រាជធានីភ្នំពេញ ៖ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានចេញសារាចរនៅថ្ងៃទី៣១ តុលា ២០១៥ នេះ ស្តីពីការផ្អាកពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ឆ្នាំ២០១៥នេះ ដែលប្រារព្ធទៅនៅមុខព្រះរាជវាំង រាជធានីភ្នំពេញ ។
សារាចរស្តីពី ការផ្អាកពិធីបុណ្យអុំទូក គឺដោយសារទឹកទន្លេមានកម្រិតទាបពេក ហើយនៅចំពោះមុខ ព្រះរាជាណាចក្រកម្ពុជាកំពុងជួបប្រទះគ្រោះរាំងស្ងួត ដែលទាមទារឱ្យយើងត្រូវប្រមូលផ្តុំកម្លាំងសរុប មធ្យោបាយសរុប ក្នុងការដោះស្រាយបញ្ហាកង្វះខាតទឹក សម្រាប់ជួយស្រូវប្រាំងប្រជាកសិករនៅតាមខេត្ត ។
រាជរដ្ឋាភិបាលសុំធ្វើការណែនាំដូចតទៅ ៖
១ – ផ្អាកការរៀបចំព្រះរាជពិធីបុណ្យអុំ បណ្តែតប្រទីប និងសំពះព្រះខែ អកអំបុក នៅតាមដងទន្លេសាបមុខព្រះបរមរាជវាំង ដែលគ្រោងប្រព្រឹត្តទៅនៅថ្ងៃទី២៤-២៥ និង២៦ ខែវិច្ឆិកា ឆ្នាំ២០១៥។
២ – ការរៀបចំព្រះរាជពិធីបុណ្យអុំ បណ្តែតប្រទីប និងសំពះព្រះខែ អកអំបុក នៅតាមខេត្តនានា អាចប្រព្រឹត្តទៅជាធម្មតាតាមទំនៀមទម្លាប់ប្រពៃណី និងតាមលទ្ធភាពរបស់អាជ្ញាធរដែលជាអ្នករៀបចំ។
៣ – ការឈប់សម្រាករបស់មន្ត្រីរាជការ និយោជិត កម្មករ ចំនួន ០៣ថ្ងៃ ក្នុងព្រះរាជពិធីនេះ នៅរក្សាដដែល។
៤ – គ្រប់ក្រសួងស្ថាប័នពាក់ព័ន្ធ រាជធានី និងខេត្ត ត្រូវបន្តយកចិត្តទុកដាក់ប្រុងប្រយ័ត្នខ្ពស់ ក្នុងការជួយដោះស្រាយបញ្ហាកង្វះខាតទឹក ដើម្បីចៀសវាងការខូចខាតដំណាំប្រជាកសិករ នៅតាមបណ្តាខេត្ត ជាពិសេសនៅរដូវប្រាំងនេះ ៕
ចែករំលែកព័តមាននេះ