រាជធានីភ្នំពេញ ៖ អតីតមន្ត្រីជាន់ខ្ពស់គណបក្សសង្គ្រោះជាតិលោក ប៉ុល ហំម និងអតីតមន្ត្រីម្នាក់ទៀត បានដាក់ពាក្យសុំសិទ្ធធ្វើនយោបាយឡើងវិញ បន្ទាប់តុលាការកំពូលសម្រេចលុបសិទ្ធនយោបាយ ។ យ៉ាងណាមិញ…
រាជធានីភ្នំពេញ ៖ អតីតមន្ត្រីជាន់ខ្ពស់គណបក្សសង្គ្រោះជាតិលោក ប៉ុល ហំម និងអតីតមន្ត្រីម្នាក់ទៀត បានដាក់ពាក្យសុំសិទ្ធធ្វើនយោបាយឡើងវិញ បន្ទាប់តុលាការកំពូលសម្រេចលុបសិទ្ធនយោបាយ ។
យ៉ាងណាមិញ មន្ត្រីជាន់ខ្ពស់ក្រសួងមហាផ្ទៃបានអះអាងថា ក្រសួងមិនទាន់អនុញ្ញាតនោះ ដោយសារទម្រង់លិខិតស្នើសុំមិនទាន់ត្រឹមត្រូវ ។
យោងតាមបណ្តាញ សារព័ត៌មានបានមួយចុះផ្សាយថា មន្ត្រីជាន់ខ្ពស់អតីតគណបក្សសង្គ្រោះជាតិចំនួន២នាក់ នៅព្រឹកថ្ងៃទី១៧ឧសភា ឆ្នាំ២០២១ បានទៅដល់ក្រសួងមហាផ្ទៃ មានបំណងសុំសិទ្ធិធ្វើនយោបាយឡើងវិញ ។
មន្ត្រីទាំង២នាក់នោះ ម្នាក់ គឺជាលោក ប៉ុល ហំម អតីតអនុប្រធានគណបក្ស និងម្នាក់ទៀតលោក ផាន់ ច័ន្ទស័ក្តិ ដែលគេស្គាល់ថា ជាមេធាវីការពារឱ្យលោក កឹម សុខា ។
អ្នកនាំពាក្យក្រសួងមហាផ្ទៃ ឯកឧត្តម ខៀវ សុភ័គ ត្រូវបានស្រង់សំដី នៅដដែលថា រហូតមកដល់ពេលនេះ ក្រសួងមហាផ្ទៃ មិនទាន់បានទទួលពាក្យសុំជាផ្លូវការពីសាមីខ្លួននៅឡើយទេ បន្ទាប់ពីគាត់បានកាន់ក្រដាសមួយសន្លឹកមក ដែលមិនទាន់អាចយកជាប្រើការបាន មិនទាន់ពេញលក្ខណៈនៃការស្នើសុំ ។
ឯកឧត្តម ខៀវ សុភ័គ បញ្ជាក់ថា« ពេលណាពួកគាត់ មកម្តងទៀត ជាមួយនឹងការរៀបចំបែបបទឱ្យបានត្រឹមត្រូវនោះក្រសួងនឹងទទួលជាផ្លូវការ ។ តាមមន្ត្រីប្រាប់ខ្ញុំថា ឃើញគាត់អញ្ជើញមកមែនគាត់កាន់ក្រដាសមួយសន្លឹកមក ដែលមិនទាន់អាចយកជាប្រើការបាន មិនទាន់ពេញលក្ខណៈ នៃការស្នើសុំយើងក៏បានសុំឱ្យគាត់រៀបចំបែបបទឡើងវិញ ហើយគាត់អញ្ជើញទៅវិញទៅ។
