មេដឹកនាំត្រូវស្មោះត្រង់ជានិច្ច
ពាក្យថា អាជ្ជវៈ(អាច ជៈ វៈ)ប្រែថា សេចក្ដីទៀងត្រង់ មិនវៀចវេរ មិនក្រឡិចក្រឡុច ។ មេដឹកនាំត្រូវស្មោះត្រង់ចំពោះឧត្ដមគតិរួមមុខងារ តួនាទីរបស់ខ្លួន…
ពាក្យថា អាជ្ជវៈ(អាច ជៈ វៈ)ប្រែថា សេចក្ដីទៀងត្រង់ មិនវៀចវេរ មិនក្រឡិចក្រឡុច ។ មេដឹកនាំត្រូវស្មោះត្រង់ចំពោះឧត្ដមគតិរួមមុខងារ តួនាទីរបស់ខ្លួន…
ពាក្យថា អាជ្ជវៈ(អាច ជៈ វៈ)ប្រែថា សេចក្ដីទៀងត្រង់ មិនវៀចវេរ មិនក្រឡិចក្រឡុច ។ មេដឹកនាំត្រូវស្មោះត្រង់ចំពោះឧត្ដមគតិរួមមុខងារ តួនាទីរបស់ខ្លួន ត្រង់ចំពោះក្រុមការងារ ត្រង់ចំពោះប្រទេសជាតិ និងប្រជាពលរដ្ឋ ត្រង់ទាំងការគិត ការនិយាយ និងការអនុវត្ដការងារ ត្រង់ចំពោះអ្នកក្រោមបង្គាប់ និងត្រង់ចំពោះសេចក្ដីល្អទាំងឡាយ ។ ភាពស្មោះត្រង់ ជាផ្លូវដ៏ល្អមួយ ញ៉ាំងឲ្យមានការជឿជាក់ពីអ្នកជុំវិញខ្លួន ។
ជំនឿជាក់ពីអ្នកផងទាំងពួង នឹងធ្វើឲ្យមានការរួបរួមសាមគ្គីគ្នាជុំវិញខ្លួនដែលជាអ្នកដឹកនាំ ហើយអាចជួយធ្វើឲ្យការដឹកនាំដើរទៅរកជោគជ័យបានឆាប់រហ័ស ។ ក៏ប៉ុន្ដែ នៅពេលដែលមានការរួបរួមជុំវិញខ្លួនហើយ មេដឹកនាំមិនត្រូវភ្លេចខ្លួនភ្លើតភ្លើន មើលងាយអ្នកផងជុំវិញឡើយ ។ កាន់តែមានការរួបរួមជុំវិញខ្លួនខ្លាំងឡើងកាលណា កាន់តែផ្ដល់សារៈសំខាន់ដល់សហការីជុំវិញខ្លួនកាន់តែឱនលំទោន ប្រកបដោយសេចក្ដីថ្លៃថ្នូរខ្ពស់ឡើងជានិច្ច ។
មិនគួរនិយាយពីអ្នកក្រោមឱវាទថាអាក្រក់យ៉ាងនេះ មិនល្អយ៉ាងនោះឡើយ ។ ត្រូវរិះរកវិធីកែខៃដោយភាពស្មោះត្រង់ ដើម្បីធ្វើឲ្យមានការរីកចម្រើនទាំងអស់គ្នា ដើរទៅជាមួយគ្នាឆ្ពោះទៅរកភាពជោគជ័យ ។
ត្រូវចាំថា អង្គការនយោបាយដឹកនាំ ប្រៀបបីដូចជាក្រុមតូរ្យតន្ដ្រីមួយដែរ ។ ត្រូវមានភាពប៉ិនប្រសប់ក្នុងការងាររៀងខ្លួន ដូចគ្នាស្មើៗគ្នា ។ បើស្គរលេងល្អ តែហ្គីតាលេងអន់ ក៏មិនកន្ដ្រាក់ ទាក់អារម្មណ៍អ្នកមើលអ្នកស្ដាប់ ។ បើស្គរ ហ្គីតា លេងល្អ តែបើអ្នកច្រៀង ច្រៀងមិនពីរោះ គ្មានការទាក់ទាញ នៅរឹងស្ដូក ក៏មិនអាចទាក់អារម្មណ៍អ្នកក្រោមឆាកឲ្យហក់លោតឡើងរាំបាន ។ ពោលគឺទាំងអស់គ្នាជាក្រុមការងារ ដែលស្មោះត្រង់នឹងគ្នា មានការទទួលខុសត្រូវតាមមុខងាររៀងៗខ្លួន ដោយស្មោះស្មគ្រ័ គ្មានល្បិចប៉ែងជើង ប៉ែងដៃគ្នាឡើយ ។
