បណ្ឌិតទាំងឡាយមានព្រះពុទ្ធជាដើមរបានពន្យល់ថា អ្នកដែលទើបនឹងថ្វាយខ្លួនចំពោះព្រះត្រ័យរ័ត្នត្រូវប្រើវិចារណញ្ញាណ ឬត្រូវមានការយល់ត្រឹមត្រូវ ហៅតាមលទ្ធិពុទ្ធសាសនាថា សម្មាទិដ្ឋិ ដែលមានន័យថា ការយល់ឃើញត្រូវ ។ ដើម្បីនឹងអាចយល់ត្រូវ យល់តាមសភាពពិតតាមគន្លងធម៌ ព្រះសម្មាសម្ពុទ្ធទ្រង់ត្រាស់សម្តែងទេសនាអំពីរូបមន្តជំនឿ១០ចំណុចថា មុននឹងផ្ញើជំនឿលើនរណាម្នាក់ត្រូវពិចារណាដូចតទៅ:
១- កុំប្រកាន់ជឿអ្វីសព្វយ៉ាងដែលឮតៗគ្មា មិនមានហេតុផល ។
២- កុំប្រកាន់ជឿអ្វីដែលគេធ្វើតៗគ្មា មិនមានដើមចុង ។
៣- កុំប្រកាន់ជឿអ្វីដោយអាងថា បានឮគេនិយាយមកដូច្នេះ ។
៤- កុំប្រកាន់ជឿអ្វី មើលទៅឃើញសមតាមគម្ពីរខ្លួន ។
៥- កុំប្រកាន់ជឿអ្វីដោយអាងហេតុ ឬស្មានយក ។
៦- កុំប្រកាន់ជឿអ្វី ដោយអាងការគ្នេរគ្នាន់ ឬកាត់តម្រូវ ។
៧- កុំប្រកាន់ជឿអ្វី ដោយអាងការត្រិះរិះ មើលតាមអាការៈ ។
៨- កុំប្រកាន់ជឿអ្វីដោយអាងថា ខ្លួនពេញចិត្ត ។
៩- កុំប្រកាន់ជឿអ្វីថា អ្នកនេះជាអ្នកប្រាជ្ញ គួរជឿតាម ។
១០- កុំប្រកាន់ជឿថា សមណៈនេះជាគ្រូរបស់យើង ។
ពាក់ព័ន្ធរូបមន្ត១០ខាងលើនេះ ព្រះពុទ្ធ បរមគ្រូ ទ្រង់ប្រដៅទៀតថា នៅពេលដែលអ្នកជ្រាបច្បាស់ថា អ្វីជាកុសល អ្វីដែលប្រសើរ ដែលអ្នកបានឃើញពិតដោយខ្លួនឯង ចូរបដិបត្តិតាមចុះ អ្វីដែលជាអកុសល អ្វីដែលមិនប្រសើរ ដែលអ្នកបានឃើញពិតដោយខ្លួនឯង ចូរកុំបដិបត្តិ ឬប្រព្រឹត្តឡើយ ។
បើបុគ្គលណាបានអាន បានសិក្សារៀនសូត្រ ចេះដឹង និងទន្ទេញឱ្យចាំនូវមាតិកាទាំង១០ចំណុចខាងលើនេះ ហើយប្រើប្រាស់បញ្ញាក្នុងជីវិតប្រចាំថ្ងៃ បុគ្គលនោះនឹងកើតមានបញ្ញា មានភាពឈ្លាសវៃក្នុងជីវិតជាក់ជាពុំខានឡើយ ៕ សាន សារិន
ចែករំលែកព័តមាននេះ