សរុបមកវិញ យើងអាចនិយាយបានថា រហូតមកដល់ពេលនេះ ក្រសួងមហាផ្ទៃ មិនទាន់បានទទួលពាក្យសុំជាផ្លូវការពីសាមីខ្លួននៅឡើយទេ ។ ពេលណាគាត់មកម្តងទៀត យើងទទួលទៅ ឱ្យតែគាត់រៀបចំបែបបទឱ្យបានត្រឹមត្រូវ ។ តែព្រឹកមិញនេះ គាត់ពិតជាបានមកជួបប្រាស្រ័យទាក់ទង និងកាន់លិខិតមកមែន»។
សូមរឮកថា កាលពីថ្ងៃទី១៣ ខែមេសា ឆ្នាំ២០២១ កន្លងទៅ អតីតមន្ត្រីគណបក្សដែលត្រូវបានតុលាការកំពូលរំលាយចំនួន៧នាក់ ដែលគេដឹងថា សុទ្ធតែជាអ្នកស្និទ្ធជាមួយ លោក កឹម សុខា បាននាំគ្នាដាក់លិខិត ដើម្បីសុំសិទ្ធិធ្វើនយោបាយ តាមរយៈក្រសួងមហាផ្ទៃ ។ បន្ទាប់មក នៅថ្ងៃទី១៧ ខែមេសា ឆ្នាំ២០២១ ព្រះមហាក្សត្រកម្ពុជា បានចេញព្រះរាជក្រឹត្យ ផ្តល់នីតិសម្បទានយោបាយឡើងវិញ ដល់មន្ត្រីទាំងនោះ ។
មន្ត្រីទាំង៧នាក់នេះ រួមមាន ៖ លោក មុត ចន្ថា លោក យ៉ែម ប៉ុញ្ញាឫទ្ធិ លោក ជុំ ចន្ទដារិន លោក ទួត ឃឿន លោក ឡាត់ លីតេយ្យ លោក ឡុង គឹមឃន និងលោក យ៉ង់ ផាន់ណេត ។
បើគិតត្រឹម ថ្ងៃទី១៧ ខែមេសា អតីតមន្ត្រីគណបក្ស ដែលត្រូវបានតុលាការកំពូលរំលាយ មានចំនួន២២នាក់ បានសុំសិទ្ធិធ្វើនយោបាយឡើងវិញ ដែល២២នាក់នេះ ស្ថិតក្នុងចំណោមមន្ត្រីចំនួន១១៨នាក់(ស្លាប់ម្នាក់) ដែលជាប់បំរាម មិនឲ្យធ្វើនយោបាយរយៈពេល៥ឆ្នាំ។ មន្ត្រីទាំងអស់នេះ មួយចំនួនបានសុំសិទ្ធិធ្វើនយោបាយឡើងវិញ និងបានបង្កើតគណបក្សចូលរួមក្នុងការបោះឆ្នោតខាងមុខនេះ រួមមាន ៖ លោក គង់ គាំ និងលោក គង់ មុនីកា បង្កើតគណបក្សឆន្ទៈខ្មែរ ។ លោក រៀល ខេមរិន្ទ បើកគណបក្ស ខ្មែរអភិរក្ស ។ លោក ជីវ កត្តា និងលោក កង គឹមហាក់ ដឹកនាំបក្ស ខ្មែរស្រលាញ់ជាតិ ។ និងលោក អ៊ូ ចន្ទរ័ត្ន បើកបក្ស កែទម្រង់កម្ពុជា ។
សូមជម្រាបអតីតមន្ត្រីបក្សប្រឆាំងជាច្រើនហើយបានងាកមកសុំសិទ្ធិធ្វើនយោបាយវិញ ក្រោយពីពួកគេមើលឃើញអតីតបក្សសង្គ្រោះជាតិពិសេសនោះលោក សម រង្ស៊ី មិនចូលស្រុក ដើម្បីដោះស្រាយនយោបាយនៅកម្ពុជាបានឡើយ ខណៈសុំណុំរឿងរបស់លោកកឹម សុខា បានកំពុងស្ថិតដៃតុលាការនៅឡើយ៕
ចែករំលែកព័តមាននេះ