លោក សាន ប៊ុនធឿន ចៅក្រមស៊ើបសួរសាលាដំបូងរាជធានីភ្នំពេញ កាលពីព្រឹកថ្ងៃទី១ ខែមិថុនា ឆ្នាំ២០២១នេះ បានសម្រេចចេញដីកាឃុំខ្លួនថៅកែផ្គត់ផ្គង់ទិញ-លក់ត្រីធូណា និងត្រីសាលម៉ុន បឹងសាឡាង
រាជធានីភ្នំពេញ ៖ លោក សាន ប៊ុនធឿន ចៅក្រមស៊ើបសួរសាលាដំបូងរាជធានីភ្នំពេញ កាលពីព្រឹកថ្ងៃទី១ ខែមិថុនា ឆ្នាំ២០២១នេះ បានសម្រេចចេញដីកាឃុំខ្លួនថៅកែផ្គត់ផ្គង់ទិញ-លក់ត្រីធូណា និងត្រីសាលម៉ុន បឹងសាឡាង ដាក់ពន្ធនាគារជាបណ្តោះអាសន្ន ។
តាមដីកាសម្រេចបានដាក់ឲ្យជនត្រូវចោទ ស្ថិតក្រោមការត្រួតពិនិត្យពីបទ.មិនបំពេញកាតព្វកិច្ចចំពោះឧបករណ៍អាចជួញដូរបាន ប្រព្រឹត្តនៅរាជធានីភ្នំពេញ កាលពីថ្ងៃទី២២ ខែកក្កដា ឆ្នាំ២០២០ បទល្មើព្រហ្មទណ្ឌដែលមានចែង និងផ្តន្ទាទោសតាមបញ្ញត្តិមាត្រា ២៣១ នៃច្បាប់ស្តីពីឧបរណ៍អាចជួញដូរបាន និងប្រតិបត្តិការទូទាត់សងប្រាក់។
ជនសង្ស័យខាងលើនេះមានឈ្មោះ អ៊ុន សុង ភេទប្រុស អាយុ៣៨ ឆ្នាំ មុខរបរជាថៅកែផ្គត់ផ្គត់ទិញ- លក់ត្រីធូណា និងត្រីសាលម៉ុន ដែលមានអាសយដ្ឋានផ្ទះលេខ ៥៩AZ ផ្លូវលេខ២៤៨ សង្កាត់បឹងសាឡាង ខណ្ឌទួលគោក រាជធានីភ្នំពេញ ។
ជនសង្ស័យត្រូវបានកម្លាំងសមត្ថកិច្ចនគរបាលព្រហ្មទណ្ឌកម្រិតស្រាលរាជធានីភ្នំពេញ ឃាត់ខ្លួនកាលពីថ្ងៃទី២៩ ខែឧសភា ឆ្នាំ២០២១ ពាក់ព័ន្ធករណី.ឆបោក និងមិនបំពេញកាតព្វកិច្ចចំពោះឧបករណ៍អាចជួញដូរបាន តាមរូបភាពចេញមូលប្បទាប័ត (សែកស្អុយ) អត់សាច់ប្រាក់ប្រមាណជិត៣០ម៉ឺនដុល្លារអាមេរិក ។
បើតាមសមត្ថកិច្ចឲ្យដឹងថា ការឃាត់ខ្លួនជនសង្ស័យខាងលើនេះ គឺធ្វើឡើងតាមដីកាបង្គប់ឲ្យចាប់ខ្លួនរបស់លោក លី សុខលេង ចៅក្រមស៊ើបសួរសាលាដំបូងរាជធានីភ្នំពេញ ។ ក្រោយពេលចាប់ឃាត់ខ្លួនជនសង្ស័យរូបនោះ សមត្ថកិច្ចបានបំពេញបែបបទតាមនីតិវិធី និងបញ្ជូនទៅកាន់សាលាដំបូងរាជធានីភ្នំពេញ នាព្រឹកថ្ងៃទី៣១ ខែឧសភា ដើម្បីដោះស្រាយលើបំណុលរបស់ជនរងគ្រោះ ។
