ខេត្តកំពង់ឆ្នាំង ៖ បើតាមលោកមេឃុំឆ្នុកទ្រូបានបញ្ជាក់ថា រយៈពេល៣ទៅ៤ខែនេះ ដោយសារជំងឺកូវីដ-១៩ឆ្លងចូលសហគមន៍ និងម្យ៉ាងក្នុងរដូវនេះ សម្បូរទៅដោយកំប្លោកអណ្តែតនៅពាសពេញទន្លេ ដែលមិនអាចធ្វើចរាចរណ៍បានស្រួល អាជ្ញាធរឃុំមិនសូវបានចុះពិនិត្យតាមដងទន្លេនោះទេ ដែលជាហេតុធ្វើឲ្យជនជាតិវៀតណាមបានលួចធ្វើដំបូល…
ខេត្តកំពង់ឆ្នាំង ៖ បើតាមលោកមេឃុំឆ្នុកទ្រូបានបញ្ជាក់ថា រយៈពេល៣ទៅ៤ខែនេះ ដោយសារជំងឺកូវីដ-១៩ឆ្លងចូលសហគមន៍ និងម្យ៉ាងក្នុងរដូវនេះ សម្បូរទៅដោយកំប្លោកអណ្តែតនៅពាសពេញទន្លេ ដែលមិនអាចធ្វើចរាចរណ៍បានស្រួល អាជ្ញាធរឃុំមិនសូវបានចុះពិនិត្យតាមដងទន្លេនោះទេ ដែលជាហេតុធ្វើឲ្យជនជាតិវៀតណាមបានលួចធ្វើដំបូល និងជញ្ជាំងបែចំនួន២៧ឡើងវិញ នៅក្នុងភូមិឆ្នុកទ្រូនេះ ។ ដូច្នេះ ពេលនេះក្រុមការងារចម្រុះរបស់ស្រុក បានចុះមកដឹកនាំឲ្យម្ចាស់បែដោយផ្ទាល់ ដើម្បីបង្ខំឲ្យរុះរើជញ្ជាំង និងដំបូលបែចិញ្ចឹមត្រីឱ្យអស់ឡើងវិញ ដោយមិនអនុញ្ញាតឲ្យបែចិញ្ចឹមត្រីមានជញ្ជាំង និងដំបូលតទៅទៀតនោះឡើយ ។
សូមបញ្ជាក់ថា ក្រុមការងារចម្រុះស្រុកបរិបូណ៌ កាលពីព្រឹកថ្ងៃ២៣ ខែមិថុនា ឆ្នាំ២០២១ បានចុះរុះរើជញ្ជាំង និងដំបូលបែចិញ្ចឹមត្រីរបស់ជនជាតិវៀតណាម នៅក្នុងភូមិឆ្នុកទ្រូ ឃុំឆ្នុកទ្រូ ស្រុកបរិបូណ៌ បន្ទាប់ពីពួកគេបានលួចធ្វើជញ្ជាំង និងដំបូលបែចិញ្ចឹមត្រីឡើងវិញ ក្រោយពីផែនការបន្លាស់ទីផ្ទះបណ្ដែតទឹក ត្រូវបានបញ្ចប់តាំងពីឆ្នាំ២០២០ ។
លោក ផល សុភាព អភិបាលរងស្រុកបរិបូណ៌ ដែលជាអ្នកដឹកនាំកម្លាំងក្រុមការងារចម្រុះ បន្តចុះប្រតិបត្តិការរុះរើដំបូលបែចិញ្ចឹមត្រីខាងលើ បាននិយាយឲ្យដឹងថា អនុវត្តតាមផែនការ៥ឆ្នាំ(ឆ្នាំ២០១៥ដល់ឆ្នាំ២០២០)របស់គណៈបញ្ជាការឯកភាពរដ្ឋបាលខេត្តកំពង់ឆ្នាំង ក្រុមការងារចម្រុះរបស់ស្រុកបរិបូណ៌ បានបន្តសហការគ្នាចុះដឹកនាំម្ចាស់បែត្រីផ្ទាល់រុះរើជញ្ជាំង និងដំបូលចេញ ដែលពួកគេបានលួចធ្វើដំបូល និងជញ្ជាំងឡើងវិញ កាលពីប៉ុន្មានខែថ្មីៗនេះ ។
លោកបានបញ្ជាក់ថា កាលពីថ្ងៃទី២២ ខែមិថុនា យើងបានរុះរើប្រមាណ៧០ភាគរយ ហើយនៅថ្ងៃទី២៣ ខែមិថុនា នេះ នឹងបន្តរុះរើឱ្យអស់តែម្ដង ។ ដោយឡែកលោក សាំង គឹមស៊ន មេឃុំឆ្នុកទ្រូក៏បានឲ្យដឹងដែរថា ឃុំឆ្នុកទ្រូមាន៣ភូមិ និងមានប្រជាពលរដ្ឋសរុបចំនួន២.១៦៩គ្រួសារ ក្នុងនោះក៏មានជនជាតិរៀតណាមចំនួន៧៨០គ្រួសារផងដែរ ។ ផ្ទះប្រជាពលរដ្ឋសរុបចំនួន១.១៥២ខ្នងផ្ទះ ភាគច្រើនជាផ្ទះបណ្ដែតលើទឹក ។ ជាមួយគ្នានេះ ក៏មានចិញ្ចឹមត្រីក្នុងបែជាង១០០បែផងដែរ ។
ចែករំលែកព័តមាននេះ