ខេត្តព្រះសីហនុ ៖ ស្ថានភាពមិនខុសពីរឿងចាប់រថយន្តដឹកដីអត់ពន្ធត្រូវបានម្ចាស់រថយន្តឯទៀតលើកគ្នាតវ៉ាយករថយន្តមកចតបិទផ្លូវនោះទេ កាលពីប៉ុន្មានថ្ងៃមុននេះនៅខេត្តកណ្ដាល ហើយបាតុភាពថ្មីនេះក៏បានផ្ទុះឡើងនៅខេត្តព្រះសីហនុទៀត ដោយក្រុមអ្នកបើកបររថយន្តដឹកដីប្រមាណ៣០នាក់ នៅវេលាម៉ោងប្រមាណ៦ល្ងាចថ្ងៃទី២៩ តុលា បាននាំគ្នាយករថយន្តដឹកដីជាច្រើនគ្រឿងមកចតបិទផ្លូវនៅមុខប៉ុស្ដិ៍រដ្ឋបាលសង្កាត់លេខ៤ ក្នុងគោលបំណងធ្វើការតវ៉ាទាមទារឱ្យដោះលែងរថយន្តដឹកដីចំនួន៣គ្រឿងរបស់ពួកគេ ដែលមន្ត្រីជំនាញបរិស្ថាន និងប៉ូលិសប៉ុស្ដិ៍រដ្ឋបាលសង្កាត់លេខ៤ ចាប់ឃាត់ទុកផាកពិន័យ ។
តាមការទម្លាយឲ្យដឹង ការផាកពិន័យនោះក្នុងរថយន្ត១គ្រឿង១លានរៀល ក្រោមបទចោទប្រកាន់ធ្វើអាជីវកម្មគ្មានការទទួលខុសត្រូវ ដឹកដីមិនគ្របតង់ធ្វើឱ្យដីជ្រុះរាយប៉ាយតាមដងផ្លូវសាធារណៈជាហេតុបង្កផលប៉ះពាល់ដល់សុខភាពប្រជាពលរដ្ឋ និងបរិស្ថានអាប់អួ ។
ហេតុការណ៍នេះបានបង្កឱ្យមានការភ្ញាក់ផ្អើលស្ទើរទូទាំងក្រុង និងមានការកកស្ទះចរាចរណ៍មិនអាចធ្វើដំណើរឆ្លងកាត់បានជិត១ម៉ោង ។ បន្ទាប់មកសមត្ថកិច្ចចម្រុះមានកម្លាំងនគរបាល និងកងរាជអាវុធហត្ថត្រូវបានបញ្ជូនទៅកន្លែងកើតហេតុដើម្បីសម្រួលចរាចរណ៍ឡើងវិញ ។
ក្រុមអ្នកបើកបររថយន្តដឹកដីដែលនាំគ្នាមកតវ៉ាខាងលើ បាននិយាយប្រាប់អ្នកសារព័ត៌មានថា រថយន្តដឹកដីចំនួន៣គ្រឿងដែលមន្ត្រីបរិស្ថាន និងប៉ូលិសឃាត់ទុកផាកពិន័យនោះ តាំងពីម៉ោង១០ព្រឹកមកម្ល៉េះ និងបានយកមកទុកនៅប៉ុស្ដិ៍រដ្ឋបាលសង្កាត់លេខ៤នេះសមល្មមនឹងដោះលែងហើយ ដើម្បីឱ្យពួកគេយកទៅប្រកបរបរឡើងវិញ ។ ប៉ុន្តែសម្រាប់ការផាកពិន័យក្នុងរថយន្តមួយគ្រឿងចំនួន១លានរៀលដោយសារតែរឿងបន្តិចបន្តួច (ដឹកដីមិនគ្របតង់)នោះ ពួកគេគ្មានលុយបង់ទេ ដូច្នេះពួកគេត្រូវតែនាំគ្នាមកតវ៉ាឱ្យមានតម្លាភាព ។ ក្រុមម្ចាស់រថយន្តដឹកដីទាំងនោះ បានព្រមានថា បើធ្វើការតវ៉ាយប់នេះមិនបានសម្រេចពួកគេនឹងបន្តធ្វើនៅថ្ងៃស្អែកទៀត ។
