រាជធានីភ្នំពេញ ៖ សហព័ន្ធកីឡាប្រដាល់គុនខ្មែរបានសម្រេចបង្កើតគណៈកម្មកាចំពោះកិច្ចមួយ ដើម្បីដឹកនាំពង្រឹងនូវការហ្វឹកហាត់របស់ក្រុមអ្នកប្រដាល់ជម្រើសសម្រាប់ចូលរួមប្រកួតកីឡាស៊ីហ្គេមលើកទី៣១ នាចុងឆ្នាំនេះ នៅទីក្រុងហាណូយ ប្រទេសវៀតណាម ។កិច្ចប្រជុំនេះបានធ្វើឡើងកាលពីល្ងាចថ្ងៃច័ន្ទទី៣១ ខែឧសភា នៅកីឡដ្ឋានស្តាតចាស់។
លោក រាជ សុផែន អគ្គលេខាធិការរង និងប្រធានគណៈកម្មការផែនការ និងឃោសនាព័ត៌មានសហព័ន្ធកីឡាប្រដាល់គុនខ្មែរ បានប្រាប់ឲ្យដឹងថា គណៈកម្មការចំពោះកិច្ចនេះ មានភារកិច្ចតាមដានការហ្វឹកហាត់ ដើម្បីពង្រឹងសមត្ថភាពអ្នកប្រដាល់ជម្រើសជាតិ មិនត្រឹនតែសម្រាប់ស៊ីហ្គេមឆ្នាំ២០២១ប៉ុណ្ណោះទេ តែសម្រាប់ឆ្នាំ២០២៣ ដែលកម្ពុជាធ្វើជាម្ចាស់ផ្ទះទៀតផង ។
កីឡាប្រដាល់ជម្រើសជាតិគុនខ្មែរមានចំនួន១៣រូប ក្នុង៩ប្រភេទទម្ងន់ដែល ក្នុងនោះមានអ្នកប្រដាល់ភុន ពិសិត ទម្ងន់៤៥គីឡូក្រាម កីឡាករសៃនី សៃណេតទម្ងន់៤៨គីឡូក្រាម ខាំ ខ្លានាងទម្ងន់៥១គីឡូក្រាម ។ អ្នកប្រដាល់រិន ដាវីដ; កាន់ ម៉េងហុង និង ហ៊ឹម គឹមរៀងទម្ងន់៥៤ គីឡូក្រាមដូចគ្នា ។ អ្នកប្រដាល់លី សុជាតិទម្ងន់៥៧គីឡូក្រាម ឃុន បូរ៉ាទម្ងន់៦០គីឡូក្រាម អ្នកប្រដាល់សោម ពិសិដ្ឋ និង ប៉ោ ភារិទ្ធដែលមានទម្ងន់៦៣,៥០គីឡូក្រាមដូចគ្នា អ្នកប្រដាល់ឡៅ ចិត្រា និង លនបញ្ញាទម្ងន់៦៧គីឡូក្រាមដូចគ្នា និងអ្នកប្រដាល់ឡៅ ចិន្ត្រា ទម្ងន់៧១គីឡូក្រាម ។ ចំពោះគ្រូបង្វឹក គឺលោកហេង ប៊ុនឃីម និងលោកសេន ប៊ុនថេន ។
សម្រាប់៣ប្រភេទទម្ងន់ដែលមានអ្នកប្រដាល់ទម្ងន់ជាន់គ្នានោះ លោករាជ សុផែន បានពន្យល់ថា នឹងត្រូវធ្វើការប្រកួតជម្រុះជាបណ្ដើរៗ តែមិនមែនប្រកួតតែមួយលើកនឹងត្រូវបញ្ចប់នោះទេ គឺត្រូវឆ្លងកាត់ការប្រកួតជម្រុះជាច្រើនលើក ដើម្បីឲ្យពួកគេមានឱកាសប្រជែងគ្នាកាន់តែច្រើន ទើបសហព័ន្ធរកបានកីឡាករដែលមានគុណភាពពិតៗ ។
ប្រដាល់គុនខ្មែរជាប្រភេទកីឡាដែលមានសក្ដានុពលខ្លាំងមួយដែលធ្លាប់ប្រជែងបានមេដាយមាសក្នុងព្រឹត្តិការណ៍ស៊ីហ្គេម ដោយកីឡាករ ឃុន ឌីម៉ា ។ ឯកឧត្តមសេនីយ៍ឯក តែម ម៉ឺន ប្រធានសហព័ន្ធប្រដាល់គុនខ្មែរនៅតែមានជំនឿចិត្តថា គុនខ្មែរនឹងរកបានមេដាយពីការប្រកួតកីឡាស៊ីហ្កេមបន្តទៀតជាក់ជាមិនខានឡើយ ៕
ចែករំលែកព័តមាននេះ