រាជធានីភ្នំពេញ៖ បុរសម្នាក់ បានរត់ចេញពីមណ្ឌលចត្តាឡីស័ក វិទ្យាល័យ ហ៊ុនសែន បុរី ១០០ខ្នង ហើយត្រូវបានកម្លាំងអាជ្ញាធរ និងនគរបាលនាំគ្នា ដេញឃាត់ខ្លួនបាន រួចបញ្ជូនទៅកាន់មណ្ឌលចត្តាឡីស័កវិញ។ ហេតុការណ៍ បានកើតឡើង កាលពីវេលាម៉ោងប្រមាណជាង ៤រសៀល ថ្ងៃទី១៥ ខែមិថុនា ឆ្នាំ២០២១ នៅចំណុចភូមិបាក់ទូក សង្កាត់ទូលសង្កែ១ ខណ្ឌឬស្សីកែវ រាជធានីភ្នំពេញ។
បុរសរូបនោះ ពុំត្រូវបានស្គាល់អត្តសញ្ញាណឡើយ ជាអ្នកធ្វើចត្តឡីស័ក នៅមណ្ឌល វិទ្យាល័យ ហ៊ុនសែន បុរី ១០០ខ្នង ស្ថិតនៅភូមិទឹកថ្លា សង្កាត់ទឹកថ្លា ខណ្ឌសែនសុខ។
តាមប្រភពព័ត៌មាន បុរសរូបនោះ ត្រូវបានគ្រូពេទ្យ ដឹកយកទៅធ្វើចត្តាឡីស័ក នៅមណ្ឌលខាងលើ បាន ៣ថ្ងៃ បន្ទាប់ពីធ្វើតេស្ត លើកទី១ អវិជ្ជមាន ហើយក៏បានរត់គេចខ្លួន កាលពីវេលាម៉ោងប្រមាណ ១ និង ៤នាទីរសៀល ថ្ងៃទី១៥ ខែមិថុនា។
ទោះបីជាយ៉ាងណា មានព័ត៌មានខ្លះថា នៅពេលដែលរត់ចេញ ជននោះ ក៏បានយកទូរស័ព្ទអ្នកក្បែរខាងផងដែរ។
ព័ត៌មានអោយដឹងទៀតថា បន្ទាប់ពីរត់គេចខ្លួន សមត្ថកិច្ចនគរបាលខណ្ឌសែនសុខ ដែលប្រចាំការការពារ នៅមណ្ឌលចត្តាឡីស័កនោះ ក៏បានដេញតាម ហើយក៏បានឃាត់ខ្លួន បាននៅក្នុងភូមិបាក់ទូក សង្កាត់ទួលសង្កែទី១ ខណ្ឌឬស្សីកែវ។
បន្ទាប់ពីឃាត់ខ្លួន សមត្ថកិច្ច ចាប់ចង់ខ្សែ ស្រាប់តែជនសង្ស័យប្រាស់ខ្លួន រត់គេច ចូលទៅប្រឡោះក្រោមផ្ទះប្រជាពលរដ្ឋ ដែលជាតំបន់សំណង់មិនរៀបរយ រត់ខ្លួនបាត់។
អាជ្ញាធរ និងសមត្ថកិច្ច បានឡោមព័ទ្ធតំបន់នោះ ក៏រកឃើញ ហើយឃាត់ខ្លួនបាន នៅវេលាម៉ោងប្រមាណជាង ៤រសៀល ថ្ងៃទី១៥ខែ មិថុនា។ រួចក៏បានបញ្ជូន តាមរថយន្តពេទ្យ ទៅកាន់មណ្ឌលចត្តាឡីស័កវិញ៕ ម៉េង ធា
ចែករំលែកព័តមាននេះ