ខេត្តកំពង់ឆ្នាំង ៖ យោងតាមសេចក្តីជូនដំណឹងរបស់រដ្ឋបាលសាលាខេត្តកំពង់ឆ្នាំង ដែលបានចេញនៅព្រឹកថ្ងៃទី22 ខែឧសភា ឆ្នាំ 2021 នេះថា រោងចក្រ ហឹរ៉ាយហ្សិន…
ខេត្តកំពង់ឆ្នាំង ៖ យោងតាមសេចក្តីជូនដំណឹងរបស់រដ្ឋបាលសាលាខេត្តកំពង់ឆ្នាំង ដែលបានចេញនៅព្រឹកថ្ងៃទី22 ខែឧសភា ឆ្នាំ 2021 នេះថា រោងចក្រ ហឹរ៉ាយហ្សិន អៅដរ ត្រូវបិទទ្វារជាបណ្តោះអាសន្ន រហូតដល់មានសេចក្តីជូនដំណឹងជាថ្មី ។
រោងចក្រខាងលើមានកម្មករចំនួន៨៥០០នាក់ ត្រូវបិទទ្វារជាបណ្តោះអាសន្ននេះមានទីតាំង ស្ថិតក្នុងភូមិផ្សារត្រាច ឃុំលង្វែក ស្រុកកំពង់ត្រឡាច ។
ជាមួយគ្នានេះ បើយោងតាមអាខោនមួយឈ្មោះ Thy Kuntjhea ដែលបានបង្ហោះក្នុងបណ្តាញសង្គម ហ្វេសប៊ុក កាលពីរសៀល ថ្ងៃទី២១ ខែឧសភា ឆ្នាំ២០២១ ដោយអះអាងខ្លួនជានាយករដ្ឋបាលនៃរោងចក្រ ហឹរ៉ាយហ្សិន អៅដរ បានលើកឡើងថា ៖ ( នាងខ្ញុំឈ្មោះ ធី គុន្ធា ជានាយករដ្ឋបាលនៃរោងចក្រហឹរ៉ាយ ហ្សិន អៅដរ /Horizon Outdoor Cambodia ជាដំបូងបង្អស់ ខ្ញុំសូមគោរព និងអព្យាស្រ័យចំពោះ បងប្អូនបុគ្គលិកគ្រប់ ស្រទាប់វណ្ណៈទាំងអស់ ៨៥០០នាក់ ដែលបងប្អូនទាំងអស់បំពេញការងារនៅរោងចក្រទាំងមូលថា រោងចក្ររបស់យើង គឺផ្អាកដំណើរជាបណ្តោះអាសន្នសិន, ហើយថ្ងៃស្អែកពេលថ្ងៃម៉ោង ១រសៀល ខ្ញុំនឹងជម្រាបជូនបងប្អូនទាំងអស់គ្នាវិញថា រោងចក្រយើងចូលធ្វើការងារវិញនៅថ្ងៃណាពិតប្រាកដ, សូមទោសដែលខ្ញុំមិនអាចការពារ នៅការងារបងប្អូនឲ្យជាប់លាប់បាន) ។ ថ្វីថ្បិតអាខោន Thy Kuntjhea មិនបានបញ្ជាក់ថា ៖ ការបិទរោងចក្រដោយសារអ្វីនោះក៏ពិតមែន ប៉ុន្តែគេដឹងប្រាកដណាស់ថា ការបិទរោងចក្រមួយនេះ គឺដោយសារការផ្ទុះជម្ងឺកូវីដ១៩ ។
