រាជធានីភ្នំពេញ ៖ ជនសង្ស័យម្នាក់បានធ្វើសកម្មភាពលួចម៉ូតូ១គ្រឿង ជាកម្មសិទ្ធិរបស់មន្ត្រីក្រុមប្រឹក្សាខណ្ឌពោធិ៍សែនជ័យ ត្រូវបានចតទុកនៅមុខផ្ទះភ្លេចដកសោចេញ លុះលួចបានជិះចេញបម្រុងគេចខ្លួន តែត្រូវបានម្ចាស់ឃើញទាន់ស្ទុះលោតទៅចាប់ប្រតាយប្រតប់ និងចាប់ខ្លួនបាន រួចនាំទៅប្រគល់ជូននគរបាលដើម្បីចាត់ការតាមច្បាប់ ។
ហេតុការណ៍នោះ បានបង្កឲ្យមានការភ្ញាក់ផ្អើល កាលពីវេលាម៉ោង១១និង៣០នាទី ព្រឹកថ្ងៃទី១១ ខែមិថុនា ឆ្នាំ២០២១ នៅចំណុចផ្ទះជួលទល់មុខផ្សារពោធិ៍ចិនតុងភូមិប៉ប្រកខាងត្បូង សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ ។
ជនង្ស័យឈ្មោះ នៅ ប៉ុន អាយុ៤១ឆ្នាំ ស្នាក់នៅផ្ទះជួលម្ដុំក្រោយផ្សារដីហុយ សង្កាត់ភ្នំពេញថ្មី ខណ្ឌសែនសុខ ហើយនគរបាលបានដកហូតបានដែកចុងស្រួចចំនួន១ សម្រាប់ការឆ្គឹះសោបន្ទប់ នឹងទួនណាវីស ចុងស្រួចកែច្នៃសម្រាប់កាច់សោ.ក ម៉ូតូចំនួន១ដែលជនសង្ស័យបោះចោលនៅលើដី ។
ជនសង្ស័យរូបនេះ បានលួចម៉ូតូម៉ាកហុងដា ឌ្រីមសេ១២៥ស៊េរី ០១៤ ពណ៌ខ្មៅពាក់ស្លាកលេខភ្នំពេញ1CG-4748 ជាកម្មសិទ្ធរបស់បុរសម្នាក់ឈ្មោះ គឹមរស្មី អាយុ៤០ឆ្នាំ មុខរបរមន្ត្រីក្រុមប្រឹក្សាខណ្ឌពោធិ៍សែនជ័យ មានទីលំនៅនៅកន្លែងកើតហេតុ ។
តាមប្រភពព័ត៌មានបានឲ្យដឹងថា នៅមុនពេលកើតហេតុមន្ត្រីក្រុមប្រឹក្សាខណ្ឌពោធិ៍សែនជ័យរូបនោះ បានជិះម៉ូតូចេញពីធ្វើការត្រឡប់ទៅកាន់ផ្ទះជួលខាងលើ ដែលជាផ្ទះរបស់គាត់សង់សម្រាប់ជួល ។
លុះពេលទៅដល់គាត់បានទុកម៉ូតូនៅមុខផ្ទះ និងរៀបចំហូបបាយ ដោយភ្លេចដកសោចេញ ហើយក៏ឃើញជនសង្ស័យដើរចូលទៅក្នុងបរិវេណផ្ទះនោះដែរ ប៉ុន្តែគាត់ពុំចាប់អារម្មណ៍ ។ លុះបន្តិចក្រោយមកស្រាប់តែឃើញជនសង្ស័យជិះម៉ូតូគាត់ចេញទើបគាត់ស្ទុះលោតទៅចាប់ទាញកន្ទុយម៉ូតូ និងប្រវាយប្រតប់ជាមួយជនសង្ស័យ ទើបដណ្ដើមបានម៉ូតូមកវិញ ព្រមទាំងចាប់ខ្លួនជននេះប្រគល់ឲ្យនគរបាលប៉ុស្តិ៍កាកាបទី១ សាកសួរ និងកសាងសំណុំរឿងចាត់ការតាមច្បាប់តែម្ដង ៕
ចែករំលែកព័តមាននេះ