- ភ្នំពេញ
ភ្នំពេញ៖ ដើម្បីបង្កើនការត្រួតពិនិត្យ និងសុវត្ថិភាពតាមមន្ទីរពេទ្យ និងកន្លែងធ្វើការងារ ក្នុងជួររាជរដ្ឋាភិបាល រួមទាំងក្រុមហ៊ុនឯកជនផង គួរតែមានការធ្វើតេស្តរហ័ស រកមេរោគកូវីដ១៩។ វិធានការថ្មីនេះ បន្ថែមលើវិធានការត្រួត…
ភ្នំពេញ៖ ដើម្បីបង្កើនការត្រួតពិនិត្យ និងសុវត្ថិភាពតាមមន្ទីរពេទ្យ និងកន្លែងធ្វើការងារ ក្នុងជួររាជរដ្ឋាភិបាល រួមទាំងក្រុមហ៊ុនឯកជនផង គួរតែមានការធ្វើតេស្តរហ័ស រកមេរោគកូវីដ១៩។ វិធានការថ្មីនេះ បន្ថែមលើវិធានការត្រួត…
ភ្នំពេញ៖ ដើម្បីបង្កើនការត្រួតពិនិត្យ និងសុវត្ថិភាពតាមមន្ទីរពេទ្យ និងកន្លែងធ្វើការងារ ក្នុងជួររាជរដ្ឋាភិបាល រួមទាំងក្រុមហ៊ុនឯកជនផង គួរតែមានការធ្វើតេស្តរហ័ស រកមេរោគកូវីដ១៩។ វិធានការថ្មីនេះ បន្ថែមលើវិធានការត្រួត ពិនិត្យ នៅច្រកចូល តាមរយៈការវាស់កំដៅ លាងដៃអាល់កុល ពាក់ម៉ាស និងរក្សាគម្លាតសុវត្ថិភាព។
ការធ្វើតេស្តរហ័ស Rapid Test រកមេរោគកូវីដ១៩ គឺចំណាយពេលតែ ១៥ ទៅ ២០នាទីប៉ុណ្ណោះ។ ក្នុងនោះ នៅមន្ទីរពេទ្យគន្ធបុប្ផា ក្នុងពេលឆ្លងរាលដាលជំងឺកូវីដ១៩ ធ្ងន់ធ្ងរចាប់តាំងពីខែមេសាមក គឺបានជ្រើសយកវិធានការថ្មីនេះ បន្ថែមលើវិធានការមានស្រាប់ តាមការណែនាំរបស់ក្រសួងសុខាភិបាល ដើម្បីទប់ស្កាត់ការឆ្លងកូវីដក្នុងមន្ទីរពេទ្យ ដែលព្យាបាលកុមារ ដោយមិនគិតថ្លៃនេះ។
នៅមន្ទីរពេទ្យគន្ធបុប្ផា មិនថា កុមារ ដែលចូលពិនិត្យព្យាបាលជំងឺ ឬឪពុកម្តាយ ដែលនាំកុមារទាំងនោះ ចូលពិនិត្យជំងឺទេ គឺត្រូវឆ្លងកាត់ការធ្វើតេស្ត រកមេរោគកូវីដ១៩ តាមរយៈ Rapid Test នៅច្រកចូល បន្ថែមលើវិធានការសាមញ្ញៗ ដាក់ដៃចូលម៉ាស៊ីនវាស់កំដៅ និងលាងដៃនឹងអាល់កុល តាមរយៈម៉ាស៊ីនវ៉ាស់កម្តៅ រក្សាគម្លាត រួមទាំងការពាក់ម៉ាស់ផង។
ក្រៅពីអ្នកជំងឺ និងក្រុមគ្រួសារ ដែលត្រូវធ្វើតេស្តរកកូវីដ នៅមន្ទីរគន្ធបុប្ផា សាខាជាប់វត្តភ្នំ ក្នុងរាជធានីភ្នំពេញ គឺសូម្បីតែអ្នកទៅផ្តល់ឈាមដោយស្ម័គ្រចិត្ត ក៏ត្រូវឆ្លងកាត់ការធ្វើតេស្ត រកកូវីដនេះដែរ ទើបគ្រូពេទ្យអនុញ្ញាតឲ្យឡើងទៅបន្ទប់បរិច្ចាគឈាម នៅជាន់ទីមួយ បើសិនជាលទ្ធផលតេស្ត អវិជ្ជមានវីរុសកូវីដ១៩។ ការធ្វើដូច្នេះ ត្រូវបានគ្រូពេទ្យ បញ្ជាក់ថា ដើម្បីសុវត្ថិភាពក្នុងមន្ទីរពេទ្យមនុស្សធម៌ ដែលបន្សល់ពីលោកវេជ្ជបណ្ឌិត Beat Richner ដ៏ល្បីល្បាញនេះ។
