រាជធានីភ្នំពេញ៖អស់រយៈពេលជិត៦ខែបន្ទាប់ពីទទួលបានតំណក់ប្រេងដំបូងកាលពីថ្ងៃទី២៩ធ្នូ ២០២០រហូតមកទល់និងពេលនេះកម្ពុជាបានរៀបចំពិធីជាប្រវត្តិសាស្ត្រដោយយកតំណក់ប្រេងដំបូងរបស់ខ្លួនមកដាក់តម្កល់រក្សាទុកនៅវិមានឈ្នះឈ្នះនៅថ្ងៃទី៩ មិថុនា២០២១នេះ ស្របពេលគម្រោងនៃការនាំចេញប្រេងឆៅរបស់ក្រុមហ៊ុនKrisEnergy ត្រូវបានពន្យាពេលឬស្ថិតក្នុងភាពស្រពិចស្រពិលនៅឡើយពុំទាន់មានការបញ្ជាក់ពីមន្ត្រីជំនាញណាមួយថាក្រុមហ៊ុនអាចនាំចេញជាផ្លូវការនៅខែណានោះទេ ខណៈពេលកន្លងមកមានការអះអាងថាក្រុមហ៊ុននិងធ្វើនាំចេញក្នុងកំឡុងពេលខែឧសភាឆ្នាំ២០២១កន្លងទៅនេះ។
ពាក់ព័ន្ធនិងគម្រោងនាំចេញប្រេងដំបូងរបស់កម្ពុជា បើតាម ឯកឧត្តម ជៀប សួរ អគ្គនាយកនៃអគ្គនាយកដ្ឋានប្រេងកាត ក្រសួងរ៉ែ និងថាពលធ្លាប់មានប្រសាសន៍ថា ក្នុងខែឧសភា នេះ ក្រុមហ៊ុន KrisEnergyជាក្រុមហ៊ុនរុករក និងបូមប្រេងរបស់ប្រទេសសិង្ហបុរី នៅកម្ពុជា នឹងនាំចេញប្រេងរបស់កម្ពុជា ទៅលក់នៅលើទីផ្សារអន្តរជាតិ ស្ថិតក្នុងដំណាក់កាលដំបូងនេះ ក្រុមហ៊ុនអាចនឹងនាំចេញប្រេងឆៅ ក្នុងបរិមាណពី ២៧៥ ពាន់បារ៉ែល ទៅ ៣០០ ពាន់បារ៉ែល។
ឯកឧត្តមលើកឡើងថា បច្ចុប្បន្នក្រសួងកំពុងពិនិត្យជាមួយក្រុមហ៊ុនអំពីការស្នើរសុំទិញប្រេងលើកទី១ ពីកម្ពុជា ក្នុងនោះនៅពេលក្រសួងសម្រេចលើសំណើរណាមួយ យើងនឹងអាចដឹងថា ប្រេងនេះនាំចេញទៅកាន់ណា និងការនាំយកទៅស្តុកទុកដាក់កន្លែងណាមួយ។តែសម្រាប់ជំហាននៃការនាំចេញប្រេងបន្ទាប់ ក្រសួងមិនទាន់ធ្វើការកំណត់ទៅតាមទិសដៅនាំចេញបាននៅឡើយ ដោយអាស្រ័យលើការផលិតជាក់ស្តែង នឹងការស្វែងរកទីផ្សារថ្មីៗបន្ថែមទៀត ។
ថ្លែងក្នុងពិធីប្រគល់ទទួលកែវដំណក់ប្រេងដំបូងនៅវិមានឈ្នះឈ្នះ ឯកឧត្តម ស៊ុយ សែម រដ្ឋមន្ត្រីក្រសួងរ៉ែនិងថាមពល មានប្រសាសន៍ថា« តំណក់ប្រេងដំបូងដែលកម្ពុជាទទួលបានកាលពីថ្ងៃទី២៩ ធ្នូឆ្នាំ២០២០គឺជាសមិទ្ធផលប្រវត្តសាស្ត្រហើយក៏ជានិមិត្តរូបនៃភាពជោគជ័យរបស់កម្ពុជាទាំងមូល ដែលយើងខ្ញុំព្រមទាំងប្រជាពលរដេ្ឋទូទាំងប្រទេសបានទន្ទឹងរងចាំជាច្រើនជំនាន់មកហើយ»។
ឯកឧត្តម រដ្ឋមន្ត្រីបន្តថា កែវតំណក់ប្រេងដំបូងនេះ គឺជានិមិត្តរូបនៃធនធានប្រេងកាតរបស់ព្រះរាជាណាចក្រកម្ពុជាដែលត្រូវបានរៀបចំឡើងតាមរចនាបទខ្មែរ ដែលបង្គាប់អត្ថន័យ៖១)- កែវដំណក់ប្រេងមានទម្រង់ក្រពុំឈូក ឬស្លឹកពោធិតំណាងឱ្យភាពរុងរឿង បរិសុទ្ធ ការច្រើនលូតលាស់ដេលជាកំណប់ទ្រព្យរបស់កម្ពុជា។កែវដំណក់ប្រេងមានកម្ពស់២៩សង់ទីម៉ែត្រ តំណាងឱ្យថ្ងៃទី២៩ ដែលទទួលបានដំណក់ប្រេងដំបូងរបស់កម្ពុជា។ ២)-ជើងពានត្របកឈូក តំណាងឱ្យសេចក្តីខិតខំប្រឹងប្រែងរបស់ថ្នាក់ដឹកនាំរហូតដល់ទទួលបានលទ្ធផលផ្លែផ្កា គឺការទទួលបាននូវធនធានប្រេងកាតសម្រាប់អភិវឌ្ឍជាតិមាតុភូមិកម្ពុជា។ជើងពានត្របកឈូកមានកម្ពស់១២សង់ទីម៉ែត្រ តំណាងឱ្យខែ១២ឬខែធ្នូ ដែលទទួលបានដំណក់ប្រេងដំបូងរបស់កម្ពុជា ។៣)- ពានជើងសឹង្ហ និងឋានជើងបាតតំណាងឱ្យការជ្រោមជ្រែងរបស់ប្រជាជនកម្ពុជា និងមន្ត្រីរាជការដែលជាសេនាធិការរបស់រាជរដ្ឋាភិបាលនិងមន្ត្រីពាក់ព័ន្ធនានាក្នុងការខិតខំប្រឹងប្រែងធ្វើការងារទាញយកភោគផលនៃធនធានធម្មជាតិដើម្បីយកមកអភិវឌ្ឍជាតិ។
ពានជើងសឹង្ហនិងឋានជើងបាតមានកម្ពស់២០សង់ទីម៉ែត្រតំណាងឱ្យឆ្នាំ២០២០ ដែលទទួលបានដំណក់ប្រេងដំបូងរបស់កម្ពុជា។៤)- ក្បាច់កញ្ចាំងភ្ញីភ្លើង លម្អដោយនាគក្បាលបី តំណាងឱ្យតេជៈ ភាពចម្រុងចម្រើន សម្បូរសប្បាយនិងតំណាងឱ្យឆ្នាំរបស់សម្តេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា ជាសម័យកាលដេលទទួលបាននូវដំណក់ប្រេងដំបូងរបស់កម្ពុជា។៥)-និមិត្តរូបរួមនៃដំណក់ប្រេងដំបូងរបស់កម្ពុជាត្រូវបានប្រសិទ្ធនាមថា បឋមតេលពិន្ទុកម្ពុជា(ដំណក់ប្រេងដំបូងរបស់កម្ពុជា)៕
ចែករំលែកព័តមាននេះ