រាជធានីភ្នំពេញ ៖ នៅសល់តែ១ថ្ងៃនេះទៀតទេ ខណៈថ្ងៃស្អែកទី១២ ខែមិថុនា រដ្ឋបាលខណ្ឌឬស្សីកែវ នឹងចុះអនុវត្តវិធានការរដ្ឋបាលរុះរើផ្ទះបណ្តែតទឹក បែចិញ្ចឹមត្រី ផ្ទះតូចៗ និងសំណង់មិនរៀបរយនៅលើផ្ទៃទឹកទន្លេនៅក្នុងមូលដ្ឋានរបស់ខ្លួន ខណៈពេល ដែលផ្ទះបណ្តែតទឹកទាំងនោះបាននឹងកំពុងតែរុះរើបានប្រមាណតែ៥៦ខ្នងក្នុងចំណោមផ្ទះបណ្តែតទឹកទាំងអស់ប្រមាណជាង៤០០ខ្នង ។ នេះបើតាមការអោយដឹងពីអាជ្ញាធរខណ្ឌឫស្សីកែវ ។ ទន្ទឹមនោះដែរ នៅព្រឹកថ្ងៃទី១១ ខែ មិថុនា នេះ គណៈបញ្ជាកាឯកភាព ខណ្ឌ ឬស្សីកែវ ក៍បានជួបប្រជុំបន្ទាន់ ក្នុងការចាត់ចែងរៀបចំកម្លាំង ដើម្បីអនុវត្តវិធានការរដ្ឋបាលនេះ អោយមានប្រសិទ្ធិភាពខ្ពស់។
អ្វីដែលមានការចាប់អារម្មណ៍នោះ គឺនៅព្រឹកថ្ងៃទី១១ ខែ មិថុនា ឆ្នាំ ២០២១ នេះដែរ គេសង្កេតឃើញជនជាតិអ៊ិស្លាមចំនួន៣នាក់ បាននាំគ្នាសែងម៉ាស៊ីនក្រឡុកចំណីត្រីមួយគ្រឿងឡើងច្រាំងយកទៅលក់អោយអេតចាយ បន្ទាប់ពីពួកគាត់បានបង្ខំចិត្តរុះរើបែចិញ្ចឹមត្រីរបស់ខ្លួន ដែលស្ថិតនៅលើផ្ទៃទឹកក្នុងភូមិក សង្កាត់ច្រាំងចំរេះទី២ ខណ្ឌឬស្សីកែវ រាជធានីភ្នំពេញ ។
លោក ណុះ ម៉ាត់សេត ភេទប្រុស អាយុ៤៥ឆ្នាំ ជាជនជាតិខ្មែរអ៊ិស្លាម បានអោយដឹងថា គាត់រកស៊ីចិញ្ចឹមត្រីតាំងពីក្រុមសាមគ្គី កំឡុងឆ្នាំ១៩៨០ ដោយផ្ទះរបស់គាត់នៅលើគោក ។ ដោយសារតែអាជ្ញាធរជូនដំណឹងអោយរុះរើ គាត់ក៏បានបង្ខំចិត្តរុះរើចេញតាមការណែនាំ ហើយយកម៉ាស៊ីនក្រឡុកចំណីត្រី ដែលទិញជាង៦០០ដុល្លារទៅលក់អោយអេតចាយ បានប្រមាណជាង១០ម៉ឺនរៀលប៉ុណ្ណោះ ដោយសារតែគ្មាននណាគេទិញ។
លោកបានបន្តអោយដឹងថា មួយជីវីតរបស់គាត់មកហើយ បានប្រកបមុខរបរនេសាទត្រី និងចិញ្ចឹមត្រីនៅក្នុងទន្ល តែពេលនោះ មិនដឹងថា រកមុខរបរអ្វីនោះទេ ។ នៅលើផ្ទៃទឹកទន្លេសាប មានខ្មែរអ៊ិស្លាម និងជនជាតិវៀតណាមបានប្រកបមុខរបរចិញ្ចឹមត្រីនិងស្នាក់នៅលើបែរតែម្តង។
តាមអាជ្ញាធរបានអោយដឹងថា ក្នុងមូលដ្ឋានខណ្ឌឬស្សីកែវ មានបែចិញ្ចឹមត្រី ផ្ទះបណ្តែតទឹក ទូកតូចៗ និងសំណង់មិនរៀបរយ លើផ្ទៃទន្លេចំនួន ជាង៤០០បែ,ខ្នង បន្ទាប់ពី អាជ្ញាធរបានជួនដំណឹងនិងចុះទៅផ្សព្វផ្សាយជាបន្តបន្ទាប់ តម្រូវ អោយ រុះរើចេញ ម្ចាស់បែចិញ្ចឹមត្រី ផ្ទះបណ្តែតទឹក ទូកតូចៗ និងសំណង់មិនរៀបរយបានរុះរើបានចំនួន៥៦បែឬខ្នង ដោយពុំបានគិតនៅថ្ងៃទី១១ខែមិថុនា ឆ្នាំ២០២១ ដែលជាថ្ងៃចុងក្រោយនោះ៕
ចែករំលែកព័តមាននេះ