គ្រាប់ស្វាយចន្ទីកែច្នៃរួច បង្ហាញខ្លួននៅលើទីផ្សារជប៉ុន !
ខេត្តកំពង់ធំ ៖ យោងតាមរដ្ឋមន្ត្រីក្រសួងកសិកម្ម បានឱ្យដឹងកាលពីថ្ងៃទី ១៣ ខែមិថុនា ឆ្នាំ ២០២១ នេះថា ដោយមានការជួយជ្រោមជ្រែងពីនាយកដ្ឋានកសិ-ឧស្សាហកម្ម…
ខេត្តកំពង់ធំ ៖ យោងតាមរដ្ឋមន្ត្រីក្រសួងកសិកម្ម បានឱ្យដឹងកាលពីថ្ងៃទី ១៣ ខែមិថុនា ឆ្នាំ ២០២១ នេះថា ដោយមានការជួយជ្រោមជ្រែងពីនាយកដ្ឋានកសិ-ឧស្សាហកម្ម កាលពីកាលពីថ្ងៃទី ២២ ខែកុម្ភៈ ឆ្នាំ ២០២០ ក្រុមហ៊ុន Top Planning Japan (TPJ) បានចុះអនុសារណៈយោគយល់គ្នា (MOU) ជាមួយសិប្បកម្មកែច្នៃគ្រាប់ស្វាយចន្ទី ជ័យសំបូរ លើកិច្ចសហប្រតិបត្តិការពាណិជ្ជកម្ម ដើម្បីសាងសង់រោងចក្រកែច្នៃគ្រាប់ស្វាយចន្ទីខ្នាតតូចជាការសាកល្បង ។
ឯកឧត្តម វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ បានបន្តថា MOU នេះមានគោល បំណងលើកកម្ពស់គុណភាពគ្រាប់ស្វាយចន្ទីស្រស់ និងផ្តល់តម្លៃខ្ពស់ដល់កសិករក្នុងតំបន់ និងកសិករដែលបានចុះកិច្ចសន្យាផលិតកម្មកសិកម្ម ធានាគុណភាព និងសុវត្ថិភាពគ្រាប់ស្វាយចន្ទី បង្កើតឱកាសការងារ និងប្រាក់កម្រៃសមរម្យដល់ស្ត្រី និងយុវជននៅក្នុងសហគមន៍ និងលើកកម្ពស់សមត្ថភាពប្រកួតប្រជែងទាំងនៅលើទីផ្សារនៅក្នុងតំបន់ និងទីផ្សារអន្តរជាតិ ។
បច្ចុប្បន្នសិប្បកម្មកែច្នៃគ្រាប់ស្វាយចន្ទីមានសមត្ថភាពកែច្នៃគ្រាប់ស្វាយចន្ទីបាន ១០ តោន ក្នុងមួយខែ ។ លទ្ធផលនៃការអនុវត្ត MOU និងដោយមានកិច្ចសហការល្អជាមួយនាយកដ្ឋានកសិ-ឧស្សាហកម្ម ធ្វើឱ្យគ្រាប់ស្វាយចន្ទីកែច្នៃរួចបានបង្ហាញខ្លួននៅលើទីផ្សារជប៉ុននាពេលថ្មីៗនេះ ។ ជាក់ស្តែងកាលពីថ្ងៃទី ០៧ ខែឧសភា សិប្បកម្មគ្រាប់ស្វាយចន្ទី ជ័យសំបូរ បាននាំចេញគ្រាប់ស្វាយចន្ទីកែច្នៃរួចចំនួន ៧ តោនទៅកាន់ប្រទេសជប៉ុនសម្រាប់លើកទី ១ ហើយលើកទី ២ គឺនៅថ្ងៃនេះតែម្តងមានចំនួន ៩ តោន បានដាក់ចូលក្នុងទូកុងទីន័ររួចរាល់គ្រោងនាំចេញនៅថ្ងៃទី ១៧ ខាងមុខ ហើយសង្ឃឹមថាផលិតផលខ្មែរនេះនឹងទៅដល់ទីក្រុង OSAKA នៅថ្ងៃទី ១៥ ខែកក្កដា ។
លោកស្រី អ៊ិន ឡៃហួត បានបញ្ជាក់ជូនថា សិប្បកម្មកែច្នៃគ្រាប់ស្វាយចន្ទី ជ័យសំបូរ គ្រោងនាំចេញក្នុងបរិមាណ ៩ តោន ជារៀងរាល់ខែ ហើយបរិមាណនេះនឹងមានការកើនឡើងតាមការបញ្ជាទិញពីទីផ្សារជប៉ុននាពេលអនាគត ។ ក្រៅពីទីផ្សារអន្តរជាតិ សិប្បកម្មកែច្នៃគ្រាប់ស្វាយចន្ទី ជ័យ សំបូរ បានផ្គត់ផ្គឱ្យទីផ្សារ ក្នុងស្រុកដូចជាសហករណ៍សរីរាង្គខ្មែរ លក់ដុំ លក់រាយជូនអតិថិជនទៅតាមបណ្តាខេត្ត និងតំបន់ទេសចរណ៍ប្រាសាទសំបូរព្រៃគុក ។
