រាជធានីភ្នំពេញ ៖ តំណាងអយ្យការអមសាលាដំបូងរាជធានីភ្នំពេញ កាលពីរសៀលថ្ងៃទី២១ នឹងព្រឹកថ្ងៃទី២២ ខែមិថុនា ឆ្នាំ២០២១នេះ បានបើកការស៊ើបសួរលើសំណុំរឿងតារាតារាសម្តែងលោក អេដ វីន ពាក់ព័ន្ធករណីប្រើអំពើហិ.ង្សាលើប្រពន្ធ ។
តារាសម្តែងលោក អេដ វីន ត្រូវបានកម្លាំងសមត្ថកិច្ចកងរាជអាវុធហត្ថរាជធានីភ្នំពេញ ឃាត់ខ្លួន និងបញ្ជូនទៅតុលាការពាក់ព័ន្ធនឹងអំពើហិ.ង្សាក្នុងគ្រួសារ ។ ការឃាត់ខ្លួនតារាសម្តែងរូបនេះ បន្ទាប់ពីមានបណ្តាញសង្គមហ្វេសប៊ុកមួយដែលគេស្គាល់ថា ជាអាខោនរបស់ឈ្មោះ សុទ្ធ កញ្ចកា ដែលជាគូស្នេហ៍របស់លោកអេដវីន តែអ្នកខ្លះថា (ស្រីរបស់ អេដវីន) បានបង្ហោះនូវរូបភាពអំពើហិ.ង្សាមួយ វាយតប់នាង បណ្តាលឲ្យរងរបួសស្នាមសុះសាច់ និងខ្លឹមសារទាំងស្រុងដូចនេះ ៖
នៅថ្ងៃទី១៧ ខែមិថុនា ឆ្នាំ២០២១ អ្នកនាង សុទ្ធ កញ្ចកា បានសរសេរខ្លឹមសារទាំងស្រុងថា «ឈឺអត់ទេ អត់ឈឺទេប៉ុណ្ណឹង តែអ្វីដែលឈឺបំផុតគឺឈឺចិត្ត ឈឺបេះដូង ឈឺចាប់ស្ទើរស្លា.ប់ មនុស្សដែលខ្ញុំស្រឡាញ់បំផុតលើសជីវិត អ្វីក៏ហ៊ានលះបង់ដើម្បីនៅជិតគ្នា បែរជាហ៊ានលើកដៃវាយខ្ញុំដូចសត្វធាតុ» ។ ប៉ុន្មានថ្ងៃកើតហេតុភ្លាម ខ្ញុំពិតជាមិនចង់យករូបបែបនេះមកផុសទេ ព្រោះពេលខ្ញុំចង់សរសេរ តែសរសេរទៅមុខអត់រួចទេ ព្រោះបេះដូងខ្ញុំឈឺខ្លាំង ទឹកភ្នែកខ្ញុំហូរខ្លាំងទប់មិនជាប់ទេ ។
សាកបិទភ្នែកស្រមៃមើល ពេលដែលគេបិទទ្វារ មិនឲ្យអ្នកណាចូលមកជួយហើយ ដកខ្សែក្រវាត់ទំហំប៉ុន៣ម្រាមដៃ វាយក្បាលខ្ញុំប្រហែល១០ដង វាយយកៗមិនដកដៃ ។ ពេលនោះ ខ្ញុំឈឺពេកក៏យកដៃរងហើយគេមិនឈប់ទេ គេមកវាយខ្លួនខ្ញុំថែមគ្រប់កន្លែង រហូតខ្ញុំរត់ទៅកន្លៀតពួនលើកដៃសំពះគេ «បងអើយ ឈប់វាយទៅ អូនឈឺណាស់ អូនអត់ខុសជាមួយបងទេ ម៉េចបងមិនជឿអូន» តែគេមិនឈប់ដដែលគេវាយយកៗទៀត រហូតខ្ញុំគាំងស្ទះបេះដូង គេក៏ឈប់មួយភ្លែត ហើយគេមកបោចសក់ខ្ញុំទម្លាក់ពីលើជណ្តើរ ហើយក្បាលខ្ញុំបោកទៅនឹងជញ្ជាំងមួយទំហឹងខាងក្រោយ ហើយគេចាប់បោកខ្ញុំខ្ទប់លើកឥដ្ឋ ហើយខ្ញុំនៅតែយំសំពះអង្វរគាត់ «បងអើយឈប់ទៅ អូនឈឺណាស់» តែគេមិនស្ដាប់នៅតែដដែល វាយរហូត ខ្ញុំស្រងល់ ក្រោយមកគេក៏ចាប់អូសខ្ញុំឡើងម៉ូតូទៅផ្ទះខ្ញុំមួយទៀត ដែលកូនខ្ញុំនៅទីនោះ ។ សូមនិយាយប៉ុណ្ណឹងចាំអារម្មណ៍ស្ងប់បន្តិច ចាំពន្យល់សាច់រឿង ហេតុអ្វីទៅជាអញ្ចឹង ហើយពេលនេះខ្ញុំគ្រាំក្នុងក្បាល យប់ឡើងឈឺរហូតយំ គេងមិនលក់២ ថ្ងៃហើយ ។
