ភ្នំពេញ៖ ផ្ទះប្រមាណ ៣ខ្នង មានទីតាំងស្ថិតនៅជិតបុរីសន្តិភាព២ ក្នុងភូមិដំណាក់ត្រយឹង សង្កាត់ចោមចៅទី២ ខណ្ឌពោធិ៍សែនជ័យ ត្រូវបានអគ្គិភ័យឆាបឆេះទាំងស្រុង ដោយពុំទាន់ដឹងមូលហេតុ។ ហេតុការណ៍នេះ បានកើតឡើង កាលពីវេលាម៉ោង ៩ និង ៥០នាទីយប់ ថ្ងៃទី១១ ខែមិថុនា ឆ្នាំ២០២១ នេះ។
ប្រភពព័ត៌មាន បានឲ្យដឹងថា ផ្ទះ ដែលត្រូវភ្លើងឆាបឆេះមុនគេ គឺជាប្រភេទឈើលើថ្មក្រោម ដែលគ្មានមនុស្សនៅ បន្ទាប់មក បានឆេះរាលដល់ផ្ទះ ដែលស្ថិតនៅជាប់គ្នានោះ ជាបន្តបន្ទាប់ទៀត។ អគ្គិភ័យនេះ បានឆាបឆេះ នៅក្នុងខណៈពេល ដែលមេឃ កំពុងធ្លាក់ភ្លៀងថែមទៀតផង។
ដោយឡែក ការឆាបឆេះនេះ នៅពុំទាន់ត្រូវបានគេដឹងថា បណ្ដាលមកពីមូលហេតុអ្វីច្បាស់លាស់នៅឡើយទេ។ ប៉ុន្តែជំហានដំបូងបានសង្ស័យថា ជាករណីឆ្លងចរន្តអគ្គិសនី។
ប្រជាពលរដ្ឋរស់នៅកន្លែងភ្លើងឆេះផ្ទះនោះ បានឲ្យដឹងថា នៅពេលមានការឆាបឆេះភ្លាម ប្រជាពលរដ្ឋបាននាំគ្នាដងទឹក ដែលមាននៅនឹងកន្លែងកើតហេតុនោះ ជះពន្លត់ ព្រមទាំងមានជំនួយពីក្រុមរថយន្តពន្លត់អគ្គិភ័យផង ទើបភ្លើងរលត់ទៅវិញ។ ប៉ុន្តែផ្ទះទាំងនោះ បានក្លាយទៅជាចំណីព្រះអគ្គិបាត់ទៅហើយ។
អ្វីដែលជាការបារម្ភថែមទៀតនោះ គឺនៅតំបន់នេះ សុទ្ធសឹងតែផ្ទះ ដែលសាងសង់ពីឈើ ស្ថិតនៅជាប់គ្នារដឹកតែម្ដង។ ប៉ុន្តែយ៉ាងណាក៏ដោយ នៅពេលមានគ្រោះអគ្គិភ័យកើតឡើង បងប្អូនប្រជាពលរដ្ឋ បានជួយគ្នាយ៉ាងសស្រាក់សស្រាំ ទើបគ្មានការឆេះរាលបន្តទៀតបាន ហើយក៏មិនមានគ្រោះថ្នាក់ដល់នរណាម្នាក់ដែរ៕ យន់ ស៊ីថា
ចែករំលែកព័តមាននេះ