ខេត្តកំពង់ធំ ៖ មនុស្ស២នាក់បានស្លា.ប់ និងម្នាក់រងរបួសធ្ងន់ ដោយសារគ្រោះថ្នាក់ចរាចរណ៍រវាងរថយន្តច្នៃ និងម៉ូតូហុងដា សេ១២៥ នៅតាមបណ្ដោយផ្លូវជាតិលេខ៧១ ស្ថិតក្នុងភូមិព្រៃស្រង៉ៃ ឃុំបល្ល័ង្ក ស្រុកបារាយណ៍ ខេត្តកំពង់ធំ
ខេត្តកំពង់ធំ ៖ មនុស្ស២នាក់បានស្លាប់ និងម្នាក់រងរបួសធ្ងន់ ដោយសារគ្រោះថ្នាក់ចរាចរណ៍រវាងរថយន្តច្នៃ និងម៉ូតូហុងដា សេ១២៥ នៅតាមបណ្ដោយផ្លូវជាតិលេខ៧១ ស្ថិតក្នុងភូមិព្រៃស្រង៉ៃ ឃុំបល្ល័ង្ក ស្រុកបារាយណ៍ ខេត្តកំពង់ធំ កាលពីវេលាម៉ោង១២ និង៤០នាទីថ្ងៃត្រង់ ថ្ងៃទី១២ វិច្ឆិកា ២០១៥ ។
លោក ហេង ឈុនហ៊ី នាយប៉ុស្តិ៍នគរបាលរដ្ឋបាលបល្ល័ង្ក បានឲ្យដឹងថា ជនរងគ្រោះទាំង៣នាក់មាន ១-ឈ្មោះ ជុំ ម៉ោង ភេទប្រុស អាយុ៤២ឆ្នាំ នៅភូមិត្រស់ ឃុំបល្ល័ង្ក មុខរបរអ្នករត់ម៉ូតូឌុប និងជាអ្នកបើកម៉ូតូ (ស្លាប់នៅមន្ទីរពេទ្យ), ២-ឈ្មោះ លឹម សុង ភេទស្រី អាយុ៦២ឆ្នាំ រស់នៅភូមិពង្រលីង ឃុំក្រវ៉ា (ស្លាប់នៅកន្លែងកើតហេតុ) និង ៣-ឈ្មោះ ឌុក ខេន ភេទស្រី អាយុ៣៥ឆ្នាំ នៅភូមិពង្រលីង ឃុំក្រវ៉ា (របួសធ្ងន់) ត្រូវបានដឹកទៅសង្គ្រោះនៅមន្ទីរពេទ្យស្រុកបារាយណ៍ ។
លោក ហេង ឈុនហ៊ី បន្តទៀតថា ចំណែកអ្នកបើកបររថយន្តច្នៃឈ្មោះ ជិន ចំរើន ភេទប្រុស អាយុ២៥ឆ្នាំ រស់នៅភូមិស្រឡៅតូង ឃុំបល្ល័ង្ក បានមកជួលកន្លែងជួសជុលរថយន្តនៅភូមិព្រៃស្រង៉ែ ឃុំបល្ល័ង្ក បានបើករថយន្តគេចខ្លួនបាត់ក្រោយពីកើតហេតុភ្លាមៗ ។
ក្រោយពេលកើតហេតុ សមត្ថកិច្ចបានធ្វើការវាស់វែង និងយកម៉ូតូរងគ្រោះទៅរក្សាទុកនៅប៉ុស្តិ៍នគរបាលរដ្ឋបាលបល្ល័ង្កដើម្បីរង់ចាំដោះស្រាយតាមច្បាប់ រីឯជនបង្កសមត្ថកិច្ចកំពុងធ្វើការតាមចាប់ខ្លួនយកមកដាក់ទោសតាមច្បាប់ ចំណែកសពជនរងគ្រោះប្រគល់ទៅឲ្យសាច់ញាតិយកទៅធ្វើបុណ្យតាមប្រពៃណី ៕
ចែករំលែកព័តមាននេះ