រាជធានីភ្នំពេញ ៖ ជនសង្ស័យ២នាក់ បានជិះម៉ូតូ១គ្រឿងឌុបគ្នាទៅអែបជិតស្ត្រីជាអាជីវករម្នាក់ ដែលកំពុងជិះម៉ូតូ១គ្រឿងតែម្នាក់ឯង ដោយមានស្ពាយកាបូបលុយ១ផង លុះពេលទៅដល់ទន្ទឹមគ្នា ជនសង្ស័យខាងលើក៏បានធ្វើសកម្មភាពឆក់យកកាបូប ។ ប៉ុន្តែស្ត្រីអាជីវកររូបនោះដឹងខ្លួនបានចាប់កាន់កាបូបជាប់មិនលែង…
រាជធានីភ្នំពេញ ៖ ជនសង្ស័យ២នាក់ បានជិះម៉ូតូ១គ្រឿងឌុបគ្នាទៅអែបជិតស្ត្រីជាអាជីវករម្នាក់ ដែលកំពុងជិះម៉ូតូ១គ្រឿងតែម្នាក់ឯង ដោយមានស្ពាយកាបូបលុយ១ផង លុះពេលទៅដល់ទន្ទឹមគ្នា ជនសង្ស័យខាងលើក៏បានធ្វើសកម្មភាពឆក់យកកាបូប ។
ប៉ុន្តែស្ត្រីអាជីវកររូបនោះដឹងខ្លួនបានចាប់កាន់កាបូបជាប់មិនលែង និងទើបមានការប្រទាញប្រទង់គ្នារហូតធ្វើឲ្យដួលម៉ូតូទាំងអស់គ្នាហើយនាងបានស្រែកថា ចោរៗបង្កឲ្យមានការភ្ញាក់ផ្អើលដល់កម្លាំងនគរបាលប៉ុស្តិ៍ព្រៃសកំពុងល្បាតតាមផ្លូវជួយដេញចាប់បានម្នាក់ និងរត់រួចម្នាក់ ។
ហេតុការណ៍នោះបានកើតឡើង កាលពីវេលាម៉ោង១៩និង៥០នាទី យប់ថ្ងៃទី៣១ ខែឧសភា ឆ្នាំ២០២១ នៅតាមផ្លូវ៣០ម៉ែត្រ ត្រង់ចំណុចមុខបុរីទ្រីគីម ស្ថិតនៅក្នុងភូមិព្រៃធំ សង្កាត់ព្រៃស ខណ្ឌដង្កោ រាជធានីភ្នំពេញ ។
ស្ត្រីដែលជាជនរងគ្រោះឈ្មោះ ឆុន ស៊ីថាត អាយុ៥២ឆ្នាំ ជនជាតិខ្មែរ មុខរបរលក់ដូរ ទីលំនៅភូមិព្រៃល្ង សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។ ចំណែកជនសង្ស័យដែលត្រូវនគរបាលឃាត់ខ្លួននោះឈ្មោះ អោ សុខន ភេទប្រុស អាយុ១៩ឆ្នាំ ជនជាតិខ្មែរ មុខរបរជាងភ្លើង ស្នាក់នៅបន្ទប់ជួល សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ មានសារធាតុញៀននៅក្នុងខ្លួន។
រីឯបក្សពួកដែលរត់គេចខ្លួនរួចឈ្មោះ អន ភេទប្រុស អាយុ២០ឆ្នាំ ហើយជនសង្ស័យទាំង២នាក់នេះជិះម៉ូតូ០១គ្រឿង ម៉ាកហុងដាឌ្រីមសេ១២៥ ពណ៌ខ្មៅ គ្មានស្លាកលេខ មានលេខតួ និងលេខម៉ាស៊ីន5926363 និងត្រូវកម្លាំងនគរបាលដកហូតយក ។
លោកវរសេនីយ៍ឯកជឹម ស៊ីថា អធិការនគរបាលខណ្ឌដង្កោបានថ្លែងថា នៅមុនពេលកើតហេតុស្ត្រីរងគ្រោះបានស្ពាយកាបូបលុយ១នៅខាងមុខ ហើយជិះម៉ូតូ០១គ្រឿងម៉ូតូម៉ាកឆាលី ធ្វើដំណើរចេញពីកន្លែងលក់ផ្លែឈើ ស្ថិតនៅភូមិវត្តស្លែង សង្កាត់ពងទឹក ខណ្ឌដង្កោ រាជធានីភ្នំពេញ ត្រឡប់ទៅផ្ទះផ្ទះ ស្ថិតនៅភូមិព្រៃល្ង សង្កាត់ចោមចៅទី២ ខណ្ឌពោធិ៍សែនជ័យវិញ ។
លុះពេលទៅដល់ផ្លូវ៣០ម៉ែត្រ ខណៈពេលកំពុងធ្វើដំណើរក្នុងទិសដៅពីលិចទៅកើត ដល់ត្រង់ចំណុច ខាងមុខបុរីទ្រីគីម ស្ថិតនៅភូមិព្រៃធំ សង្កាត់ព្រៃស ខណ្ឌដង្កោ ក៏ស្រាប់តែលេចមុខជនសង្ស័យទាំង២នាក់ ខាងលើជិះម៉ូតូតាមពីក្រោយ ។
លោកអធិការបានប្រាប់ឲ្យដឹងបន្តទៀតថា ពេលជិះទៅដល់ទន្ទឹមស្ត្រីរងគ្រោះជនសង្ស័យឈ្មោះ អោ សុខុនដែលជិះពីក្រោយ ហើយជនសង្ស័យឈ្មោះ អន ជាអ្នកបើកបរម៉ូតូ ក៏បានធ្វើសកម្មភាពឆក់យកកាបូបពីជនរងគ្រោះ តែខណៈនោះត្រូវបានជនរងគ្រោះទាញកន្ត្រាក់យកមកវិញ បណ្តាលឲ្យដួលម៉ូតូទាំងអស់គ្នា ។
បន្ទាប់មកជនរងគ្រោះបានស្រែកឆោឡោថា «ចោរៗ »បង្កឲ្យមានការភ្ញាក់ផ្អើលទើបជនសង្ស័យនាំគ្នារត់គេចខ្លួនចោលម៉ូតូ ស្របពេលនោះកម្លាំងនគរបាលប៉ុស្តិ៍រដ្ឋបាលព្រៃសកំពុងល្បាតតាមផ្លូវនោះដែរជួយអន្តរាគមន៍ដេញតាមនិងឡោមព័ទ្ធចាប់ខ្លួនជនសង្ស័យបាន១នាក់ឈ្មោះ អោ សុខុន ចំណែកឈ្មោះអន បានរត់គេចបាត់ស្រមោល ។ ពេលនេះកម្លាំងរបស់លោកបានសាកសួរជនសង្ស័យ និងកសាងសំណុំរឿងដើម្បីបញ្ជូនទៅកាន់សាលាដំបូងរាជធានីភ្នំពេញចាត់ការតាមច្បាប់ហើយ ៕
ចែករំលែកព័តមាននេះ