រាជធានីភ្នំពេញ ៖ យោងតាមលិខិតមួយច្បាប់ចុះហត្ថលេខាដោយលោករដ្ឋមន្ត្រីក្រសួងយុត្តិធម៌ លោកអង្គ វង្សវឌ្ឈនា ចុះថ្ងៃទី៣០ វិច្ឆិកា ២០១៥ នេះបានឱ្យដឹងថា ក្រសួងយុត្តិធម៌សម្រេចពន្យារពេលប្រឡងប្រជែង
រាជធានីភ្នំពេញ ៖ យោងតាមលិខិតមួយច្បាប់ចុះហត្ថលេខាដោយលោករដ្ឋមន្ត្រីក្រសួងយុត្តិធម៌ លោកអង្គ វង្សវឌ្ឈនា ចុះថ្ងៃទី៣០ វិច្ឆិកា ២០១៥ នេះបានឱ្យដឹងថា ក្រសួងយុត្តិធម៌សម្រេចពន្យារពេលប្រឡងប្រជែងជ្រើសរើសសិស្សចៅក្រមជំនាន់ទី៧ នៃរាជបណ្ឌិត្យសភាវិជ្ជាជីវៈតុលាការ ។
ការប្រកាសនេះធ្វើឡើង បន្ទាប់ពីអង្គភាពប្រឆាំងអំពើពុករលួយបដិសេធមិនចូលរួមសង្កេតការណ៍ដំណើរការប្រឡងប្រជែង ដោយហេតុថា រាជបណ្ឌិត្យសភាវិជ្ជាជីវៈតុលាការគ្មានឆន្ទៈ និងមិនមានការសហការល្អជាមួយអង្គភាពប្រឆាំងអំពើពុករលួយ។
ការប្រកាសសម្រេចពន្យារពេលប្រឡងរបស់ក្រសួងយុត្តិធម៌ពេលនេះ គឺយោងតាមស្មារតីនៃអង្គប្រជុំរបស់ក្រសួងយុត្តិធម៌ នៅថ្ងៃទី៣០ វិច្ឆិកា ២០១៥។
លិខិតនោះមានខ្លឹមសារថា ជម្រាបជូនលោក ឈន ព្រលឹង ប្រធានរាជបណ្ឌិត្យសភាវិជ្ជាជីវៈតុលាការ ក្រសួងយុត្តិធម៌សម្រេចលើកពេលបរិច្ឆេទនៃការប្រឡងប្រជែងជ្រើសរើសសិស្សចៅក្រមជំនាន់ទី៧នៃរាជបណ្ឌិត្យសភាវិជ្ជាជីវៈតុលាការ និងសម្រេចបញ្ជូនក្រុមការងាររបស់ក្រសួងយុត្តិធម៌ ដើម្បីធ្វើការពិនិត្យឡើងវិញនូវបែបបទ និងនីតិវិធីនៃការប្រឡងប្រជែង ក្នុងគោលបំណងធ្វើឱ្យកាន់តែមានតម្លាភាព និងភាពត្រឹមត្រូវយុត្តិធម៌។
ក្រុមសិស្សដែលធ្លាប់ប្រឡងនិយាយថា កន្លងទៅមានការលើកឡើងថា ការប្រឡងនេះបែងចែកជាពីរដំណាក់កាល គឺវិញ្ញាសាសរសេរ និងសួរផ្ទាល់មាត់។ ប៉ុន្តែជាទូទៅ វិញ្ញាសាសរសេរភាគច្រើនគឺប្រឡងជាប់។ ដោយឡែកដំណាក់កាលសួរផ្ទាល់មាត់វិញ គឺមិនងាយជាប់ឡើយបើមិនមានការសូកប៉ាន់អ្នកសម្ភាសន៍នោះទេ។
ប្រការនេះហើយទើបមានការសំណូមពរពីអ្នកចូលរួមប្រឡងឲ្យមានការចូលរួមសង្កេតការណ៍ពីសំណាក់មន្ត្រីអង្គភាពប្រឆាំងអំពើពុករលួយដើម្បីឲ្យដំណើរការនៃការប្រឡងប្រជែងជ្រើសរើសសិស្សចៅក្រមនេះប្រកបដោយសុក្រិត្យភាព និងតម្លាភាព តែគេមិនដឹងថា ការប្រឡងនឹងកំណត់យកថ្ងៃណានៅឡើយទេ៕
ចែករំលែកព័តមាននេះ