ខេត្តកំពត ៖ ក្របីឈ្មោលមួយក្បាលនេះ ពិតជាកាចសាហាវណាស់ដោយបានជល់ដូនចាស់ម្នាក់ បណ្តាលឱ្យរងរបួសយ៉ាងធ្ងន់ធ្ងរ កើតឡើងកាលពីវេលាម៉ោង០៩និង៣០នាទីព្រឹកថ្ងៃទី០៦ មិថុនា ស្ថិតនៅជិតស្រែរបស់ជនរងគ្រោះក្នុងភូមិកណ្ដាលទួល ឃុំកំពង់ត្រាចខាងលិច ស្រុកកំពង់ត្រាច ខេត្តកំពត ។ ស្ត្រីចំណាស់រងគ្រោះឈ្មោះស៊ង ស៊ីវ អាយុ73ឆាំ្ន នៅភូមិកណ្ដាលទួល ឃុំកំពង់ត្រាចខាងលិច ស្រុកកំពង់ត្រាចខេត្តកំពត ត្រូវសត្វក្របីឈ្មោលជល់ចំនួនពីរដងបណ្ដាលអោយរងរបួសធ្ងន់ធ្ងរ ។
តាមការអោយដឹងពីកូនស្រីស្ត្រីរងគ្រោះបានឱ្យដឹងថា ម្ដាយរបស់គាត់បានចេញពីផ្ទះទៅដកស្មៅនៅក្នុងស្រូវពង្រោះ តែពេលកំពុងដកស្មៅមិនបានដឹងក្របីមួយក្បាលនោះ ចេញមកពីណាទេ ស្រាប់តែមកជល់ម្ដាយគាត់អោយដួលហើយក្របីនោះបានបន្តជល់បន្ថែមទៀត រហូតដល់ដួលសន្លប់តែម្តង ។ ក្រោយមក ត្រូវកូនៗឃើញក៏ទៅជួយម្ដាយយកគាត់មកកាន់មន្ទីរពេទ្យ។ ចំណែកសត្វក្របីបង្កគ្រោះថ្នាក់ត្រូវបានគេបង្ហោះតាមបណ្ដាញសង្គមហើយក៏បានដឹងដំណឹងនេះ ទៅដល់ម្ចាស់ទើបមកទំនាក់ទំនងអាជ្ញាធរមូលដ្ឋានឃុំកំពង់ត្រាចតែម្តង ។
បើតាមការអោយដឹងពីម្ចាស់ក្របីឈ្មោះហែម ហេន អាយុ៤៣ឆាំ្ន នៅភូមិត្រពាំងបី ឃុំត្រពាំងបី ស្រុកឈូក ខេត្តកំពត បាននិយាយប្រាប់អោយដឹងថា ក្របីមួយក្បាលនេះ គាត់ទិញតាំងពីខេត្តកោះកុង តែគ្រាន់ដឹកមកដល់ផ្ទះ ក្របីបានរត់បាត់រហូត ។ បើគិតទៅបាត់រយៈពេលមួយខែហើយ ទើបដឹងដំណឹងនៅព្រឹកថ្ងៃទី៦ មិថុនា នេះ តាមរយះគេបង្ហោះក្របីជល់មនុស្ស។ ម្ចាស់ក្របីរូបនេះសុំអាជ្ញាធរមូលដ្ឋានដឹកក្របីទៅផ្ទះវិញព្រោះក្របីមួយក្បាលនេះទិញតម្លៃ4លានរៀលនិងមានការសំណងជួយក្នុងការព្យាបាលស្ត្រីរងគ្រោះចំនួន១លានរៀល ដើម្បីបញ្ចប់រឿង។
ចែករំលែកព័តមាននេះ