រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសម្នាក់សង្ស័យប្រើប្រាស់គ្រឿង.ញៀនលើសកម្រិត បានដោះអាវ ស្លៀកតែខោខ្លី រួចរត់សំដៅចូលក្នុងមន្ទីរពេទ្យសង់ត្រាល់ បង្កការអុកឡុកក្នុងមន្ទីរពេទ្យ រួចហើយវាទៅលើសមត្ថកិច្ចម្នាក់ បណ្តាលអោយរងរបួសផ្អើលពេញម្តុំផ្សារសូរិយាម៉ល កាលពីវេលាម៉ោង១២និង៣០នាទីរំលងអធ្រាត្រឈានចូលថ្ងៃទី១១ ខែមិថុនា ឆ្នាំ២០២១ តាមបណ្តោយផ្លូវលេខ១៥៤ កែងនឹងផ្លូវ៥៣ នៅចំណុចមន្ទីរពេទ្យសង់ត្រាល់ ស្ថិតនៅក្នុងសង្កាត់ផ្សារថ្មី៣ ខណ្ឌដូនពេញ ។
តាមប្រភពព័ត៌មានពីបុគ្គលិកដែលធ្វើការនៅក្នុងមន្ទីរពេទ្យសង់ត្រាល់ បានអោយដឹងថា មុនពេលកើតហេតុខាងលើនេះ គឺគេបានឃើញបុរសម្នាក់មិនស្គាល់អត្តសញ្ញាណនោះទេ បានដោះអាវ ស្លៀកតែខោខ្លី ហើយក៏មិនដឹងថាតើគាត់មាននៅផ្ទះជិតនឹង ឬមួយក៏មកពីណានោះទេ? ដោយបានរត់ដេញវាយគេ និងយកដុំថ្មទៅគប់ផ្អើលពេញផ្លូវ៦៣ កែងផ្លូវ១៥៤ រួចហើយក៏រត់ចូលទៅក្នុងមន្ទីរពេទ្យសង់ត្រាល់តែម្តង បង្កការអុកឡុកគេឯងនៅក្នុងនោះ ។ ប៉ុន្តែភ្លាមៗនោះដែរ ក៏មានបុគ្គលិកនៅក្នុងមន្ទីរពេទ្យនោះ បាននាំគ្នាឃាត់ និងធ្វើការយកខ្សែទៅចងដៃចងជើង ដើម្បីកុំឱ្យបុរសរូបនោះរត់ និងអុកឡុកគេឯងទៀត។
ចំណែកបុរសបង្កការអុកឡុកខាងលើ ដែលត្រូវគេសង្ស័យថាជាមនុស្សបែកថ្នាំនោះ បាននិយាយថា រូបគេមិនមែនចង់រករឿងគេឯងនោះទេ គឺរូបគេរត់ចូលទៅ ដើម្បីរកមើលបងប្អូនគាត់នៅក្នុងមន្ទីរពេទ្យ លុះបានមួយសន្ទុះក្រោយមក និយាយគ្នាមិនដឹងរឿងរ៉ាវអីនោះទេ ។
ប៉ុន្តែពេលសមត្ថកិច្ចមូលដ្ឋានមកដល់ឃាត់ខ្លួន បែរជាបុរសខាងលើ វាយទៅលើសមត្ថកិច្ចថែមទៀត សំណាងល្អហើយដែលមិនមានរងរបួសអីធ្ងន់ធ្ងរ គ្រាន់តែហើមមុខមួយជំហៀងតែប៉ុណ្ណោះ ។ ក្រោយពេលកើតហេតុខាងលើនេះ សមត្ថកិច្ចមូលដ្ឋានក៏បានធ្វើការឃាត់ខ្លួនបុរសរូបនោះ ទៅកាន់ប៉ុស្តិ៍រដ្ឋបាលនគរបាលផ្សារថ្មី៣ ដើម្បីចាត់ការទៅតាមនីតិវិធី ៕
ចែករំលែកព័តមាននេះ