លោក អីុ សុខឡេង អភិបាលក្រុងព្រះសីហនុ បានលើកឡើងថា រថយន្តដឹកដីទាំង៣ខាងលើនេះ លោកជាអ្នកបញ្ជាឱ្យចាប់ ពីព្រោះរថយន្តទាំងនោះដឹកដីជ្រុះលើដងផ្លូវរាយប៉ាយបង្កផលប៉ះពាល់ដល់ការធ្វើដំណើរបំផុត និងដឹកដីគ្មានច្បាប់អនុញ្ញាត ។ បញ្ហានេះលោកបានពិភាក្សា ជាមួយប្រធានមន្ទីរបរិស្ថានដាច់ខាតត្រូវអនុវត្តតាមច្បាប់បរិស្ថានឲ្យមានប្រសិទ្ធភាព ហើយថ្ងៃស្អែកនេះ លោកនឹងទាក់ទងទៅមន្ទីរសាធារណការឱ្យពិនិត្យលក្ខណបច្ចេកទេសនៃរថយន្តទាំងនេះបន្ថែមទៀត ។
ចំពោះករណីបិទផ្លូវសាធារណៈកាលពីល្ងាចមិញនោះ លោកអភិបាលក្រុង បានបញ្ជាក់យ៉ាងមឺុងម៉ាត់ថា អាជ្ញាធរអាចរៀបចំសំណុំរឿងបញ្ជូនទៅតុលាការចាត់ការតាមផ្លូវច្បាប់ ព្រមទាំងព្រមានត្រង់ៗថា ចាប់ពីថ្ងៃនេះតទៅ ត្រូវតែអនុវត្តច្បាប់ឱ្យបានជាដាច់ខាតមិនអាចឱ្យអ្នក ប្រព្រឹត្តល្មើសធ្វើព្យុះភ្លៀងតាមចិត្តបានទេ ។
លោកប្រធានមន្ទីរបរិស្ថានខេត្តព្រះសីហនុបានបញ្ជាក់ថា នេះមិនមែនជាលើកទី១ទេ ដែលក្រុមមន្ត្រីរបស់លោកចាប់រថយន្តដឹកដីខ្វះការទទួលខុសត្រូវយកមកផាកពិន័យ ។ ការផាកពិន័យធ្វើឡើងមានក្រដាសស្នាម វិក្កយបត្រត្រឹមត្រូវ ហើយប្រាក់ដែលបានមកពីការផាកពិន័យទាំងនោះគឺជាថវិកាបង់ចូលរដ្ឋ១០០ភាគរយ ។ ការផាកពិន័យធ្វើឡើងចាប់ពីកម្រិត១លានរៀលរហូតដល់ទៅ១០លានរៀលក្នុងរថយន្ត១គ្រឿង ។
លោកប្រធានមន្ទីរបរិស្ថាន បានបញ្ជាក់ថា ជុំវិញការផាកពិន័យមិនមែនមន្ត្រីបរិស្ថានចេះតែធ្វើតាមការនឹកឃើញនោះទេ តែនេះជាការអនុវត្តតាមផ្លូវច្បាប់ ហើយច្បាប់នេះមុននឹងដាក់ឱ្យអនុវត្ត គឺបានប្រកាសផ្សព្វផ្សាយយ៉ាងទូលំទូលាយផងដែរ ប៉ុន្តែរសម្រាប់ក្រុមរថយន្តដឹកដីចំនូន៣គ្រឿងខាងលើនោះដឹងហើយ ឮហើយតែពួកគេនៅផ្គើនមិនព្រមអនុវត្តតាម ទើបត្រូវសមត្ថកិច្ចចាប់យកមកដុះក្អែលម្តង។ ប៉ុន្តែគួរឱ្យសោកស្តាយម្ចាស់រថយន្តមិនព្រមចូលខ្លួនមកធ្វើការសម្របសម្រួលបង់ពិន័យទេ បែរជានាំគ្នាបើករថយន្តមកដាក់ពាំងផ្លូវសាធារណៈដើម្បីតវ៉ាបង្កភាពស្មុគស្មាញទៅវិញដូចបង្កើនស្ថានទម្ងន់កាន់តែវ័ណ្ឌកខ្លួនឯងទៅវិញទេ ៕
ចែករំលែកព័តមាននេះ