ខេត្តឧត្តរមានជ័យ៖ ក្រុមគ្រូពេទ្យ រួមទាំងក្រុមអាជ្ញាធរមូលដ្ឋាន កងកំលាំងសមត្ថកិច្ចគ្រប់ស្ថាប័ន បានហ៊ុំព័ទ្ធ បិទផ្ទះសំណាក់ សោភា រួមទាំងទីតាំងលក់សំបកកង់រថយន្ត និងទីតាំងលក់បាយ រយៈពេល…
ខេត្តឧត្តរមានជ័យ៖ ក្រុមគ្រូពេទ្យ រួមទាំងក្រុមអាជ្ញាធរមូលដ្ឋាន កងកំលាំងសមត្ថកិច្ចគ្រប់ស្ថាប័ន បានហ៊ុំព័ទ្ធ បិទផ្ទះសំណាក់ សោភា រួមទាំងទីតាំងលក់សំបកកង់រថយន្ត និងទីតាំងលក់បាយ រយៈពេល ១៤ថ្ងៃ គិតចាប់ពីថ្ងៃទី១៦ឧសភា។ ទីតាំងបិទខ្ទប់ទាំងនេះ ស្ថិតនៅក្នុងភូមិអូរចញ្ជៀន ឃុំអន្លង់វែង ស្រុកអន្លង់វែង ខេត្តឧត្តរមានជ័យ ដោយសារតែពាក់ព័ន្ធនឹងអ្នកជំងឺកូវីដ១៩។
ទាក់ទិនទៅនិងហេតុការណ៍បិទខ្ទប់ផ្ទះសំណាក់ ដែលមានយីហោសោភា រួមទីតាំងលក់សំបករថយន្ត និងកន្លែងលក់បាយនេះ ដោយសារតែមានឈ្មោះ គេង រ៉ាវី ភេទប្រុស អាយុ ២៦ឆ្នាំ ជាអ្នកបើកបររថយន្តរបស់ក្រុមហ៊ុនលក់សំបកកង់រថយន្ត Wing Forco មានវិជ្ជមាន COVID១៩ បានចូលទៅទីនោះ ហើយបុរសនោះ ធ្វើដំណើររហូតដល់ខេត្តប៉ៃលិន ទើបរកឃើញឆ្លងកូវីដ១៩។
លោក នៅ សំអន ប្រធានមន្ទីរពេទ្យស្រុកអន្លង់វែង បានឲ្យដឹងថា ឈ្មោះ គេង រ៉ាវី បានធ្វើដំណើរចេញពីលំនៅឋាន កាលពីថ្ងៃទី៨ ខែឧសភា ឆ្នាំ២០២១ ដោយបើកបររថយន្ត លក់សំបករថយន្ត តាមខេត្តក្រុង រហូតមកទល់នឹងថ្ងៃទី១៤ ខែឧសភា ឆ្នាំ២០២១
ឈ្មោះ គេង រ៉ាវី បានចូលមកស្នាក់នៅក្នុងផ្ទះសំណាក់ សោភា ចូលទៅទីតាំងលក់សំបកកង់រថយន្ត និងចូលទៅទីតាំងលក់បាយមួយកន្លែងផ្សេងទៀត ហើយបានបន្តធ្វើដំណើរ ទៅខេត្តបន្ទាយមានជ័យ បាត់ដំបង ប៉ៃលិន ទើបគ្រូពេទ្យ ខេត្តប៉ៃលិន រកឃើញបុរសនេះ វិជ្ជមាន COVID១៩។
លោក នៅ សំអន បន្តថា យោងទៅលើទីតាំងផ្ទះសំណាក់សោភា ទីតាំងលក់សំបករថយន្ត ទីតាំងលក់បាយ ដែលមានការពាក់ព័ន្ធនឹងឈ្មោះ គេង រ៉ាវី ដូច្នេះហើយត្រូវតែអនុវត្តន៍ធ្វើចតាឡីស័ក ក្នុងរយៈពេល ១៤ថ្ងៃ ដើម្បីពិនិត្យសំណាកលើកទី១ និងលើកទី២ ហើយទីតាំងទាំងនោះ ត្រូវបិទខ្ទប់រយៈពេល ១៤ថ្ងៃដែរ។
លោក នៅ សំអន បន្តថា ទីតាំងទាំង ៣កន្លែងនេះ មានមនុស្ស ១៥នាក់ ត្រូវបានយកសំណាក និងធ្វើចតា្តឡីស័ក។ ការពិនិត្យសំណាក លើកទី១ គឺអវិជ្ជមាន។ តែត្រូវរង់ចាំពិនិត្យលើកទី២ បន្តទៀត ក្នុងរយៈពេល ១៤ថ្ងៃបន្ត៕ ឱម សារឿន
ចែករំលែកព័តមាននេះ