ប្រភពព័ត៌មានឲ្យដឹងថា ក្រោយកើតមានអំពើហិ.ង្សានោះ ជនរងគ្រោះបានទៅដាក់ពាក្យបណ្តឹងនៅសមត្ថកិច្ច បន្ទាប់មកសមត្ថកិច្ចកងរាជអាវុធហត្ថរាជធានីភ្នំពេញ បានបើកការស៊ើបអង្កេត និងស្រាវជ្រាវ រហូតឈានដល់ការឃាត់ខ្លួនលោកអេដវីន ដែលជាតារាសិស្បៈសម្តែងរូបនេះ ។ ពេលឃាត់លោកអេនវីនរួចហើយ សមត្ថកិច្ចកងរាជអាវុធហត្ថក៏បានកសាងសំណុំរឿង រួចបញ្ជូនទៅសាលាដំបូងរាជធានីភ្នំពេញ តាមនីតិវិធីតែម្តង ។
ក្រុមអ្នកតាមប្រមាញ់ករណីខាងលើនេះ បានកត់សម្គាល់ឃើញថា នៅពេលសមត្ថកិច្ចកងរាជអាវុធហត្ថនាំខ្លួនលោកអេដវីន ទៅកាន់សាលាដំបូងរាជធានីភ្នំពេញនោះ ស្រាប់តែឃើញគូស្នេហ៍របស់លោកអេដវីដ ក៏បានទៅតាមសុំដកពាក្យបណ្តឹង ដើម្បីបើកផ្លូវឲ្យស្ថាប័នអយ្យការលើកលែងការចោទប្រកាន់ទៅលើលោកអេដ វីន ឲ្យមានសេរីភាពបានជួបជុំប្រពន្ធកូនវិញ ហើយបើទោះបីស្នាមជាំនៅដិតដាមជាប់ពេញខ្លួនយ៉ាងណាក្តី ក៏នាងមិនដាច់ចិត្តទេ បានទៅតាមយកបាយទឹកឲ្យលោកអេនវីនហូបចុកថែមទៀតផង ។
គួរឱ្យកត់សម្គាល់ឃើញទៀតថា នៅពេលកម្លាំងកងរាជអាវុហត្ថរាជធានីភ្នំពេញ បញ្ជូនតារាសម្តែងលោក អេដ វីន ទៅដល់តុលាការនោះ ក៏ឃើញមានសាច់ញាតិ និងក្រុមគ្រួសាររបស់ អេដ វីន ប្រមាណបួនដប់នាក់ ខ្លះកាន់អាវរងារ ខ្លះកាន់ឆ័ត្រទៅបាំង និងបានទៅឈរពាំងមុខកាមេរ៉ាអ្នកសារព័ត៌មានដែលតាមប្រមាញ់តារារូបនោះ ក្នុងចេតនាបិទបាំងមិនឲ្យឃើញមុខមាត់ឡើយ ខណៈពេលសមត្ថកិច្ចនាំចុះ និងនាំឡើងរថយន្តនៅមុខបរិវេណសាលាដំបូងម្តង ៗ ។
គួរបញ្ជាក់ទៀតថា តំណាងអយ្យការបើកការសាកសួរលើសំណុំរឿងនេះរហូតដល់ម៉ោង១១និង៣០ព្រឹក ថ្ងៃទី២២ ខែមិថុនា នៅមិនទាន់ចប់នៅឡើយទេ រួចបានផ្ញើតារាសម្តែងលោកអេដវីន ទៅឱ្យសមត្ថកិច្ចអាវុធហត្ថវិញ ដោយតម្រូវឲ្យថ្ងៃរសៀលនាំមកសួរបន្តទៀត ដើម្បីសម្រេចចោទ ឬមិនចោទប្រកាន់ តាមឆ័ន្ទានុសិទ្ធរបស់អយ្យការ ។
គួររំលឹកទៀតថា ៖ ស្រីប្រកែកប្រុសប្រកាន់! មុនផ្ទុះហិ.ង្សា អេដវីន ធ្លាប់ព្រមានគូស្នេហ៍រឿងមានសា.ហាយ តែខាងស្រីបកស្រាយផ្សេង ៕
ចែករំលែកព័តមាននេះ