- ភ្នំពេញ
ភ្នំពេញ៖ ក្នុងរយៈពេលប៉ុន្មានអាទិត្យចុងក្រោយនេះ កំណើនអ្នកទេសចរក្នុងស្រុក ដែលស្ទើរតែទាំងអស់ ជាជនជាតិខ្មែរយើង ពិសេសអ្នកនៅភ្នំពេញ បានចេញដើរលេងកម្សាន្ត ឆ្លងខេត្តយ៉ាងច្រើនឡើងៗ។ ប៉ុន្តែក្នុងពេលអ្នកទេសចរ ចេញទៅលេងតាមរមណីយដ្ឋាននានា…
ភ្នំពេញ៖ ក្នុងរយៈពេលប៉ុន្មានអាទិត្យចុងក្រោយនេះ កំណើនអ្នកទេសចរក្នុងស្រុក ដែលស្ទើរតែទាំងអស់ ជាជនជាតិខ្មែរយើង ពិសេសអ្នកនៅភ្នំពេញ បានចេញដើរលេងកម្សាន្ត ឆ្លងខេត្តយ៉ាងច្រើនឡើងៗ។ ប៉ុន្តែក្នុងពេលអ្នកទេសចរ ចេញទៅលេងតាមរមណីយដ្ឋាននានា…
ភ្នំពេញ៖ ក្នុងរយៈពេលប៉ុន្មានអាទិត្យចុងក្រោយនេះ កំណើនអ្នកទេសចរក្នុងស្រុក ដែលស្ទើរតែទាំងអស់ ជាជនជាតិខ្មែរយើង ពិសេសអ្នកនៅភ្នំពេញ បានចេញដើរលេងកម្សាន្ត ឆ្លងខេត្តយ៉ាងច្រើនឡើងៗ។ ប៉ុន្តែក្នុងពេលអ្នកទេសចរ ចេញទៅលេងតាមរមណីយដ្ឋាននានា នៅតាមបណ្តាខេត្ត ក៏នាំឲ្យកកស្ទះចរាចរណ៍យ៉ាងខ្លាំង នៅតំបន់រមណីយដ្ឋានមួយចំនួន ដែលអាចបង្កហានិភ័យនៃការឆ្លងរាលដាលជំងឺកូវីដ១៩។ ម្យ៉ាងបញ្ហាសំរាម នៅតំបន់ទេសចរណ៍ព្រៃភ្នំ កន្លែងដើរលេងទាំងនោះ ក៏បន្តក្លាយជាប្រធានបទដដែល ក្នុងសង្គមកម្ពុជាយើង។
របាយការណ៍ក្រសួងទេសចរណ៍ បង្ហាញថា នៅថ្ងៃសៅរ៍-អាទិត្យ ទី១២-១៣មិថុនា មានអ្នកទេសចរក្នុងស្រុក ដើរលេងតាមរមណីយដ្ឋាននានា ទូទាំង ២៥រាជធានីខេត្ត សរុបជាង ៧ម៉ឺននាក់។ ក្នុងនោះ ភ្នំពេញ ច្រើនជាងគេ មានចំនួន ១៤៣៧៨នាក់ ហើយខេត្តកំពង់ស្ពឺ មានអ្នកទេសចរ ទៅលេង ១០៥០០នាក់ ស្ថិតនៅលំដាប់ទី២ បន្ទាប់ពីភ្នំពេញ។
នៅឧទ្យាជាតិគិរីរម្យ ក្នុងខេត្តកំពង់ស្ពឺ កាលពីថ្ងៃសៅរ៍ និងថ្ងៃអាទិត្យ មានអ្នកទៅលេង ធ្វើដំណើរតាមឡាន និងម៉ូតូ រហូតដល់បង្កការកកស្ទះយ៉ាងខ្លាំង ចាប់តាំងពីផ្លូវជាតិលេខ៤ រហូតដល់ផ្លូវឡើងលើភ្នំ។ កំណើនអ្នកទេសចរ បណ្តាលឲ្យកកស្ទះនេះ ក៏ដោយសារតែត្រូវតម្រង់ជួរ បង់លុយផង និងវាស់កម្តៅ នៅច្រកចូលផង។
