ប្រទេសចិន ៖ យោងតាមក្រសួងសុខាភិបាលចិនថា មកដល់ថ្ងៃទី២០ ខែមិថុនា ឆ្នាំ២០២១ ចិនបានចាក់វ៉ាក់សាំងប្រឆាំងវីរុសកូវីដ-១៩ បានដល់សរុប ១,០១ពាន់លានដូសហើយ។ ទោះបីយ៉ាងនេះក្ដី ភាគរយនៃមនុស្សចាក់វ៉ាក់សាំងរួចគ្រាប់២ដូស ក្នុងប្រទេស មិនទាន់ត្រូវបានរាយការណ៍នៅឡើយ។
យោងតាមការរាប់របស់ AFP តាមរយៈប្រភពផ្លូវការនានាថា ចំនួនដូសនៃវ៉ាក់សាំង ដែលបានចាក់នោះតំណាងឲ្យជាង១ភាគ៣នៃចំនួនប្រជាជនសរុបលើពិភពលោក។ ពិភពលោកមកដល់ថ្ងៃទី១៨ ខែមិថុនា ការចាក់វ៉ាក់សាំងបានដល់ជាង២,៥ពាន់លានដូសហើយ។
ពលរដ្ឋចិនពីដំបូងហាក់មិនប្រញាប់ប្រញាល់សម្រុកចាក់វ៉ាក់សាំងឡើយ ព្រោះវីរុសត្រូវបានបំបាត់ស្ទើរតែទាំងស្រុងក្នុងប្រទេស ចាប់តាំងពីជាង១ឆ្នាំមកហើយ ដោយសារការធ្វើចត្តាឡីស័កជាកាតព្វកិច្ច ការធ្វើតេស្តក្នុងទ្រង់ទ្រាយធំ ឬអនុវត្តការត្រួតពិនិត្យលើបណ្ដាអ្នកធ្វើដំណើរ។ ប៉ុន្តែរដ្ឋាភិបាល និងបណ្ដាសហគ្រាសចិនបន្ទាប់មក បានប្រកាន់យកវិធានការដែលជម្រុញ យ៉ាងខ្លាំងដល់ប្រជាជននិងនិយោជិតឲ្យនាំគ្នាចាក់វ៉ាក់សាំង ដោយផ្ដោតលើសាមគ្គីជាតិនិងកាតព្វកិច្ចរបស់ពលរដ្ឋ។
ប្រទេសចិនរយៈពេលប៉ុន្មានសប្ដាហ៍ចុងក្រោយនេះ កត់សម្គាល់ឃើញមានអ្នកឆ្លងវីរុស ក្នុងស្រុកមួយចំនួនតូច ក្នុងខេត្តមានប្រជាជនច្រើនក្វាងទុង ដោយអាជ្ញាធរបានអំពាវនាវដល់ប្រជាជនឲ្យនាំគ្នាសម្រុកចាក់វ៉ាក់សាំង ប្រឈមមុខនឹងគ្រោះថ្នាក់នៃការឆ្លងរលកថ្មីទៀត។
តាមក្រសួងសុខាភិបាលចិនថា នាថៃ្ងទី២០ ខែមិថុនា នៅចិនដីគោករកឃើញអ្នកឆ្លងវីរុសថ្មី២៣នាក់ ២៤ម៉ោងចុងក្រោយនេះ។ ប៉ុន្តែអ្នកឆ្លងថ្មីទាំងនោះភាគច្រើនជាមនុស្សមកពីបរទេស ដែលមកដល់ត្រូវធ្វើចត្តាឡីស័ក។
ចិនបានប្រើវ៉ាក់សាំងប្រឆាំងកូវីដចំនួន៤ប្រភេទក្នុងប្រទេស ដែលសុទ្ធតែវ៉ាក់សាំងផលិតក្នុងស្រុក។ ចិនសង្ឃឹមថា អាចចាក់វ៉ាក់សាំងគ្រប់ដូសដល់ប្រជាជនខ្លួនយ៉ាងតិច៧០% រហូតដល់ដំណាច់ឆ្នាំនេះ ពោលដល់ប្រជាជនប្រមាណ១ពាន់លាននាក់៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