រាជធានីភ្នំពេញ ៖ រដ្ឋបាលខេត្តកំពត បានកំណត់ជ្រើសរើសទីតាំងរដ្ឋបាលក្រុងថ្មីក្រុងបូកគោនៅប៉ុស្តិ៍ត្រួតពិនិត្យ ចូលរមណីយដ្ឋានភ្នំបូកគោពន្ទាប់ពីក្រុងថ្មីនេះ ត្រូវបានរាជរដ្ឋាភិបាលដាក់ដំណើរការជាផ្លូវការកាលពីពេលថ្មីៗកន្លងទៅនេះ ។ ការលេចចេញនូវទីតាំងអគាររដ្ឋបាលសម្រាប់បំពេញការងាររបស់ក្រុងបូកគោ នឹងជំរុញបន្ថែមទៀតនូវសក្ដានុពលវិនិយោគក្នុងវិស័យអចលនទ្រព្យក្នុងខេត្តកំពតទាំងមូលផងដែរ ។
យោងតាមសេចក្ដីប្រកាសព័ត៌មានរបស់រដ្ឋបាលខេត្តកំពតបានឱ្យដឹងថា ក្រោយពេលកិច្ចប្រជុំពិភាក្សាដើម្បីកំណត់ទីតាំងរួច ក្រុមការងារបានសម្រេចកំណ់តយកទីតាំងសាងសង់អគាររដ្ឋបាលក្រុងថ្មី ក្រុងបូកគោនៅប៉ុស្តិ៍ត្រួតពិនិត្យផ្លូវឡើងរមណីដ្ឋានបូកគោ ក្នុងឃុំបឹងទូក ស្រុកទឹកឈូ ខេត្តកំពត ដែលផ្ដល់ជូនដោយក្រុមហ៊ុន Sokha Hotel ។
អ្នកជំនាញនៃវិស័យអចលនវត្ថុកម្ពុជា និងភ្នាក់ងារអចលនទ្រព្យប្រចាំខេត្តកំពតផ្ទាល់តែម្ដងបានបង្ហាញនូវសុដ្ឋិនិយមចំពោះការលេចចេញជារូបរាងនៃរដ្ឋបាលក្រុងថ្មីមួយនេះ ដោយនឹងជំរុញឱ្យមានការវិនិយោគបន្ថែមទៀតនៅពេលខាងមុខនេះ ។
លោកជិន ណារិន ភ្នាក់ងារអចលនទ្រព្យមួយរូបប្រចាំខេត្តកំពតបានឱ្យដឹងថា សក្ដានុពលវិស័យអចលនទ្រព្យនៅក្នុងខេត្តកំពត ត្រូវបានមើលឃើញថាមានការចាប់អារម្មណ៍ ពីសំណាក់វិនិយោគិនក្នុងនិងក្រៅប្រទេសជាបន្តបន្ទាប់ ជាពិសេសក្នុងបរិបទកូវីដ១៩នេះ វិនិយោគិនក្នុងស្រុកមានសន្ទុះក្នុងការវិនិយោគជាងវិនិយោគិនមកពីក្រៅប្រទេស ។
លោកបន្តថា ក្រោយពេលរដ្ឋាភិបាលប្រកាសបង្កើតក្រុងមួយទៀតនៅកំពតគឺក្រុងបូកគោ បានធ្វើឱ្យឱកាសនៃការវិនិយោគក្នុងតំបន់មាត់ឆ្នេរនេះ កាន់តែសក្ដានុពលនិងទាក់ទាញដល់ការវិនិយោគបន្ថែមទៀត ។ ជាក់ស្ដែង វិនិយោគិនក្នុងស្រុកជាច្រើនបានចាប់ផ្ដើមស្វែងរកដីធ្លីសម្រាប់អភិវឌ្ឍន៍នៅពេលអនាគត ជាពិសេសអភិវឌ្ឍន៍ជាតំបន់លំហែកាយនៅក្នុងក្រុងថ្មីនៃខេត្តកំពត ។
លោកកែវ សុជាតិប្រធានក្រុមហ៊ុន Kw Cambodia ប្រចាំខេត្តកំពតក៏បានឱ្យដឹងដែរថា ជាការពិតណាស់ក្រោយពេលអនុក្រឹត្យស្ដីពីការបង្កើតក្រុងថ្មីត្រូវបានប្រកាសជាសាធារណៈ ធ្វើឱ្យវិនិយោគិនកាន់តែចាប់អារម្មណ៍លើការវិនិយោគក្នុងក្រុងថ្មីនេះ ហើយជាពិសេសនោះនៅពេលរដ្ឋបាលក្រុងថ្មីនេះ ត្រូវបានគេដឹងទីតាំងច្បាស់ទៀត ជាមួយនឹងការអភិវឌ្ឍហេដ្ឋារចនាសម្ព័ន្ធក្នុងក្រុងថ្មីនេះ នឹងជំរុញឱ្យវិនិយោគិនកាន់តែមានទំនុកចិត្តក្នុងការបណ្ដាក់ទុនវិនិយោគលើទឹកដីនៃតំបន់ឆ្នេរមួយនេះ ។
បើតាមលោកច្រឹក សុខនីមប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា បានលើកឡើងថា អនាគត កំពតនឹងក្លាយជាតំបន់លំហែកាយដ៏មានសក្ដានុពល ព្រោះកំពតមានរមណីយដ្ឋានជាច្រើនសម្រាប់ពលរដ្ឋទៅសម្រាកកម្សាន្ត ដូចជាឆ្នេរ ព្រែក ជ្រោះនិងភ្នំជាដើម ។ ម្យ៉ាងទៀតហេដ្ឋាចនាសម្ព័ន្ធផ្លូវពីភ្នំពេញទៅកាន់ខេត្តកំពតក៏កាន់តែងាយស្រួលក្នុងការធ្វើដំណើរ និងចំណាយពេលខ្លី ដូច្នេះទេសចរ និងអ្នកវិនិយោគិននៅភ្នំពេញ អាចធ្វើដំណើរវិលល្ងាចត្រលប់ទៅភ្នំពេញវិញបានស្រួលទៀតផង ៕
ចែករំលែកព័តមាននេះ