យ៉ាងណាមិញ ក្នុងភាពជាអង្គការនយោបាយមួយ ត្រូវតែកសាងឲ្យទៅជាក្រុមការងារល្អរលូនបំផុត ទើបអាចជំរុញឲ្យប្រជាពលរដ្ឋទាំងអស់ ភ្ញាក់រលឹកជឿជាក់បាន ។ ម្នាក់ៗមានភាពស្មោះត្រង់ចំពោះភារៈរបស់ខ្លួនជាអ្នកដឹកនាំ មិនថាថ្នាក់ណា នៅទីណា កន្លែងណា មិនចាំបាច់ដេកចាំឲ្យមានអ្នកដាស់តឿន ឬធ្វើដើម្បីផ្គាប់មុខមាត់ឡើយ ។ ម្នាក់ៗត្រូវគិតថា ចេះអ្វីមួយដែលអ្នកឯទៀតមិនចេះ តែអ្នកឯទៀត ក៏ចេះអ្វីមួយដែលយើងមិនចេះ ។
ហេតុនេះ ដើម្បីសម្រេចជោគជ័យ អ្នកដឹកនាំមានភារៈពូត ប្រមូលផ្ដុំ សមត្ថភាព និងការប្រឹងប្រែងរបស់អ្នកជុំវិញខ្លួន ដើរឆ្ពោះទៅរកគោលដៅរួម ដោយភាពស្មោះត្រង់ និងពុះពារ ព្យាយាម ប្ដូរផ្ដាច់ យ៉ាងអត់ធ្មត់បំផុត ដោយការនាំមុខគេជានិច្ច ក្នុងការពុះពារឧបសគ្គផ្សេងៗ ទើបជោគជ័យ ។
ចូរពិចារណាចងចាំ និងយល់យ៉ាងជាក់ថា ខ្សែហ្គីតាមួយ មានសំឡេងតែមួយប៉ុណ្ណោះ ខ្សែទាំង៥មានសំឡេងខុសៗគ្នា តែដោយភាពប៉ិនប្រសប់របស់អ្នកលេងហ្គីតា ចេះរួមផ្សំសំឡេងខ្សែទាំងនោះបញ្ចូលគ្នាធ្វើឱ្យអ្នកលេងអាចលេងភ្លេងបានយ៉ាងពីរោះរណ្ដំ នាំអារម្មណ៍អ្នកស្ដាប់ អ្នកទស្សនាឲ្យលង់លក់ទៅតាមចំណង់របស់គេបាន ។ តើអ្នកណាមួយអាចទាយថា អ្នកលេងដែលប្រើប្រាស់ហ្គីតានេះ នឹងលេងបានត្រឹមតែប៉ុន្មានបទ ប្រាកដជាគ្មានចម្លើយទេ ។ យ៉ាងណាមិញ ជាអ្នកដឹកនាំដែលស្រឡាញ់ជាតិពិតក៏ត្រូវរៀនសូត្រពីនេះដែរ ទើបអាចកសាងក្រុមការងារល្អរលូនបាន ។
ក្រៅពីនេះ ការរួមសុខ រួមទុក្ខជាកត្ដាសំខាន់ខ្លាំងណាស់ ។ ជាមេដឹកនាំ ត្រូវរស់នៅរួមសុខរួមទុក្ខជាមួយគ្នា មិនរត់មិនដោះយករួចខ្លួនក្នុងគ្រាអាសន្ន មិនដេកស្រួល ស៊ីឆ្ងាញ់ យកសុខតែម្នាក់ឯង ឬប្រើហើយមិនទទួលខុសត្រូវ ឬមួយក៏បោកប្រាស់ប្រើ នោះមិនមែនជាការល្អដល់មេដឹកនាំសោះឡើយ ។
ដូចរៀបរាប់មកខាងលើមកហើយ គឺអ្នកដឹកនាំត្រូវតែស្មោះត្រង់គ្រប់ឥរិយាបថទាំអស់ តាំងពីការគិត ការនិយាយ ការធ្វើ ការរស់នៅដោយភាពប្ដូរផ្ដាច់ចំពោះជាតិមាតុភូមិ ប្រជាពលរដ្ឋ និងអង្គការនយោបាយរបស់ខ្លួន ដែលខ្លួនមានតួនាទីដឹកនាំ ដើម្បីជំរុញការតស៊ូឆ្ពោះទៅរកជោគជ័យផ្ដាច់ព្រ័ត្រដោយគ្មានការវៀចវេរ ។ ដាក់ខ្លួនឲ្យទាប ដើម្បីមើលឲ្យបានដល់ជម្រៅបញ្ហា តែក្រោកឈរឲ្យខ្ពស់ ដើម្បីមើលឲ្យបានឆ្ងាយ ដោយភាពភ្លឺស្វាងនៃអនាគត នេះគឺភាពជាមេដឹកនាំ ៕ សាន សារិន
ចែករំលែកព័តមាននេះ