផ្ទះកូវីដ១៩ឡើយ ជាពិសេសទំនិញដែលមិនមែនជាតម្រូវការចាំបាច់ប្រចាំថ្ងៃ ។
យោងតាមប្រធានផ្សាររដ្ឋនានាក្នុងរាជធានីភ្នំពេញបានប្រាប់បណ្ដាញសារព័ត៌មានក្នុងស្រុកនានាថាចាប់តាំងពី សាលារាជធានីភ្នំពេញ បានប្រកាសឱ្យអាជីវករចូលលក់ដូរក្នុងផ្សារវិញ ឃើញថាអាជីវករក្នុងផ្សារក៏បានចូលលក់ដូរជាហូរហែនិងកាន់តែច្រើនឬស្ទើរតែ១០០ភាគរយវិញហើយ ។ ចំណែកអតិថិជនចូលទិញទំនិញ ក្នុងផ្សារក៏ឃើញថាចេញចូលហូរហែនិងតម្រូវឱ្យគោរពទៅតាមវិធានការរបស់ក្រសួងសុខាភិបាលក្នុងការទប់ស្កាត់កូវីដ១៩ផងដែរ ។
អាជីវករលក់សម្លៀកបំពាក់ក្នុងផ្សារធំថ្មីម្នាក់បានឡើងលើកថា ទោះបីជាផ្សារបានបើកវិញក៏ពិតមែន តែការលក់ដូរសម្លៀកបំពាក់នៅតែមិនសូវកាក់កបដូចមុននោះទេ ពីព្រោះទំនិញនេះ ជាទំនិញដែលមិនសូវមានតម្រូវការសម្រាប់ជីវភាពប្រចាំថ្ងៃ ។អ្នកទិញសម្លៀកបំពាក់យកទៅប្រើពេលមុនៗភាគច្រើន គេទិញសម្រាប់ចូលរួមកម្មវិធីម្ដងឬពីរដង តែនៅពេលកូវីដ១៩រាលដាលបែបនេះ កម្មវិធីនានាក៏ត្រូវបានផ្អាក ដូច្នេះពួកគេមិនដឹងថាទិញសម្លៀកបំពាក់យកទៅធ្វើអីដែរ អញ្ចឹងហើយទំនិញទាំងនេះ ក្លាយជាទំនិញមិនចាំបាច់នៅក្នុងពេលបច្ចុប្បន្ននេះ ។
អ្នកនាង ចាន់ ប៊ុនណាអាជីវករលក់សម្លៀកបំពាក់មួយរូបនៅក្នុងផ្សារធំថ្មីក្នុងរាជធានីភ្នំពេញបានឱ្យដឹងថា ជាការពិតណាស់ កាលពីមុនកូវីដ១៩ ការលក់ដូរសម្លៀកបំពាក់ហាក់ទទួលបានកាក់កបខ្លះដែរ ព្រោះកាលមុនផ្ទុះព្រឹត្តិការណ៍សហគមន៍ កម្មវិធីអាពាហ៍ពិពាហ៍ ខួបកំណើត និងជប់លៀងនានានៅតែមាន តែក្រោយពេលព្រឹត្តិការណ៍សហគមន៍ត្រូវផ្ទុះឡើង កម្មវិធីផ្សេងៗទៀតត្រូវបានបិទទាំងស្រុងដែលនាំឱ្យតម្រូវការប្រើប្រាស់លើសម្លៀកបំពាក់ក៏បានធ្លាក់ចុះហើយក៏មិនមានអ្នកទិញ សម្លៀកបំពាក់យកទៅប្រើប្រាស់ដែរ ។
អ្នកលក់ទូរសព្ទដៃនៅក្នុងផ្សារបុរីពិភពថ្មីកំបូលក៏បានឱ្យដឹផងដែរ ថ្វីតត្បិតតែផ្សារបានបើកដំណើរការវិញពិតមែន តែអាជីវកម្មមិនដូចពីមុនឡើយ ។ នៅពេលមានវិបត្តិបែបនេះ អតិថិជនមិនសូវដូរស៊េរីទូរសព្ទដូចមុនឡើយ ព្រោះចំណូលពួកគេធ្លាក់ចុះ សុខចិត្តប្រើប្រាស់របស់ចាស់ៗសិន ឬបើខូចត្រឹមយកមកជួសជុល ខុសពីមុនដែលមានបញ្ហាអ្វីពួកគេដូរស៊េរីថ្មី ។ ដោយឡែកងាកទៅមើលកន្លែងលក់ដូរចំណីអាហារ ត្រីសាច់ និងបន្លែវិញឃើញថានៅតែមមាញឹកដដែល គឺស្ថានភាពដូចនឹងមុនបិទផ្សារដែរ ដោយអាជីវករលក់ត្រីសាច់ បន្លែ នៅតែបន្តលក់ដាច់និងពេលខ្លះដាច់ខ្លាំងជាងមុនពេលបិទខ្ទប់ទៅទៀត ។
ស្ត្រីលក់បន្លែម្នាក់ក្នុងផ្សារពិភពថ្មី ក៏បាននិយាយដែរថា ការលក់ដូរគឺមិនខុសពីមុនពេលបិទផ្សារនោះទេ ។ ប៉ុន្តែ ដោយសារតែកាលបិទផ្សារអាជីវករបានផ្លាស់មកលក់ដូរចល័ត តាមរទេះ និងរ៉ឺម៉ក ទោះបីជាផ្សារបានបើកវិញក្ដី ក៏អាជីវករមួយចំនួនអត់ព្រមចូលលក់ដូរក្នុងផ្សារវិញដែរ គឺនៅបន្តលក់ដូរតាមផ្លូវតាមរទេះដដែល ព្រោះការលក់ដូរបែបនេះ ងាយស្រួលក្នុងការជួបអតិថិជន និងលក់ដាច់ជាងការលក់ក្នងផ្សារទៅទៀត ។
អាជីវករក្នុងផ្សារ បានសំណូមពរឱ្យអាជ្ញាធរកំបូល ពិនិត្យក្រុមអាជីវករដែលលក់ដូរនៅតាមផ្លូវគួរចូលកន្លែងលក់ដូរក្នុងផ្សារវិញ ព្រោះវាអាចធ្វើឱ្យផ្លូវសាធារណៈមានរបៀបរៀបរយឡើងវិញ និងការលក់ដូរមានភាពស្មើភាពគ្នាផងដែរ ៕
ចែករំលែកព័តមាននេះ