ដើមចមនៃការឃាត់ខ្លួនជនសង្ស័យ គឺផ្តើមឡើងតាមពាក្យបណ្តឹងរបស់ជនរងគ្រោះដែលជាម្ចាស់ប្រាក់ បានប្តឹងចោទប្រកាន់ទៅលើជនសង្ស័យ២នាក់ប្តីប្រពន្ធឈ្មោះ អ៊ុន សុង និងឈ្មោះ ភឿន ចាន់ថន ដែលមានគំនិតទុច្ចរិតឃុបឃិតគ្នាឆបោកប្រាក់ប្រមាណ ២៨៨.៩៧០ ដុល្លារអាមេរិក ។
តាមពាក្យបណ្តឹងបញ្ជាក់ថា កាលពីកាលពីអំឡុងថ្ងៃខែមិនចាំ ឈ្មោះ អ៊ុន សុង និងប្រពន្ធឈ្មោះ ភឿន ចាន់ថន បានខ្ចីប្រាក់ពីជនរងគ្រោះជាបន្តបន្ទាប់ប្រមាណ ៦៥៩.១០០ ដុល្លារអាមេរិក ដើម្បីយកទៅប្រើប្រាស់ និងប្រកបមុខជំនួញផ្ទាល់ខ្លួន ។ ក្រោយមកប្តីប្រពន្ធពីរនាក់នោះបានសងប្រាក់ទៅដើមបណ្តឹងជាបណ្តើរៗវិញ នៅសល់តែ ២៨៨.៩៧០ ដុល្លារប៉ុណ្ណោះទេ ដោយគូភាគីបានព្រមព្រៀងគ្នា និងធ្វើកិច្ចសន្យាថ្មីមួយទៀត ទទួលស្គាល់បំណុល និងយល់ព្រមសងប្រាក់ដែលបានកំណត់ចុងក្រោយនេះ និងដើម្បីឲ្យមានការធានាទូទាត់លើប្រាក់កម្ចីនោះ គូភាគីពីរនាក់ប្តីប្រពន្ធ បានចេញមូលប្បទានប័តចំនួន៣សន្លឹក ឲ្យទៅដើមបណ្តឹងជាការជឿទុកចិត្ត ។
តាមពាក្យបណ្តឹងបញ្ជាក់បន្តថា លុះដល់ថ្ងៃកំណត់ ដើមបណ្តឹងបានទៅបើកប្រាក់នៅធនាគារ ស្រាប់តែខាងធនាគារឆ្លើយថា មូលប្បទានប័តទាំង៣សន្លឹកនោះអត់មានសាច់ប្រាក់ទេ មិនតែប៉ុណ្ណោះកុងរបស់ឈ្មោះ អ៊ុន សុង និងឈ្មោះ ភឿន ចាន់ថន ត្រូវបានបិទទៀត (ពោលគឺសែកស្អុយតែម្តង) ។
តាមពាក្យបណ្តឹងបញ្ជាក់បន្តទៀតថា បន្ទាប់ពីធនាគារឆ្លើយដូច្នេះ ជនរងគ្រោះបានរកការទាក់ទងទៅជនសង្ស័យឈ្មោះ អ៊ុន សុង និងប្រពន្ធ ដើម្បីឲ្យមកទូទាត់ប្រាក់បំណុលនោះ តែជនសង្ស័យបិទទូរស័ព្ទមិនអាចទាក់ទងបាន ថែមទាំងគេចវេសមិនព្រមជួបដើមបណ្តឹងទៀតផង ដោយឃើញទង្វើបែបនេះ ទើបជនរងគ្រោះសម្រេចចិត្តងាកមករកផ្លូវច្បាប់ឲ្យជួយដោះស្រាយវិញ ។
អង្គហេតុដូចតាមពាក្យបណ្តឹងរៀបរាប់ខាងលើ ត្រូវបានតុលាការចាត់ការតាមនីតិវិធី រហូតដល់ចេញដីកាបង្គាប់ឲ្យសមត្ថកិច្ចចាប់ខ្លួន និងសម្រេចឃុំខ្លួនជនសង្ស័យបុរសជាប្តីថៅកែផ្គត់ផ្គង់ត្រីធូណា និងត្រីសាលម៉ុន បឹងសាឡាង ដាក់ពន្ធនាគារជាបណ្តោះអាសន្ន ៕
ចែករំលែកព័តមាននេះ