ខេត្តព្រះសីហនុ ៖ តាមសេចក្តីរាយការណ៍ទទួលបានឱ្យដឹងថា មានអ្នកទោសជាស្រីៗចំនួន១៤៦នាក់ត្រូវបានបញ្ជូនចេញពីពន្ធនាគារខេត្តព្រះសីហនុ ផ្ទេរទៅពន្ធនាគារខេត្តកំពត ជាបណ្តោះអាសន្ន ក្រោយពីរកឃើញមានករណីវិជ្ជមានកូវីដ-១៩ នៅក្នុងពន្ធនាគារ ។ យ៉ាងណាមិញ…
ខេត្តព្រះសីហនុ ៖ តាមសេចក្តីរាយការណ៍ទទួលបានឱ្យដឹងថា មានអ្នកទោសជាស្រីៗចំនួន១៤៦នាក់ត្រូវបានបញ្ជូនចេញពីពន្ធនាគារខេត្តព្រះសីហនុ ផ្ទេរទៅពន្ធនាគារខេត្តកំពត ជាបណ្តោះអាសន្ន ក្រោយពីរកឃើញមានករណីវិជ្ជមានកូវីដ-១៩ នៅក្នុងពន្ធនាគារ ។
យ៉ាងណាមិញ ស្ត្រីអ្នកជាប់ឃុំទាំង ១៤៦ នាក់នោះ ត្រូវបានផ្ទេរទៅពន្ធនាគារខេត្តកំពតជាបណ្តោះអាសន្ន ក្រោយលទ្ធផលតេស្ត គឺអវិជ្ជមានកូវីដ-១៩ ។
បើតាមការឱ្យដឹងពីលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានប្រាប់សារព័ត៌មានកោះសន្តិភាពឱ្យដឹងថា ពិតជាមានការជម្លៀសអ្នកទោសជានារីជិត ១៥០ ពីពន្ធនាគារខេត្តព្រះសីហនុ ទៅផ្ញើនៅពន្ធនាគារខេត្តកំពត ពិតមែន គឺតាំងពីថ្ងៃ១០ ខែឧសភា ឆ្នាំ២០២១ នៅវេលាម៉ោង១៣.៣០ ចេញពីខេត្តព្រះសីហនុ ទៅផ្ញើទុកនៅពន្ធនាគារខេត្តកំពត។
លោកឧត្តមសេនីយ៍ទោ ជួន ណារិន្ទ បន្តថា «បាទ មានស្រី ១៤៦ នាក់ យកទៅផ្ញើនៅកំពត ដើម្បីកុំឱ្យឆ្លងកូវីដ ដោយសារនៅពន្ធនាគារយើងនេះ វាមានអ្នកវិជ្ជមាននៅក្នុងហ្នឹង អ៊ីចឹងទេ ឯកឧត្តមអគ្គនាយកដ្ឋានពន្ធនាគារ បានផ្ទេរទៅផ្ញើនៅខេត្តកំពត មាន ១៤៦ នាក់សុទ្ធតែស្រីៗទេ ជាអ្នកអវិជ្ជមាន (កូវីដ)» ។
យ៉ាងណាមិញ ពាក់ព័ន្ធនឹងចំនួនអ្នកទោស ឬអ្នកធ្វើការនៅពន្ធនាគារខេត្តព្រះសីហនុប៉ុន្មាននាក់រកឃើញកើតកូវីដ-១៩ នៅមិទាន់អាចបញ្ជាក់នៅឡើយនោះទេ ។
សូមរម្លឹកថា រដ្ឋបាលខេត្តព្រះសីហនុ បានបង្ហាញលទ្ធផលនៃការវិភាគវត្ថុសំណាករកមេរោគកូវីដ១៩ នៅថ្ងៃទី៨ ខែឧសភា ឆ្នាំ២០២១ បានរកឃើញអ្នកជំងឺកូវីដ១៩ថ្មី ដែលជាករណីឆ្លងនៅក្នុងសហគមន៍ ចំនួន ១២៦នាក់។ អ្នកវិជ្ជមានជំងឺកូវីដ១៩ ទាំង ១២៦នាក់ គឺជាបុគ្គលិកកម្មកររោងចក្រ អាជីវករ និងក្រុមគ្រួសារ ព្រមទាំងបងប្អូនប្រជាពលរដ្ឋ និងជនជាប់ឃុំឃាំង នៅពន្ធនាគារខេត្ត។
ក្នុងបញ្ជីអត្តសញ្ញាណរបស់អ្នកឆ្លងកូវីដ១៩ ទាំង ១២៦នាក់ គឺមានអ្នកជាប់ឃុំឃាំង ៣៤នាក់ ហើយក្នុងនោះ ៤នាក់ ជាជនជាតិចិន៕
ចែករំលែកព័តមាននេះ