ថ្លែងចេញពីសិប្បកម្មកែច្នៃគ្រាប់ស្វាយចន្ទី ជ័យសំបូរ នាពេលនេះ ឯកឧត្តមរដ្ឋមន្ត្រីជម្រាបទៅម្ចាស់ចម្ការ សហគមន៍ស្វាយចន្ទី សិប្បកម្មកែច្នៃផ្សេងៗទៀត ត្រូវស្វែងរកដៃគូដើម្បីទទួលបានបច្ចេកទេសដាំដុះ បច្ចេកទេសកែច្នៃ និងទីផ្សារនាំចេញ ដោយមានសិប្បកម្មកែច្នៃគ្រាប់ស្វាយចន្ទី ជ័យសំបូរ ជាឧទាហរណ៍ដើមឡើយនៅឆ្នាំ ២០១៩ សិប្បកម្មមានផ្ទះឈើមួយល្វែង ទីធ្លាតូចចង្អៀត មានកម្មករជា ១០ នាក់ បច្ចុប្បន្នមានបុគ្គលិក និងកម្មករសរុបចំនួន ១១០ នាក់ ក្នុងននោះស្ត្រី ៩៥ នាក់ រោងសិប្បកម្មធំមួយមានឧបករណ៍ ឬម៉ាស៊ីនកែច្នៃគ្រាប់ស្វាយចន្ទី និងឡចំហុយគ្រាប់ ។ លោកបានបន្តថា ផលិត ផលមានទីផ្សារ នាំឲ្យផលិតកម្មកើនឡើង កំណើនប្រាក់ចំណូល បង្កើតឱកាសការងារ ហើយនេះគឺជាបំណងប្រាថ្នារបស់រាជរដ្ឋាភិបាលក្នុងគោលនយោបាយជំរុញការនាំចេញកសិផល ក្នុងបរិបទនៃការរីករាលដាលជំងឺឆ្លងកូវីដ-១៩ ។
តាមរបាយការណ៍របស់នាយកដ្ឋានកសិ-ឧស្សាហកម្ម បានឲ្យដឹងថា ដោយមានការគាំទ្រពីអង្គការ JICA ក្រុមហ៊ុន TPJ បានទទួលគម្រោងគាំទ្រដើម្បីសិក្សាលម្អិតអំពីស្ថានភាពទូទៅនៃខ្សែច្រវាក់តម្លៃស្វាយចន្ទី ក្នុងគោលបំណងកសាងផែនការមេសម្រាប់អភិវឌ្ឍន៍ និងលើកកកម្ពស់ផលិតផលស្វាយ ចន្ទីកម្ពុជា រយៈពេល ១៤ ខែ ចាប់ពីថ្ងៃទី ១៦ ខែសីហា ឆ្នាំ ២០១៩ ដល់ថ្ងៃទី ៣០ ខែកញ្ញា ឆ្នាំ ២០២០ ក្នុងខេត្តគោលដៅចំនួន ៤ គឺព្រះវិហារ កំពង់ធំ សៀមរាប និងខេត្តកំពង់ចាម ។
ជាការសាកល្បងអនុវត្តគម្រោង ក្រុមហ៊ុន TPJ បានចុះកិច្ចព្រមព្រៀងជាមួយសិប្បកម្មកែច្នៃគ្រាប់ស្វាយចន្ទី ជ័យសំបូរ ក្នុងការទិញគ្រាប់ស្វាយចន្ទីដើម្បីធ្វើការកែច្នៃសាកល្បងប្រមាណចំនួន ១៥០ តោន ។ ទទួលបានទុនវិនិយោគពាណិជ្ជកម្មពីក្រុមហ៊ុន បានចរចារទិញគ្រាប់ស្វាយចន្ទីតាមការចរចារតម្លៃលើប្រភេទ និងគុណភាពតាមទីផ្សារជាក់ស្តែងប្រមាណ ២០ ម៉ឺនដុល្លាក្នុងឆ្នាំ ២០២០ ។ ឆ្នាំ ២០២១ នេះសិប្បកម្មគ្រោងទិញគ្រាប់ស្វាយចន្ទីចំនូន ១ ០០០ តោន ពីកសិករ ដែលក្នុងនោះក៏នឹងសាកល្បងកែច្នៃគ្រាប់ស្វាយចន្ទីសរីរាង្គចំនួន ៣០ តោន ដែលទទួលទិញពីសហគមន៍ផលិតគ្រាប់ស្វាយចន្ទីសរីរាង្គក្នុងខេត្តព្រះវិហារ ។
ទិសដៅអនាគត TPJ សហការជាមួយសិប្បកម្មកែច្នៃគ្រាប់ស្វាយចន្ទី ជ័យសំបូរ ក្រោមកិច្ចសម្របសម្រួលពីនាយកដ្ឋានកសិ-ឧស្សាហកម្មនឹងបង្កើនការនាំចេញទៅកាន់ទីផ្សារអឺរ៉ុប សហរដ្ឋអាមេរិក កាណាដា ចិន និងអូស្ត្រាលី ។ បង្កើនទំហំផលិតកម្មកែច្នៃគ្រាប់ស្វាយចន្ទីឲ្យបាន ២០ តោនក្នុងមួយខែ ។ បង្កើនបរិមាណប្រមូលទិញគ្រាប់ស្វាយចន្ទីស្រស់ចំនួន ១០០០ តោន ក្នុងឆ្នាំ ២០២១ និងកើនឡើងបន្តបន្ទាប់ ។ សហការជាមួយសមាគមស្វាយចន្ទីកម្ពុជា កសាងឃ្លាំងស្តុកគ្រាប់ស្វាយចន្ទីស្រស់ដែលមានសមត្ថភាពស្តុកទុកគ្រាប់យ៉ាងតិច ៥ ០០០ តោន ដើម្បីធានាបរិមាណផ្គត់ផ្គត់ និងតម្លៃកិច្ចសន្យា។ នៅឆ្នាំ ២០២៣ ក្រុមហ៊ុន TPJ គ្រោងបង្កើតរោងចក្រកែច្នៃ ដែលមានសមត្ថភាពផលិតបានរហូតដល់ ២ ០០០-៣ ០០០ តោន ក្នុងមួយឆ្នាំ ៕
ចែករំលែកព័តមាននេះ