បើតាមសេចក្តីរាយការណ៍បានឱ្យដឹងថា មានមនុស្សប្រុស-ស្រី២នាក់បានរងរបួសធ្ងន់ធ្ងរ ដោយសារតែអណ្តាតភ្លើងឆាបឆេះការ៉ាស់សាំងមួយកន្លែង បង្កឱ្យមានការភ្ញាក់ផ្អើលកាលពីវេលាម៉ោង១២និង៣០នាទីរសៀល ថ្ងៃទី
ខេត្តឧត្តរមានជ័យ ៖ បើតាមសេចក្តីរាយការណ៍បានឱ្យដឹងថា មានមនុស្សប្រុស-ស្រី២នាក់បានរងរបួសធ្ងន់ធ្ងរ ដោយសារតែអណ្តាតភ្លើងឆាបឆេះការ៉ាស់សាំងមួយកន្លែង បង្កឱ្យមានការភ្ញាក់ផ្អើលកាលពីវេលាម៉ោង១២និង៣០នាទីរសៀល ថ្ងៃទី៦ ខែមិថុនា ឆ្នាំ២០២១ នៅតាមបណ្តោយផ្លូវជាតិលេខ២៦ ស្ថិតក្នុងភូមិថ្នល់កែង ឃុំអន្លង់វែង ស្រុកអន្លង់វែង ខេត្តឧត្តរមានជ័យ។
បើតាមលោកវរសេនីយ៍ទោ ងួន ទ្ធីរិទ្ធ មេបញ្ជាអាវុធហត្ថស្រុកអន្លង់វែង បានប្រាប់ឱ្យដឹងថា ម្ចាស់ការ៉ាស់សាំងខាងលើមានឈ្មោះ ពេជ្រ តុន ភេទប្រុស អាយុ៤២ឆ្នាំ មុខរបរជាយោធា រស់នៅក្នុងភូមិ-ឃុំកើតហេតុខាងលើ ចំណែកអ្នកទទួលរងរបួសឈ្មោះ សំ កុសល ភេទប្រុស អាយុ២៦ឆ្នាំ រស់នៅភូមិអូរជញ្ជៀន ឃុំអន្លង់វែង ស្រុកអន្លង់វែង ខេត្តឧត្តរមានជ័យ មុខរបរតៃកុងរថយន្តដឹកសាំង (រងរបួសធ្ងន់ត្រង់ដងខ្លួន) និងម្នាក់ទៀតឈ្មោះ ឈាន ថានុង ភេទស្រី អាយុ១៥ឆ្នាំ ជាកម្មករចាក់សាំង រស់នៅភូមិថ្នល់បំបែក ឃុំអន្លង់វែង ស្រុកអន្លង់វែង ខេត្តឧត្តរមានជ័យ (រងរបួសធ្ងន់ឆេះពេញខ្លួន) ហើយក៏ត្រូវបាននាំយកទៅសង្គ្រោះនៅក្នុងមន្ទីរពេទ្យបង្អែកស្រុកអន្លង់វែងផងដែរ។
លោកវរសេនីយ៍ទោ ដដែលបានបញ្ជាក់ថា ចំពោះមូលហេតុនៃការគ្រោះថ្នាក់ដោយអគ្គិភ័យនេះ គឺបណ្តាលមកពីទុស្សេខ្សែភ្លើង ខណៈពេលដែលកំពុងតែបង្ហូរសាំងចេញពីរថយន្តចូលទៅក្នុងស៊ីទែនស្តុកសាំង បណ្តាលឱ្យឆាបឆេះបង្កឱ្យមានការភ្ញាក់ផ្អើលតែម្តង។ ហើយនៅក្នុងហេតុការណ៍នេះ លោក ហោ ជិនវរៈយុទ្ធ អភិបាលស្រុកអន្លង់វែង លោកស៊ីម វណ្ណៈ អធិការស្រុកអន្លង់វែង រួមជាមួយរូបលោកផ្ទាល់បានដឹកនាំកងកម្លាំងជាច្រើននាក់ចុះអន្តរាគមន៍ ដោយមានរថយន្តពន្លត់អគ្គិភ័យចំនួនមួយគ្រឿង និងបាញ់ទឹកពន្លត់អស់ចំនួន៣រថយន្ត ទើបធ្វើឱ្យអណ្តាតភ្លើងនោះរលត់ទៅវិញ តែទោះជាបែបណា ក្នុងហេតុការណ៍អគ្គិភ័យខាងលើ បានធ្វើឱ្យខូចខាតទ្រព្យសម្បត្តិអស់មួយចំនួនផងដែរនេះ ៕
ចែករំលែកព័តមាននេះ