ជាក់ស្តែង កាលពីរសៀលថ្ងៃទី១៧ ខែឧសភា ឆ្នាំ២០២១ មន្ត្រីនៃមន្ទីរសុខាភិបាលខេត្តកំពង់ឆ្នាំង បានយកសំណាក កម្មករធ្វើការនៅរោងចក្រនេះចំនួន៥២នាក់ បានរកឃើញវិជ្ជមាន២០នាក់ និងបន្តបន្ទាប់មកមន្ត្រីជំនាញបានបន្តយកសំណាកលើកម្មកររោងចក្រនេះ ដោយបានរកឃើញអ្នកឆ្លងជម្ងឺនេះបន្ថែមទៀត ។ ហើយអ្វីដែលចាប់អារម្មណ៍ និងគួរព្រួយបារម្ភនោះតួរលេខការយកសំណាកនៅថ្ងៃទី២១ ខែឧសភា ម្សិលម៉ិញនេះ ចំនួនវិជ្ជមានកូវីដ១៩ មានចំនួនច្រើនដែលពុំធ្លាប់មាន ។
យ៉ាងនេះក្តី មន្ត្រីជំនាញដែលកំពុងធ្វើការងារនេះបានបញ្ជាក់ថា៖ នេះជាតួរលេខបណ្តោះអាសន្ន តែប៉ុណ្ណោះមិនទាន់ផ្លូវការនោះទេ ។ ហើយតួរលេខបណ្តោះអាសន្ន ដែលយើងទទួលបានការធ្វើតេស លើកម្មករជាង២៥០នាក់ បានរកឃើញវិជ្ជមានកូវីដ១៩ ច្រើនជាង៦០នាក់ (សុំមិនបង្ហាញតួរលេខ ព្រោះគ្រាន់តែតូរលេខបណ្តោះអាសន្ន មិនទាន់ផ្លូវការ ) ហើយអ្នកវិជ្ជមានទាំងនោះបានយកទៅដាក់ឱ្យសម្រាកព្យាបាលនោះមន្ទីរពេទ្យស្រុកកំពង់ត្រឡាចអស់ហើយ ។
ទោះយ៉ាងណា ផ្តើមចេញពីការរកឃើញវិជ្ជមានយ៉ាងច្រើនបែបនេះ ទើបរោងចក្រខាងលើ បានសម្រេចធ្វើការបិទទ្វារ ចំណែក ឯ មន្ត្រីជំនាញដែលធ្វើការងារនេះថ្វីបើ ពួកគាត់មិនហ៊ានប្រាប់ពីចំនួនអ្នកឆ្លងច្រើនបែបនេះពិតមែន តែពួកគាត់បានសម្តែងនូវការព្រួយបារម្មណ៍យ៉ាងខ្លាំង ដោយបានសំណួមពរដល់អ្នកប៉ះពាល់ជាមួយអ្នកវិជ្ជមានទាំងអស់ រួមទាំងអ្នកដែលបានយកសំណាក ទាំងអស់ ត្រូវធ្វើចត្តាឡីស័ក ឱ្យបាន១៤ថ្ងៃ និងរង់ចាំយកសំណាកជាលើកទី២ទៀត ។
ជាមួយគ្នានេះ សូមអនុវត្តឱ្យបាននូវវិធានការងារពារ ៣កុំ ៣ការពារឱ្យបានខ្ជាប់ខ្ជួន ដើម្បីចូលរួមប្រយុទ្ធប្រឆាំងជម្ងឺកូវីដ១៩ ។ មានការកត់សំគាល់ថា ៖ រយៈកន្លងមក បើទោះបីមន្ត្រីជំនាញនៃមន្ទីរសុខាភិបាលបានរកឃើញចំនួន អ្នកវិជ្ជមានកូវីត-១៩ ដោយការធ្វើ «តេសរហ័ស» យ៉ាងណាក្តី ក៏ចំនួននេះមិនទាន់បញ្ជាក់ជាផ្លូវការដែរ លុះត្រាណា ខាងរដ្ឋបាលសាលាខេត្តកំពង់ឆ្នាំង ចេញសេចក្តីប្រកាសទើបយកជាផ្លូវការបាន ។
ចំពោះលទ្ធផលពិតប្រាកដនៃការយកសំណាក កាលពីរសៀលថ្ងៃទី២១ ខែឧសភា លើកម្មរោងចក្រខាងលើនេះនឹងចេញជាផ្លូវការ ដោយរដ្ឋបាលសាលាខេត្តកំពង់ឆ្នាំង ៕
ចែករំលែកព័តមាននេះ