រាជធានីភ្នំពេញ ៖ គិតត្រឹមរយៈពេល០៣ថ្ងៃ ចាប់ពីថ្ងៃទី១២ដល់១៤ ខែមិថុនា ការរុះរើបែចិញ្ចឹមត្រី និងផ្ទះបណ្តែតទឹក នៅក្នុងភូមិសាស្ត្រខណ្ឌ ចំនួន០៥ បានចំនួនប្រមាណ…
រាជធានីភ្នំពេញ ៖ គិតត្រឹមរយៈពេល០៣ថ្ងៃ ចាប់ពីថ្ងៃទី១២ដល់១៤ ខែមិថុនា ការរុះរើបែចិញ្ចឹមត្រី និងផ្ទះបណ្តែតទឹក នៅក្នុងភូមិសាស្ត្រខណ្ឌ ចំនួន០៥ បានចំនួនប្រមាណ ១,៣៩១កន្លែងហើយ ។
នៅរសៀលថ្ងៃទី១៤ មិថុនា ២០២១ គណៈបញ្ជាការឯកភាពរដ្ឋបាលរាជធានីភ្នំពេញ បានប្រើកម្លាំងសរុប វិធានការសរុប និងមធ្យោបាយសរុប បន្តចុះត្រួតពិនិត្យ និងអនុវត្តវិធានការរុះរើបែចិញ្ចឹមត្រី និងផ្ទះបណ្តែតទឹកអាណាធិបតេយ្យ នៅលើផ្ទៃទឹកទន្លេ នៅក្នុងភូមិសាស្ត្រខណ្ឌចំនួន០៥ គឺខណ្ឌជ្រោងចង្វារ ខណ្ឌច្បារអំពៅ ខណ្ឌមានជ័យ ខណ្ឌប្ញស្សីកែវ និងខណ្ឌព្រែកព្នៅ ។
លោកឧត្តមសេនីយ៍ទោ ចេវ ហាក់ ស្នងការរង ទទួលផែនការងារនគរបាលចរាចរណ៍ផ្លូវគោក និងផ្លូវទឹក បានឲ្យដឹងថា ចំពោះបែចិញ្ចឹមត្រី ដែលមានចិញ្ចឹមត្រី គឺតម្រូវឲ្យនាំយកមកប្រមូលផ្តុំ តែមួយកន្លែង ក្នុងខណ្ឌព្រែកព្នៅ ដោយរងចាំអនុវត្តវិធានការបន្ត ដោយឡែក ចំពោះបែគ្មានចិញ្ចឹមត្រីត្រូវរុះរើចោល ។ លោកបន្តថា រយៈពេល០៣ថ្ងៃ នៃការអនុវត្តវិធានការរុះរើ គឺថ្ងៃទី១២-១៤ មិថុនា មានបែចិញ្ចឹមត្រី ៧៦៣បែ ត្រូវបានរុះរើនិងចល័តចេញ ចំណែកផ្ទះបណ្តែតទឹក ៦២៨ខ្នង ក៏ត្រូវបានរុះរើ ផងដែរ ។
សូមជម្រាបថា រដ្ឋបាលរាជធានីភ្នំពេញ បានចេញសេចក្តីសម្រេចមួយកាលពីថ្ងៃទី០២ ខែមិថុនា ឆ្នាំ២០២១ ដោយប្រកាសចំពោះអ្នករស់នៅ និងប្រកបបរបរលើផ្ទៃទឹកទន្លេ ក្នុងភូមិសាស្ត្ររាជធានីភ្នំពេញ ឲ្យរុះរើរឺចល័ត ផ្ទះបណ្តែតទឹក បែចិញ្ចឹមត្រី និងសំណង់មិនរៀបរយឲ្យអស់ នៅក្នុងភូមិសាស្ត្ររាជធានីភ្នំពេញ ក្នុងរយៈពេល០៧ថ្ងៃ ព្រោះថា ការរស់នៅនិងប្រកបមុខរបរលើផ្ទៃទឹកទន្លេ បែបអាណាធិបតេយ្យនេះ បានបង្កឲ្យរងផលប៉ះពាល់ដល់ប្រព័ន្ធអេកូឡូហ្ស៊ី មានចរន្តទឹកហូរ គោករាក់ ពិសេសការប្រើប្រាស់ចំណីសម្រាប់ចិញ្ចឹមត្រី និងការបញ្ចេញកាកសំណល់ ការបន្ទោបង់ពាសវាលពាសកាលក្នុងទន្លេ ធ្វើឱ្យខូចខាតធ្ងន់ធ្ងរ ដល់ជីវៈចម្រុះក្នុងទឹក ខូចគុណភាពទឹក បំពុលបរិស្ថាន ប៉ះពាល់សោភ័ណភាព រាជធានីភ្នំពេញ និងព្រមទាំងប៉ះពាល់ដល់សុខភាពប្រជាពលរដ្ឋ ដែលប្រើប្រាស់ទឹកមិនស្អាតផងដែរ ៕
ចែករំលែកព័តមាននេះ