ខេត្តបន្ទាយមានជ័យ៖ កសិករនៅសង្កាត់ភ្នៀត ក្រុងសិរីសោភ័ណ ប្រកបរបរចិញ្ចឹមកង្កែប បានត្អូញត្អែរ ខណៈកង្កែបរបស់ពួកគាត់ បានផលហើយ តែឆ្នាំនេះ គ្មានទីផ្សារលក់មិនចេញ។ ក្រុមអ្នកចិញ្ចឹមកង្កែប ព្រួយបារម្ភ និងជួបប្រទះបញ្ហា ដោយគ្មានប្រាក់សងបំណុលធនាគារ ដែលអ្នកស្រុកហៅថា បង់អង្គការ និងគ្មានប្រាក់ទិញចំណីឲ្យបង្កែបស៊ី។ តែខាងមន្ទីរពាណិជ្ជកម្ម សូមឲ្យទាក់ទងមក នឹងរកទីផ្សារលក់កង្កែបឲ្យ។
បងប្រុស ស្រី សុខា រស់នៅភូមិភ្នៀត សង្កាត់ភ្នៀត ជាកសិករចិញ្ចឹមបង្កែប បានរៀបរាប់ថា គាត់បាន ប្រកបរបរចិញ្ចឹមកង្កែបជាច្រើនឆ្នាំមកហើយ ហើយឆ្នាំនេះ បានចិញ្ចឹមកង្កែប ចំនួន ៦ស្បៃ។ ក្នុង ១ស្បៃ ដាក់កង្កែបប្រហែល ១ ០០០ក្បាល យ៉ាងតិច។ គាត់ត្រូវចំណាយថវិកាជាច្រើន ក្នុងការទិញចំណីឲ្យបង្កែបស៊ី ហើយសព្វថ្ងៃនេះ ១ថ្ងៃ ត្រូវចំណាយចំណី ១ការុង ស្មើនឹង ៨ម៉ឺនរៀល ឲ្យកង្កែបស៊ី ជារៀងរាល់ថ្ងៃ។ ដោយសារតែលក់មិនចេញ គ្មានទីផ្សារ ធ្វើឲ្យគាត់ជួបការលំបាក គ្មានថវិកានឹងទិញចំណី ឲ្យកង្កែបស៊ី ហើយខ្ចីលុយធនាគារ យកមកទិញចំណីឲ្យវាស៊ី កាន់តែជួបនូវការលំបាកបន្ថែមទៀត ដោយកង្កែបសព្វថ្ងៃ លក់មិនចេញទាល់តែសោះ។
កសិកររូបនេះ បន្តថា បើឆ្នាំទៅមិញ គ្រាន់មានទីផ្សារ មានម៉ូយ។ មកដល់ឆ្នាំនេះ ជួបបញ្ហាជំងឺកូវីដ១៩ គ្មានម៉ូយមកទិញទាល់តែសោះ។
ចំណែកឯបងប្រុស ពុធ ឈួង កសិករចិញ្ចឹមកង្កែប នៅភូមិភ្នៀត សង្កាត់ភ្នៀតនោះដែរ ក៏បានលើក ឡើង មិនខុសនឹងបងប្រុស ស្រី សុខា ទេ។ គាត់សព្វថ្ងៃ ចិញ្ចឹមកង្កែប ចំនួន ១១ស្បៃ។ ក្នុង ១ស្បៃ ក៏មិនតិចជាង ១០០០ក្បាលដែរ។ ហើយលក់មិនចេញ នៅពេលទទួលផលហើយនោះ ព្រោះតែគ្មានទីផ្សារ។
ក្រុមអ្នកចិញ្ចឹមកង្កែប ក៏បានសំណូមពរ ដល់អាជ្ញាធរ ក៏ដូចជា មន្ទីរជំនាញកសិកម្ម និងមន្ទីរពាណិជ្ជកម្ម ជួយរកទីផ្សារ ដល់ពួកគាត់ បានលក់បង្កែប ដើម្បីយកលុយបង់ធនាគារ និងបានទិញចំណី ឲ្យបង្កែប ដែលនៅតូចៗ បន្ថែមទៀត។
ជាមួយគ្នានោះដែរ លោក ហួត សាវឺ ចៅសង្កាត់ភ្នៀត បានបញ្ជាក់ថា នៅក្នុងទូទាំងសង្កាត់ភ្នៀតនេះ មានកសិករចិញ្ចឹមកង្កែប ចំនួន ៥៨គ្រួសារ បច្ចុប្បន្ន ជួបបញ្ហាទីផ្សារលក់កង្កែប មិនចេញ។ ដូច្នេះក្នុងលោកនាមលោក ដែលជាអាជ្ញាធរមូលដ្ឋាន ក៏សូមសំណូមពរដល់អាជ្ញាធរក្រុង ខេត្ត ក៏ដូចជាមន្ទីរជំនាញ និងមន្ទីរពាក់ព័ន្ធ ជួយរកទីផ្សារកង្កែបដល់កសិករ ដែលបានខិតខំចិញ្ចឹមកង្កែប បានលក់ចេញផង ដើម្បីបានថវិកានោះដោះស្រាយបង់ធនាគារ និងដើម្បីជីវភាពរបស់ពួកគាត់។
ជុំវិញបញ្ហានេះ លោក ដុំ វណ្ណឌី អនុប្រធានមន្ទីរពាណិជ្ជកម្មខេត្ត ទទួលបន្ទុកការិយាល័យ អភិវឌ្ឍន៍ពាណិជ្ជកម្ម បានឲ្យដឹងថា ពាក់ព័ន្ធបញ្ហាទីផ្សារកង្កែប ដែលកសិករ នៅក្នុងសង្កាត់ភ្នៀត ជួបប្រទះនេះ ក្នុងនាមមន្ទីរ នឹងខិតខំជួយរកទីផ្សារជូនពួកគាត់ ហើយមួយវិញទៀត បងប្អូនអ្នកចិញ្ចឹមកង្កែប ដែលកំពុងជួបប្រទះបញ្ហាទីផ្សារ មន្ទីរសូមលើកទឹកចិត្តឲ្យពួកគាត់ អាចមកលក់ដូរនៅផ្សារសហគមន៍របស់ខេត្តបាន ដោយមិនមានគិតតម្លៃស្តង់នោះទេ តែត្រូវទាក់ទងមកមន្ទីរជាមុនសិន តាមរយៈលោក សោម សុខា អនុប្រធានការិយាល័យអភិវឌ្ឍន៍ពាណិជ្ជកម្ម នៃមន្ទីរពាណិជ្ជកម្មខេត្ត លេខទូរសព្ទ 017 84 54 84 ក្រុមការងារ នឹងសម្រួលកន្លែងលក់ដូរ ជូនបងប្អូន៕ ណុប រក្សា
ចែករំលែកព័តមាននេះ