ប្រទេសមីយ៉ាន់ម៉ា ៖ ប្រជាជនថ្លែងទៅកាន់ទីភ្នាក់ងារព័ត៌មានបារាំង AFP កាលពីថ្ងៃទី១៦ ខែមិថុនា ឆ្នាំ២០២១ ថា ភូមិមួយនាភាគកណ្ដាលមីយ៉ាន់ម៉ារងការបំផ្លាញស្ទើរទាំងស្រុង ដោយសារអណ្ដាតភ្លើង ក្រោយអន្តរាគមន៍របស់កងយោធា ចំណែកកងទ័ពបានទម្លាក់ការទទួលខុសត្រូវ ចំពោះការដុតនោះលើពួកភេរវករ ។
ប្រទេសមីយ៉ាន់ម៉ា ធ្លាក់ក្នុងភាពច្របូកច្របល់ចាប់តាំងពីរដ្ឋប្រហារយោធា ថ្ងៃទី១ កុម្ភៈមក ព្រមទាំងការបង្ក្រាបដោយហិង្សា ដោយកងទ័ព ប្រឆាំងពួកបាតុករ ដែលទាមទារឲ្យមានការវិលត្រឡប់ទៅរកលទ្ធិប្រជាធិបតេយ្យវិញ ។ ការប៉ះទង្គិចគ្នាកើតមាននៅតាមកន្លែងជាច្រើនរបស់មីយ៉ាន់ម៉ា ដែលនៅទីនោះបណ្ដាជនស៊ីវិលបានបង្កើតកងកម្លាំងស្វ័យការពារដើម្បីប្រឆាំងនឹងរបបយោធា ។
កាលពីថ្ងៃទី១៥ មិថុនា កងទ័ពបានលុកចូលក្នុងភូមិគីនម៉ាក្នុងតំបន់ MAGWAY ភាគកណ្ដាលប្រទេស តាមរកបណ្ដាសមាជិកកងកម្លាំងស្វ័យការពារមូលដ្ឋាន ។ ប្រជាជនភូមិនោះរៀបរាប់ថា ពេលមនុស្សម្នានាំគ្នារត់ ពួកទាហានបានបាញ់លើភូមិដោយគ្រាប់រ៉ុក្កែត ហើយបន្ទាប់មកយើងឃើញភ្លើងឆាបឆេះផ្ទះទាំងឡាយក្នុងភូមិ ។ ក្នុងភូមិនោះមានផ្ទះប្រមាណជា២៥០ខ្នង ហើយពេលនេះត្រូវភ្លើងឆេះអស់សល់ជាង២០ខ្នងប៉ុណ្ណោះ ។
បណ្ដារូបភាពផ្សាយតាមសារព័ត៌មានក្នុងស្រុក បង្ហាញផ្សែងខ្មៅហុយទៅលើអាកាស និងបណ្ដាផ្ទះដែលត្រូវភ្លើងឆេះអស់ ។ សារព័ត៌មានទាំងនោះក៏រាយការណ៍ដែរពីប្ដីប្រពន្ធវ័យចំណាស់មួយគូស្លា.ប់ក្នុងអណ្ដាតភ្លើង ។
យោងតាមអាជ្ញាធរថាភ្លើងបានចាប់ឆាបឆេះ ក្រោយពួកភេរវករប្រដាប់អាវុធ៤០នាក់ ដើរដុតផ្ទះដែលបែបនេះ ទើបកងទ័ពដាក់ពង្រាយនៅទីនោះ ។ ដោយខ្យល់បោកបក់ខ្លាំងភ្លើងបានឆេះឆ្លងពីផ្ទះមួយទៅផ្ទះមួយទៀត ហើយផ្ទះប្រមាណជា៧០%ក្នុងភូមិនោះត្រូវភ្លើងឆេះអស់ ។
តាមសមាគមជួយដល់បណ្ដាអ្នកទោសនយោបាយមីយ៉ាន់ម៉ាថា ការតវ៉ាដែលបង្ក្រាបដោយបង្ហូរឈាមពីសំណាក់កងកម្លាំងសន្តិសុខ រយៈពេលប៉ុន្មានខែចុងក្រោយនេះបណ្ដាលឲ្យជនស៊ីវិលស្លា.ប់ជាង៨៦០នាក់ ៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