យ៉ាងណាក៏ដោយ វិធានការតាមរយៈការធ្វើតេស្តរហ័សនេះ កាលពីថ្ងៃទី១១ ខែមិថុនា ឆ្នាំ២០២១ រដ្ឋមន្ត្រីសុខាភិបាល លោក ម៉ម ប៊ុនហេង បានចេញលិខិត ក្រើនរម្លឹកបន្ថែមដល់អភិបាលរាជធានីខេត្ត ដើម្បីពង្រឹងការត្រួតពិនិត្យសុខភាពអ្នកដំណើរ ចូលមកកម្ពុជា ដោយការធ្វើតេស្តរហ័ស រកមេរោគកូវីដ១៩។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាល ក្នុងនាមជាប្រធានគណៈកម្មការអន្តរក្រសួង ដើម្បីប្រយុទ្ធនឹង ជំងឺកូវីដ១៩ បានលើកឡើងថា ដើម្បីពង្រឹងការត្រួតពិនិត្យសុខភាពអ្នកដំណើរចូលមកកម្ពុជា តាមច្រកព្រំដែនទាំងផ្លូវអាកាស ផ្លូវគោក និងផ្លូវទឹក ត្រូវធ្វើតេស្តអង់ទីហ្សែនរហ័ស ឲ្យបានម៉ឺងម៉ាត់។ អ្នកជំងឺ ដែលមានវិជ្ជមានវីរុសកូវីដ១៩ ត្រូវបញ្ជូនទៅកាន់មន្ទីរពេទ្យ ដើម្បីព្យាបាល ចំណែកអ្នកដំណើរផ្សេងទៀត ដែលរួម ដំណើរជាមួយអ្នកវិជ្ជមានវីរុសកូវីដ១៩ ត្រូវបញ្ជូនទៅកាន់មណ្ឌលចត្តាឡីស័ក រយៈពេល ១៤ថ្ងៃ។
ក្នុងសេចក្តីណែនាំ លោករដ្ឋមន្ត្រីសុខាភិបាល ក៏បានលើកឡើងថា អភិបាលខេត្ត នៅតាមព្រំដែនថៃ និងវៀតណាម ត្រូវប្រជុំជាមួយសមភាគីថៃ ឬវៀតណាម ដើម្បីស្នើសុំកិច្ចសហការក្នុងការពង្រឹងការធ្វើតេស្តរកមេរោគកូវីដ១៩ ជូនដល់ពលករ និងប្រជាជនទូទៅ មុននឹងអនុញ្ញាតឲ្យឆ្លងដែនមកកម្ពុជាវិញ។
កន្លងមក នៅតាមបណ្តាខេត្តមួយចំនួន ក្នុងអំឡុងខែមេសា នៅពេលការឆ្លងរាលដាលជំងឺកូវីដ១៩ កើតឡើងធ្ងន់ធ្ងរនៅភ្នំពេញ រហូតដល់ត្រូវបិទខ្ទប់តំបន់ឆ្លងកូវីដមួយចំនួន និងបិទខ្ទប់រាជធានីភ្នំពេញ និងក្រុងតាខ្មៅផងនោះ គឺនៅតាមខេត្តនានា បានអនុវត្តវិធានការធ្វើតេស្តរកមេរោគកូវីដ១៩ តាមរយៈតេស្តរហ័ស ចំពោះអ្នកដំណើរ ដែលធ្វើដំណើរពីតំបន់មានហានិភ័យខ្ពស់នៃការឆ្លងកូវីដ ពិសេសអ្នកធ្វើដំណើរពីភ្នំពេញ ជាដើម។
