ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា មណ្ឌលធ្វើចត្តាឡីស័ក (កងវ៉ា) ដែលដាក់ពលករខ្មែរត្រឡប់មកពីប្រទេសថៃប្រមាណជាង៦០០នាក់នោះ ត្រូវបានរកឃើញអ្នកវិជ្ជមានកូវីដ១៩ មានចំនួន៥២នាក់ នៅថ្ងៃទី១៧ ខែមិថុនា ឆ្នាំ២០២១ ស្ថិតភូមិកងវ៉ា សង្កាត់កមពង់ស្វាយ ក្រុងសិរីសោភ័ណ។
ក្រោយពីរកឃើញអ្នកវិជ្ជមានកូវីដ១៩ នៅក្នុងមណ្ឌលធ្វើចត្តាឡីស័ក (កងវ៉ា) នោះ ក៏ឃើញមានវត្តមានឯកឧត្តម អ៊ុ រាត្រី អភិបាលខេត្តបន្ទាយមានជ័យ បានដឹកនាំមន្ត្រីជំនាញនាំយករថយន្តសង្គ្រោះមកដឹកអ្នកវិជ្ជមានកូវីដ១៩ យកទៅធ្វើការព្យាបាលផងដែរ ។ ខណៈនៅព្រឹកថ្ងៃទី១៧ ខែមិថុនា មានចំនួន៧នាក់ ត្រូវបានដឹកដាក់មណ្ឌលព្យាបាលសកលវិទ្យាល័យមានជ័យ និងរកឃើញនៅល្ងាចថ្ងៃទី១៧ ខែមិថុនានេះ មានចំនួន៤៥នាក់ ត្រូវបានដឹកជញ្ជូនទៅព្យាបាលនៅមណ្ឌលក្រិនដាយម៉ិនស៊ីធីក្រុងប៉ោយប៉ែត។
បើតាមមន្ត្រីប្រចាំការក្នុងមណ្ឌលចត្តាឡីស័ក (កូវ៉ា) បានអោយដឹងថា នៅក្នុងមណ្ឌលចត្តាឡីស័ក (កងវ៉ា) ក្រុងសិរីសោភ័ណនេះ មានពលករខ្មែរដែលត្រឡប់មកពីប្រទេសថៃកំពុងធ្វើចត្តាឡីស័កមានប្រមាណជាង៦០០នាក់។ ហើយជាក់ស្តែងនៅថ្ងៃទី១៧ ខែមិថុនា នេះ ក៏មានពលករខ្មែរដែលនឹងត្រូវបញ្ចប់ការធ្វើចត្តាឡីស័ករយៈពេល១៤ថ្ងៃ ខ្លះចំនួន១៣ថ្ងៃ ត្រូវបានរកឃើញវិជ្ជមានកូវីដ១៩ ចំនួន៥២នាក់ ហើយកាលពីថ្ងៃទី១៦ ខែមិថុនានោះ ក៏បានរកឃើញអ្នកវិជ្ជមានកូវីដ១៩ មានចំនួន១៣នាក់ផងដែរ។
រដ្ឋបាលសាលាខេត្តបន្ទាយមានជ័យ បានប្រកាសព័ត៌មាននៅថ្ងៃទី១៧ ខែមិថុនា ឆ្នាំ២០២១នេះថា រយៈពេល១ថ្ងៃ រកឃើញអ្នកវិជ្ជមានកូវីដ១៩ មានចំនួន៥២នាក់ ហើយមានអ្នកជាសះស្បើយពីជំងឺឆ្លងកូវីដ១៩ ចំនួន៦៣នាក់។
គួរបញ្ជាក់ថា ស្របពេលនោះ ឯកឧត្តម អ៊ុ រាត្រី អភិបាលខេត្តបន្ទាយមានជ័យ ក៏សម្រេចនឹងយកទីតាំងមណ្ឌលចត្តាឡីស័ក (កងវ៉ា) ក្រុងសិរីសោភ័ណ ធ្វើជាមណ្ឌលព្យាបាលអ្នកឆ្លងវិជ្ជមានកូវីដ១៩ ដោយយកទីតាំងវិទ្យាល័យសម្តេចឪ ក្រុងសិរីសោភ័ណ ដាក់ជាមណ្ឌលធ្វើចត្តាឡីស័កសម្រាប់ពលករខ្មែរដែលត្រឡប់ពីប្រទេសថៃវិញ៕
ចែករំលែកព័តមាននេះ