រាជធានីភ្នំពេញ៖ យោងតាមរបាយការណ៍អំពីការនាំចេញនាំចូលទ្វេភាគីរវាងកម្ពុជា-សហរដ្ឋអាមេរិកក្នុងរយៈពេល៤ខែដើមឆ្នាំ២០២១ដែលផ្តល់ដោយក្រសួងពាណិជ្ជកម្ម បានបង្ហាញថា ទំហំពាណិជ្ជកម្មសរុបទ្វេភាគីមានទឹកប្រាក់ជិត២ពាន់លានដុល្លារអាមេរិកកើនឡើងជាង២៨%។ បើតាមរបាយការណ៍ការធ្វើពាណិជ្ជកម្មទ្វេភាគីនៅ៤ខែដើមឆ្នាំ២០២១នេះ កម្ពុជាបាននាំចេញមានទឹកប្រាក់ជាង១,៩ពាន់លានដុល្លារអាមេរិកកើនឡើងប្រមាណ២៩,៥៣% ខណៈសហរដ្ឋអាមេរិកនាំចូលមានទឹកប្រាក់ជាង៩៣លានដុល្លាអាមេរិកកើនឡើងជាង១០% បើប្រៀបធៀបនិងរយៈពេលដូចគ្នាឆ្នាំ២០២០។
ពាក់ព័ន្ធនិងការធ្វើពាណិជ្ជកម្មទ្វេភាគីនេះ បើតាមមន្ត្រីជាន់ខ្ពស់និងជាអ្នកនាំពាក្យក្រសួងពាណិជ្ជកម្មវបានលើកឡើងថាទំនាក់ទំនិងរវាងកម្ពុជា និងសហរដ្ឋអាមេរិកយើងសង្កេតឃើញថានៅប៉ុន្មានឆ្នាំកន្លងមកនេះការនាំចេញរបស់យើងទៅសហរដ្ឋអាមេរិកមានកំណើនគួរជាទីគាត់សម្គាល់ ពិសេសយើង បាននាំចេញសម្លៀកបំពាក់ កាបូបធ្វើដំណើរនិងសម្ភារៈផ្សេងៗគឺមានកំណើន ជាក់ស្តែងក្នុងរយៈពេល៤ខែដំបូងឆ្នាំ២០២១នេះ បើយើងមើលទៅលើទំហំពាណិជ្ជកម្មសរុបកើនឡើងជាង២៨%។
ឯកឧត្តម ប៉ែន សុវិជាតិ អនុរដ្ឋលេខាធិការនិងជាអ្នកនាំពាក្យក្រសួងពាណិជ្ជកម្ម មានប្រសាសន៍ថា«ការនាំចេញរបស់កម្ពុជាមានកំណើន២៩%នេះ ជាចំណុចសុទិដ្ឋិនិយមមួយបើទោះបីស្ថិតក្នុងកាលៈទេសៈជំងឹកូវីដ១៩នេះក្តី ប៉ុន្តែទំនាក់ទំនងពាណិជ្ជកម្មទ្វេភាគីនូវរក្សាបានស្ថិរភាពល្អប្រសើរ ហើយសហរដ្ឋអាមេរិកនៅចាត់ទុកប្រទេសកម្ពុជានូវតែប្រភពមួយនៃការផលិតសម្រាប់នាំចេញដែលសហរដ្ឋអាមេរិកមានក្រុមហ៊ុនធំៗជាដៃគូទទួលទិញសម្លៀកបំពាក់ កាបូបធ្វើដំណើរ និងស្បែកជើងផលិតចេញពីកម្ពុជា»។
បើតាមឯកឧត្តម ប៉ែន សុវិជាតិ កន្លងមកយើងសង្កេតឃើញថា ភាពអនុគ្រោះពាណិជ្ជកម្មទូទៅ(GSP) ដែលយើងមានជាមួយសហរដ្ឋអាមេរិក ហើយនៅពេលបច្ចុប្បន្នយើងកំពុងមានការត្រួតពិនិត្យឡើងវិញ ហើយដាក់ស្នើទៅសភាអាមេរិកដើម្បីអនុម័តនោះ យើងសង្ឃឹមថាសហរដ្ឋអាមេរិកនឹងអនុម័តដោយផ្តល់ប្រព័ន្ធអនុគ្រោះជាថ្មីឡើងវិញជូនកម្ពុជាក្នុងពេលខាងមុខឆាប់ៗនេះ ហើយបើសិនយើងទទួលបានប្រពន្ធអនុគ្រោះនេះបន្តទៅទៀត វាអាចនិងធ្វើឱ្យទំហំនៃការនាំចេញរបស់យើងនិងកើនឡើងថែមទៀត។
ឯកឧត្តម ប៉ែន សុវិជាតិ សង្កត់ធ្ងន់ថា«យើងមានសុទិដ្ឋិនិយមដោយសារទីផ្សារសព្វថ្ងៃនៅសហរដ្ឋអាមេរិកក្តីក៏មានការចាក់វ៉ាក់សាំងក៏ដូចជាតម្រូវការទីផ្សារមានការកម្រើកមកវិញ អីចឹងយើងសង្ឃឹមថាការនាំចេញពីកម្ពុជាទៅសហរដ្ឋអាមេរិកនឹងមានការឡើងថែមទៀត ថ្វីត្បិតរោងចក្រកាត់ដេរមួយចំនួននៅកម្ពុជាមួយចំនួនរងផលប៉ះពាល់ពីជំងឺកូវីដ១៩ក្តី តែរោងចក្រផលិតសម្រាប់នាំចេញទៅសហរដ្ឋអាមេរិកនៅបន្តដំណើរការរបស់ខ្លួនដដែល»៕
ចែករំលែកព័តមាននេះ