នៅតាមមន្ទីរពេទ្យរដ្ឋ និងឯកជនមួយចំនួន ក៏បានអនុវត្តវិធានការធ្វើតេស្តលើអ្នកជំងឺ ដែលទើបចូលសម្រាកព្យាបាល នៅតាមមន្ទីរពេទ្យ ដូចជា នៅមន្ទីរពេទ្យរុស្ស៊ី ឬមន្ទីរពេទ្យមិត្តភាពខ្មែរ-សូវៀត មន្ទីរពេទ្យកាល់ម៉ែត មន្ទីរពេទ្យមិត្តកម្ពុជា-ចិន ព្រះកុសមៈ ឬមន្ទីរពេទ្យព្រះសង្ឃ ក្នុងរាជធានីភ្នំពេញ។ មុននឹងបញ្ជូនអ្នកជំងឺទៅពិនិត្យ និងសង្គ្រោះ តាមអាការៈអ្នកជំងឺ គឺពេលចូលដល់មន្ទីរពេទ្យភ្លាម ពេទ្យត្រូវធ្វើតេស្តរហ័ស រកមេរោគកូវីដ មុនគេ។
ក៏ប៉ុន្តែការធ្វើតេស្តរកកូវីដ នៅមន្ទីរពេទ្យគន្ធបុប្ផា បានធ្វើឡើងដោយឥតគិតថ្លៃ ខណៈដែលការព្យាបាលជំងឺកុមារកម្ពុជារាប់លាននាក់ ក៏ធ្វើឡើងដោយមិនគិតប្រាក់សូម្បីមួយរៀលដែរ។ ប៉ុន្តែការធ្វើតេស្តរហ័ស រកកូវីដ នៅតាមមន្ទីរពេទ្យរដ្ឋ នៅភ្នំពេញ គឺគិតលុយ ម្តង ៦ម៉ឺនរៀល។ ការយកលុយថ្លៃធ្វើតេស្តលើអ្នកជំងឺ និងអ្នកចូលពេទ្យកំដរអ្នកជំងឺ តាមមន្ទីរពេទ្យរដ្ឋធំៗនៅភ្នំពេញ ក្នុងនោះ មានជាអាទិ៍ មន្ទីរពេទ្យព្រះកុសមៈ ឬមន្ទីរពេទ្យព្រះសង្ឃ និងមន្ទីរពេទ្យរុស្ស៊ី ជាដើម នាំឲ្យមានការស្នើសុំ កុំឲ្យគិតថ្លៃ ឬក៏បញ្ចុះតម្លៃថោកជាងនេះ។
យ៉ាងណាក៏ដោយ វិធានការធ្វើតេស្តរហ័ស Rapid Test រកមេរោគកូវីដ១៩ តាមមន្ទីរពេទ្យគន្ធបុប្ផា ក៏ដូចជានៅពេទ្យរដ្ឋនានា គួរតែត្រូវពង្រីកការអនុវត្តនេះ នៅតាមកន្លែងដទៃទៀត ឲ្យទូលំទូលាយជាងមុន ពិសេសនៅតាមមន្ទីរក្រសួងរបស់រដ្ឋ និងក្រុមហ៊ុនឯកជនដទៃទៀត បើសិនជាមានលទ្ធភាព។ ការធ្វើដូច្នេះ ចំណាយពេលខ្លី តែច្បាស់លាស់ និងមានប្រសិទ្ធភាព ជាងការត្រឹមតែវាស់កំដៅ និងលាងដៃអាល់កុល នៅមាត់ច្រកចូល។
បើអាចធ្វើតេស្តរហ័សនេះ បាបនទូលាយជាងសព្វថ្ងៃ ហើយធ្វើដោយមិនគិតថ្លៃផង គឺអាចរកឃើញអ្នកឆ្លងកូវីដ១៩ បានឆាប់រហ័ស ហើយចាត់វិធានការទប់ស្កាត់បានឆាប់រហ័ស មិនឲ្យអ្នកជំងឺនោះ ចល័តទៅកន្លែងផ្សេងទៀត ដែលអាចបង្កហានិភ័យក្នុងការឆ្លងកូវីដ១៩ ក្នុងសហគមន៍ ហើយពិបាកនឹងកាត់ផ្តាច់។ ប៉ុន្តែរដ្ឋាភិបាល ក៏គួរតែពិចារណា លើតម្លៃក្នុងការធ្វើតេស្តរហ័សរកកូវីដ លើអ្នកជំងឺ និងអ្នកចូលពេទ្យរដ្ឋ កំដរអ្នកជំងឺ ឬសួរសុខទុក្ខសាច់ញាត្តិ៕
ចែករំលែកព័តមាននេះ