រាជធានីភ្នំពេញ ៖ នាព្រឹកថ្ងៃទី១០ ខែមិថុនា ឆ្នាំ ២០២១ កម្លាំងរបស់អាជ្ញាធខណ្ឌចំការមន ក្រោមការដឹកនាំរបស់លោក ហាយ សិទ្ធី ប្រធានការិយាល័យសេដ្ឋកិច្ច និងអភិវឌ្ឍន៍សហគមន៍ខណ្ឌ បានចុះណែនាំ និងផ្អាកអាជីវកម្មភោជនីយដ្ឋាន «ផាំ ឃីន» ជាបណ្តោះអាសន្ន ដែលមានទីតាំងស្ថិតនៅក្នុងកោះពេជ្រ សង្កាត់ទន្លេបាសាក់ ខណ្ឌចំការមន។
ក្រោយពីកើតមានករណីជម្លោះរវាងយុវជនក្រុមក្មេងស្ទាវ២ក្រុមវាយតប់គ្នាមក កាលពីយប់ថ្ងៃទី ០៩ ខែមិថុនា ឆ្នាំ ២០២១ កន្លងមកនេះ ហើយក៏មានសមត្ថកិច្ចចុះធ្វើការពិនិត្យឃើញថា មិនមានច្បាប់អនុញ្ញាតិ និងរក្សាគម្លាតទៅតាមការណែនាំរបស់ក្រសួងសុខាភិបាល និងសាលារាជធានីភ្នំពេញនោះទេ។
តាមប្រភពពីអាជ្ញាធរបានប្រាប់ឱ្យដឹងថា ដោយបានការអនុញ្ញាតពីលោក ថេង សុថុល អភិបាលនៃគណៈអភិបាលខណ្ឌចំការមន ក្រុមការងាររដ្ឋបាលខណ្ឌចំការមន ដឹកនាំដោយលោក ហាយ សិទ្ធី ប្រធានការិយាល័យសេដ្ឋកិច្ច និងអភិវឌ្ឍន៍សហគមន៍ខណ្ឌ បានចុះត្រួតពិនិត្យទីតាំងភោជនីយដ្ឋាន «ផាំ ឃីន» ដែលមានទីតាំងស្ថិតនៅលើទីក្រុងកោះពេជ្រ ក្នុងភូមិ១៤ សង្កាត់ទន្លេបាសាក់ ខណ្ឌចំការមន ដោយមានការចូលរួមពីលោកអនុប្រធានការិយាល័យសេដ្ឋកិច្ចខណ្ឌ, ប្រធានភូមិ១៤ សង្កាត់ទន្លេបាសាក់, ប៉ុស្ដិ៍នគរបាលសង្កាត់ទន្លេបាសាក់ និងម្ចាស់ភោជនីយដ្ឋានផងដែរ។
ក្រុមការងារក៏បានធ្វើការត្រួតពិនិត្យឃើញថា ភោជនីយន៍ដ្ឋានយីហោ «ផាំ ឃីន» ដែលមានទីតាំងក្នុងកោះពេជ្រខាងលើនេះ ពុំបានចូលរួមរក្សាគម្លាតតាមការណែនាំរបស់ក្រសួងសុខាភិបាល និងរដ្ឋបាលរាជធានីភ្នំពេញឡើយ ហើយក៏ពុំមានលិខិតអនុញ្ញាតពីស្ថាប័នពាក់ព័ន្ធដែរ។
តាមប្រភពដដែលបានបន្តទៀតថា ដោយបានឃើញដូចនេះ ក្រុមការងារក៏បានសម្រេចផ្អាកអាជីវកម្មជាបណ្ដោះអាសន្ន រង់ចាំរហូតដល់មានការជូនដំណឹងជាថ្មី និងត្រូវមានលិខិតអនុញ្ញាតពីស្ថាប័នពាក់ព័ន្ធឱ្យបានត្រឹមត្រូវ ទើបអាចបើកដំណើរឡើងវិញបាន។
គួរបញ្ជាក់ថា នៅក្នុងភោជន៍ដ្ឋានយីហោ «ផាំ ឃីន» ដែលមានទីតាំងនៅក្នុងកោះពេជ្រនេះដែរ កាលពីយប់ថ្ងៃទី 0៩ ខែមិថុនា ឆ្នាំ២០២១ កន្លងមកនេះ មានយុវជនក្រុមក្មេងស្ទាវចំនួន២ក្រុម បាននាំគ្នាចូលមកផឹកស៊ី ហើយគ្រាន់តែសម្លឹងមើលមុខគ្នាទៅវិញទៅមកក៏កើតជាជម្លោះហិ.ង្សាវាយតប់គ្នាផ្អើលទាំងយប់ផងដែរ។ លុះដល់ព្រឹកឡើង ទើបកម្លាំងអាជ្ញាធរខណ្ឌចំការមន ចុះទៅធ្វើការត្រួតពិនិត្យ និងផ្អាកអាជីវកម្មបណ្តោះអាសន្នតែម្តង និងរង់ចាំមានប័ណ្ណអនុញ្ញាតពីស្ថាប័នពាក់ព័ន្ធត្រឹមត្រូវ ទើបបើកដំណើរការឡើងវិញបាន។
គួរបញ្ជាក់ទៀតថា ៖ យុវជន២ក្រុមនាំគ្នាចូលហាងផឹកស៊ីបានមួយសន្ទុះ ផ្អើលកោះពេជ្រ ៕
ចែករំលែកព័តមាននេះ