កំណើនអ្នកទេសចររហូតដល់កកស្ទះដូច្នេះ នាំឲ្យគេបារម្ភពីហានិភ័យនៃការឆ្លងរាលដាលជំងឺកូវីដ១៩ ក្នុងពេលដែលកម្ពុជាយើងសព្វថ្ងៃ មិនទាន់ស្ងប់ស្ងាត់នូវការឆ្លងរាតត្បាតជំងឺដ៏កាចសាហាវនេះ នៅឡើយទេ។ លើសពីនេះទៀត អ្នកទៅលេងតំបន់ព្រៃភ្នំ នៅគិរីរម្យច្រើន ក៏បានបន្សល់ទុកនូវសំរាមជាច្រើនដែរ។
ក្នុងអំឡុងពេលនេះ ប្រជាពលរដ្ឋយើង ពិសេសអ្នកនៅភ្នំពេញ គួរតែបន្តគិតគូរពីបញ្ហាសុខភាព និងសុវត្ថិភាព ជាជាងការដើរលេងសប្បាយ ក្នុងដំណាក់កាលកូវីដ-១៩។ ការធ្វើដំណើរឡើងភ្នំគិរីរម្យ រហូតដល់កកស្ទះម៉ូតូឡានដូច្នេះ អាចបង្កហានិភ័យនៃការឆ្លងរាលដាលជំងឺកូវីដ១៩ ដោយសារតែមិនមានរក្សាគម្លាតសុវត្ថិភាព ឲ្យបានយ៉ាងហោចណាស់ ១ម៉ែត្រកន្លះពីម្នាក់ទៅម្នាក់ បើទោះបីជាគ្រប់គ្នា បានពាក់ម៉ាសក៏ដោយ។
ចំពោះបញ្ហាសំរាម តាមតំបន់រមណីយដ្ឋានទេសចរណ៍ បានកើតឡើងច្រើនរួចមកហើយ និងជាយូរឆ្នាំមកហើយដែរ។ អ្នកទេសចរយើងមួយចំនួនធំ បានទុកដាក់សំរាមកាកសំណល់ចំណីអាហារបានត្រឹមត្រូវ។ ប៉ុន្តែអ្នកខ្លះទៀត ស៊ីផឹកកន្លែងណា ចោលសំរាមនៅកន្លែងនោះ។ អ្នកចូលចិត្តស៊ីផឹក ហើយអន់ចរិតទាំងនោះ គិតថា ការប្រមូលសំរាម ជាតួនាទីរបស់អ្នកមើលការខុសត្រូវ និងអ្នកយកលុយថ្លៃចូលលេងតំបន់ទេសចរណ៍ព្រៃភ្នំនោះ។
ប៉ុន្តែអ្នកទេសចរយើង ពិសេសប្រជាពលរដ្ឋ និងក្មេងៗ មួយចំនួន ដែលទម្លាប់បោះចោលសំរាម កាកសំណល់ពាសវាលពាសកាល គួរតែប្តូរទម្លាប់ ហើយរួមគ្នា សម្អាតបរិស្ថាន ព្រៃភ្នំ និងតំបន់ទេសចរណ៍របស់យើង។ បន្ទាប់ពីទទួលទានអាហាររួច អ្នកទេសចរទាំងអស់ ត្រូវប្រមូលវេចខ្ចប់កាកសំណល់ ច្រកថង់ ហើយបោះចោលក្នុងធុងសំរាម។ បើកន្លែងនោះ មិនមានធុងសំរាម ត្រូវតែដឹកជញ្ជូនសំរាមកាកសំណល់ទាំងអស់នោះ ត្រលប់មកវិញ ដើម្បីស្វែងរកធុងសំរាម ហើយបើនៅជិតៗនោះ គ្មានទៀត ត្រូវយកកាកសំណល់សំរាមទាំងនោះ មកផ្ទះវិញ ព្រោះថា កាលពីពេលចេញដំណើរពីផ្ទះ ដាក់របស់របរនំចំណីអាហារទាំងអស់នោះ ធ្ងន់ៗផង ហេតុអ្វី ក៏អាចយកទៅបាន? ចុះពេលទទួលទានរួចរាល់ ក្លាយជាសំរាម និងកាកសំណល់ ដែលស្រាលជាងពេលយកទៅ ហេតុអ្វី ក៏មិនអាចយកមកផ្ទះវិញបាន?
