ខេត្តកោះកុង ៖ កាលពីវេលាម៉ោង០៩ និង៤០នាទីព្រឹកថ្ងៃទី៣០ តុលា ២០១៥ មានរថយន្តថៃដឹកជ្រូករស់ចូលតាមច្រកទ្វារអន្តរជាតិចាំយាមចំនួន២រថយន្ត ដែលរថយន្តនីមួយៗ មានដាក់ជ្រូកត្រួតលើគ្នាចំនួន៣ជាន់ ហើយបើតាមការអះអាងពីសមត្ថកិច្ចច្រកទ្វារព្រំដែនបញ្ជាក់ថា ជ្រូកសាច់ទាំងនេះ ត្រូវបានគេនាំចូលពីប្រទេសថៃ ឆ្ពោះទៅកាន់រាជធានីភ្នំពេញ ។
លោកជា នី ប្រធានស្នាក់ការកាំកុងត្រូលច្រកទ្វារអន្តរជាតិចាំយាមបានបញ្ជាក់ថា ក្រុមហ៊ុននាំជ្រូករស់ខាងលើនេះ ឈ្មោះលី គីមហ្គេច ខូអិលធីធឌី (Ly Kimguech Co.,Ltd) និងមានលិខិតអនុញ្ញាតពីក្រសួងកសិកម្មរុក្ខាប្រមាញ់ និងនេសាទ ចុះថ្ងៃទី០៨ តុលា ២០១៥ ចុះហត្ថលេខាដោយលោកអគ្គលេខាធិការ ឡោ រស្មី ក្រសួងពាណិជ្ជកម្ម លោកអ៊ុក ប្រជា រដ្ឋលេខាធិការ, គយ រដ្ឋាករដោយយអគ្គនាយករងបណ្ឌិត ប៉ែន សំអាត និងនាយកដ្ឋានផលិតកម្ម និងបសុព្យាបាល ដោយលោកតាន់ ផាន់ណារ៉ា ថ្ងៃទី២៧ តុលា ២០១៥ ។
ប្រភពដដែលបញ្ជាក់ទៀតថា ក្រុមហ៊ុនខាងលើ ត្រូវបានទទួលការអនុញ្ញាតឱ្យនាំចូលជ្រុករស់លើប្រទេសថៃ ទៅកាន់រាជធានីភ្នំពេញចំនួន២៥០ក្បាលក្នុងមួយថ្ងៃ ចាប់ពីថ្ងៃទី០៩ តុលា ដល់ថ្ងៃទី០៨ វិច្ឆិកា ២០១៥ ។ ជ្រូកទាំងនេះ ត្រូវបានដឹកចូលមណ្ឌលសត្វឃាដទីរួមខេត្តកោះកុង ទើបមានការផ្ទេរចេញពីរថយន្តថៃដាក់ចូលរថយន្តខ្មែរ ដឹកទៅកាន់រាជធានីភ្នំពេញតែម្តង ។
ទោះបីជាយ៉ាងណា ការនាំចូលជ្រូករស់ចូលពីប្រទេសថៃ តាមច្រកទ្វារចាំយាមពេលនេះ ធ្វើឱ្យមានការភ្ញាក់ផ្អើលជាទូទៅពីប្រជាពលរដ្ឋ ក៏ដូចជាមន្ត្រីរាជការ ។ ទោះបីជាមានច្បាប់អនុញ្ញាតក៏ដោយ ព្រោះមុខទំនិញមួយនេះកន្លងមក ប្រមុខរដ្ឋាភិបាលបានប្រកាសជាដាច់ខាតមិនអនុញ្ញាតឱ្យនាំចូលឡើយ ។
ចែករំលែកព័តមាននេះ