បុរសម្នាក់ត្រូវបានសមត្ថកិច្ចការិយាល័យព្រហ្មទណ្ឌកម្រិតស្រាល នៃស្នងការដ្ឋានគរបាលខេត្តឧត្តរមានជ័យ បានធ្វើការឃាត់ខ្លួនភ្លាមៗ ខណៈពេលដែលបុរសរូបនេះបានធ្វើសកម្មភាព
ខេត្តឧត្តរមានជ័យ ៖ បុរសម្នាក់ត្រូវបានសមត្ថកិច្ចការិយាល័យព្រហ្មទណ្ឌកម្រិតស្រាល នៃស្នងការដ្ឋានគរបាលខេត្តឧត្តរមានជ័យ បានធ្វើការឃាត់ខ្លួនភ្លាមៗ ខណៈពេលដែលបុរសរូបនេះបានធ្វើសកម្មភាពលួចទូស័ព្ទក្នុងហាងលក់ទូស័ព្ទមួយកន្លែង នៅចំណុចផ្សារសំរោង កាលពីព្រឹកថ្ងៃទ៏១០ ខែមិថុនា ឆ្នាំ២០២១ ស្ថិតក្នុងភូមិសំរោង សង្កាត់សំរោង ក្រុងសំរោង ខេត្តឧត្តរមានជ័យ។
យោងតាមការឱ្យដឹងពីម្ចាស់ហាងលក់ទូស័ព្ទទំនើបដែលមានយីហោថា «ប៊ុនលិ» បានឱ្យដឹងថា មុនពេលកើតហេតុ មានបុរសម្នាក់នេះបានជិះម៉ូតូម៉ាកសង់កញ្ចាស់មួយគ្រឿង មកចតឈប់ពីមុខហាង ហើយក៏បានដើរចូលមកសួររកទិញថ្មទូស័ព្ទដៃ បន្ទាប់មកខ្លួន (ម្ចាស់ហាង) បានងាកទៅរកថ្ម ដើម្បីយកមកលក់ឱ្យជនសង្ស័យរូបនេះ លុះពេលងាកមកវិញ ក៏ស្រាប់តែបាត់បុរសរូបនេះតែម្តង ដល់ពេលមើលទៅក្នុងទូដែលដាក់ទូស័ព្ទ គឺបាត់ទូស័ព្ទអស់ចំនួន២គ្រឿង គឺម៉ាក VIVO ស៊េរីV20 ហើយភ្លាមៗនោះខ្លួន (ម្ចាស់ហាង) ក៏បានប្តឹងប៉ូលិស ដើម្បីឱ្យជួយធ្វើអត្តរាគមន៍ភ្លាមៗផងដែរ។
បើតាមប្រភពពីប៉ូលិសបានឱ្យដឹងថា បន្ទាប់ពីទទួលបានពាក្យបណ្តឹងរួច សមត្ថកិច្ចក៏បានស្រាវជ្រាវស្វែងរកចាប់ខ្លួនជនសង្ស័យ ហើយក៏បានជួបប្រទះឃើញបុរសរូបនេះដែលជាមុខសញ្ញាចាស់ឈ្មោះ និន សំណាង ភេទប្រុស អាយុ៣៦ឆ្នាំ មានស្រុកកំណើតនៅឯខេត្តកំពង់ចាម បច្ចុប្បន្នមករស់នៅក្នុងឃុំថ្លាត ស្រុកអន្លង់វែង ខេត្តឧត្តរមានជ័យ ។
ប្រភពដដែលបន្តថា បុរសខាងលើនេះ គឺជាមុខសញ្ញាចាស់ ហើយកាលពីថ្ងៃទី៩ ខែមិថុនា ឆ្នាំ២០២១ បុរសរូបនេះបានលួចទូស័ព្ទពីអ្នកលក់ទូស័ព្ទក្នុងហាងមួយកន្លែងនៅឯស្រុកចុងកាល់មួយលើករួចមកហើយ តែសមត្ថកិច្ចបានឃាត់ខ្លួនអប់រំ ហើយដោះលែងវិញ ។ ស្រាប់តែនៅថ្ងៃទី១០ ខែមិថុនានេះ បុរសរូបនេះមកធ្វើសកម្មភាពលួចដដែល សមត្ថកិច្ចក៏បានធ្វើការឃាត់ខ្លួន រួចក៏សាងសំណុំរឿងបញ្ជូនទៅតុលាការអមសាលាដំបូងខេត្តឧត្តរមានជ័យ ដើម្បីចាត់ការទៅតាមនីតិវិធីច្បាប់តែម្តង៕
ចែករំលែកព័តមាននេះ