មួយវិញទៀត អាជ្ញាធរសមត្ថកិច្ច ពិសេសអ្នកទទួលខុសត្រូវ អ្នកយកលុយនៅតំបន់រមណីយដ្ឋានទេសចរណ៍នានាទាំងអស់នោះ ក៏ត្រូវតែរៀបចំធុងសំរាម ដាក់ពង្រាយឲ្យបានច្រើន ព្រោះថា បើមានធុងសំរាមហើយ គឺខ្មែរយើង មិនអត់មាយាទ រហូតដល់ថ្នាក់បោះចោលសំរាម ក្រៅធុងឡើយ។
ក្នុងសហគមន៍ ឬតំបន់ទេសចរណ៍នានា អាជ្ញាធរសមត្ថកិច្ច ពិសេសក្រុមអ្នកនៅយកលុយពីអ្នកទេសចរ ត្រូវតែរៀបចំក្រុមការងារ បោសសម្អាតបរិស្ថាន ដឹកជញ្ជូនសំរាម យកទៅបោះចោលនៅទីលានចាក់សំរាម ដែលបានរៀបចំ។ បន្ទាប់ពីប្រមូលសម្អាតហើយ ស្លាកអក្សរ កំណត់ពីការផាកពិន័យទឹកប្រាក់ចំនួនណាមួយ គួរតែសរសេរចងផ្សាយឲ្យបានច្រើន ហើយចាត់វិធានការផាកពិន័យ លើអ្នកបោះចោលសំរាមផ្តេសផ្តាស ពាសវាលពាសកាល។
ជាដំណោះស្រាយមួយទៀត អាជ្ញាធរសមត្ថកិច្ច គួរតែសហការជាមួយក្រុមហ៊ុនប្រមូលសំរាម រៀបចំធុងសំរាម ដាក់ពង្រាយឲ្យច្រើនតាមទីសាធារណៈ តាមផ្លូវ តាមសួនច្បារ តាមរមណីដ្ឋាននានា ហើយក៏ត្រូវចាត់កម្លាំង ប្រមូល និងដឹកជញ្ជូនសំរាមទាំងនោះ ព្រោះថា បើសំរាមពេញធុង គ្មានការដឹកជញ្ជូនយកទៅបោះចោលទេ នោះអ្នកទៅលេងកម្សាន្តទាំងអស់ ច្បាស់ជាត្រូវបោះចោលសំរាម ក្រៅធុង នៅក្បែរធុងសំរាមទាំងនោះ។ ពេលមានខ្យល់ ឬក៏ភ្លៀង នឹងរាយប៉ាយ បង្កជាការកកស្ទះ និងស្អុយរលួយជាមិនខាន។
សរុបទៅ ដើម្បីឲ្យផ្លូវ សួនច្បារ និងតំបន់ព្រៃភ្នំ ជារមណីយដ្ឋានធម្មជាតិដ៏ស្រស់ត្រកាលរបស់យើង នៅតែល្អស្អាត ស្រស់បំព្រង គ្មានសំរាម ចាំបាច់ណាស់ យើងម្នាក់ៗ ត្រូវចូលរួមទាំងអស់គ្នា។ ចូលរួមមុនគេ អ្នកទៅលេងទីនោះ និងក្រុមអ្នកនិយមស៊ីផឹកតាមផ្លូវ តាមសួន ត្រូវឈប់បោះចោលសំរាម កាកសំណល់ផ្តេសផ្តាស។ ទទួលទានរួច ចងប្រមូល វេចខ្ចប់ ហើយយកទៅបោះចោល ក្នុងធុងសំរាម។
រីឯអាជ្ញាធរសមត្ថកិច្ច ក៏គួរតែបង្កើនកម្លាំង ហើយដាក់ពង្រាយធុងសំរាម ឲ្យបានច្រើនជាងមុន ព្រោះថា បើមិនមានធុងសំរាម តើឲ្យប្រជាជនយើង យកសំរាមទៅបោះចោល នៅឯណា? ការបោសសម្អាត និងដឹកជញ្ជូនសំរាមកាកសំណល់ទាំងនោះ ក៏ត្រូវធ្វើដោយទៀងទាត់ផងដែរ។
ក្នុងបរិបទកូវីដ នៅមិនទាន់ស្ងប់ស្ងាត់នៅឡើយ ពេលនេះ ក៏សូមឲ្យប្រជាពលរដ្ឋយើង ពិសេសអ្នកនៅភ្នំពេញ អត់ធ្មត់បន្តមួយរយៈទៀតសិន។ ចាំស្ងប់កូវីដ ចាំដើរលេង ទៅតាមខេត្ត។ ពេលនេះ អ្នកភ្នំពេញ ទៅខេត្ត គឺអ្នកខេត្ត ខ្លាចឆ្លងកូវីដពីអ្នកភ្នំពេញ ហើយអ្នកភ្នំពេញខ្លួនឯង ក៏ខ្លាចឆ្លងកូវីដពីអ្នកខេត្តដែរ។ ពោលគឺគេខ្លាចយើង យើងក៏ខ្លាចគេ ដោយសារតែកូវីដ។ យើងមិនអាចមើលឃើញកូវីដ ហើយក៏មិនដឹងថា នរណាម្នាក់ មានផ្ទុកកូវីដ ឬមិនមានផ្ទុកកូវីដនោះទេ រហូតដល់ធ្វើតេស្តយកសំណាកពិនិត្យត្រឹមត្រូវ។ ដូច្នេះដើរលេងពេលនេះ ហាក់ដូចជាប្រថុយប្រថាននឹងការឆ្លងកូវីដ ហើយអាចនិយាយបានថា សប្បាយ អាចក្លាយជាទុក្ខ បើសិនជាយើងភ្លាត់ស្នៀតឆ្លងកូវីដ៕
ចែករំលែកព័តមាននេះ