ខេត្តស្វាយរៀង៖ ការឆ្លងជំងឺកូវីដ១៩ ទៅសហគមន៍នៅមិនទាន់ថមថយ ដោយខ្វះការចូលរួមពីកម្មករនិយោជិតមួយចំនួន
- ស្វាយរៀង
ខេត្តស្វាយរៀង ៖ លោកវេជ្ជបណ្ឌិត កែរ រដ្ឋា ប្រធានមន្ទីសុខាភិបាលខេត្តស្វាយរៀង នៅរសៀល ថ្ងៃទី១០ ខែមិថុនា ឆ្នាំ២០២១នេះ…
ខេត្តស្វាយរៀង ៖ លោកវេជ្ជបណ្ឌិត កែរ រដ្ឋា ប្រធានមន្ទីសុខាភិបាលខេត្តស្វាយរៀង នៅរសៀល ថ្ងៃទី១០ ខែមិថុនា ឆ្នាំ២០២១នេះ បានថ្លែងប្រាប់ក្រុមអ្នកសារព័ត៌មានដឹងថា ៖ ស្ថានភាពជំងឺកូវីដ-១៩ នៅខេត្តស្វាយរៀង នាបច្ចុប្បន្ននេះមិនទាន់ថមថយនៅឡើយនោះទេ ខណៈដែលក្រុមការងារនៅតែបន្តរកឃើញអ្នកវិជ្ជមានជំងឺកូវីដ១៩ នៅក្នុងសហគមន៍ និងនៅតាមរោងចក្រ ។
លោកវេជ្ជបណ្ឌិត មានប្រសាសន៍ទៀតថា មន្ទីរសុខាភិបាលខេត្តបានសហការជាមួយអាជ្ញាធរខេត្ត និងភាគីពាក់ព័ន្ធទប់ស្កាត់ ប្រយុទ្ធប្រឆាំងនឹងជំងឺកូវីដ-១៩ បំបាត់ឱ្យអស់ចេញពីខេត្តស្វាយរៀង ។
លោកវេជ្ជបណ្ឌិតបានបន្ថែមទៀតថា ៖ ជំងឺកូវីដ-១៩ នៅសហគមន៍ និងរោងចក្រសហគ្រាសមិនទាន់បានថមថយនោះទេ មូលហេតុ៖ ទី១.ក្រុមកម្មករកម្មការិនីរោងចក្រមួយចំនួនមិនព្រមយកសំណាកនៅតាមរោងចក្រ និងមិនព្រមធ្វើចត្តាឡីស័ក នៅក្នុងរោងចក្រ ពួកគាត់ទៅផ្ទះចម្លងជំងឺកូវីដ-១៩ ចូលក្នុងសហគមន៍ ។ ទី២.មិនរក្សាគម្លាតក្នុងពេលធ្វើដំណើរទៅរោងចក្រ សហគ្រាស ដោយមានការប្រមូលផ្ដុំគ្នាជិះរថយន្តរួមគ្នាច្រើន ។ ទី៣.ពលករមួយចំនួនត្រឡប់មកពីប្រទេសថៃយកជំងឺកូវីដ-១៩ មកជាមួយ និងទី៤.ការមិនគោរពតាមវិធានការសុខាភិបាល និងវិធានការ៣ការពារ ៣កុំ របស់សម្តេចតេជោ ហ៊ុន សែន ។ល ។
លោកវេជ្ជបណ្ឌិត ផ្តល់របាយការណ៍ថា នៅក្នុងព្រឹតិ្តការណ៍សហគមន៍ ២០ កុម្ភ: ខេត្តស្វាយរៀងមានប្រជាពលរដ្ឋខ្មែរ និងជនបរទេសគិតត្រឹមថ្ងៃទី៩ ខែមិថុនា ឆ្នាំ២០២១ បានឆ្លងជំងឺកូវីដ-១៩ មានចំនួន ១,១៧៤នាក់ ស្រីចំនួន៦៧៦នាក់ ស្លាប់ចំនួន០៧នាក់ ស្រី០២នាក់ ព្យាបាលជាសះស្បើយចំនួន៧៣៦នាក់ ស្រី ៤១០នាក់ និងកំពុងធ្វើការព្យាបាលចំនួន៤៣០នាក់ ស្រី២៦៤នាក់ ។
រកឃើញអ្នកវិជ្ជមានកូវីដ១៩ថ្មី ចំនួន២៨នាក់ ស្រី១៤នាក់ ករណីជាសះស្បើយថ្មី៧៤នាក់ ស្រី៥៨នាក់ ៕
ចែករំលែកព័តមាននេះ