ខេត្តប៉ៃលិន ៖ រហូតមកដល់ពេលនេះ បន្ទាប់ពីអាជ្ញាធរក្រុងប៉ៃលិនទទួលបានកញ្ចប់ប្រាក់ចំនួន១៤៨លានរៀល ពីមន្ទីរបរិស្ថានខេត្ត ក៏បានដាក់ឱ្យក្រុមហ៊ុនអនាម័យខេត្តដេញថ្លៃយក ដោយជួលកម្មករជាច្រើននាក់ឱ្យដើររើសសម្រាម
ខេត្តប៉ៃលិន ៖ រហូតមកដល់ពេលនេះ បន្ទាប់ពីអាជ្ញាធរក្រុងប៉ៃលិនទទួលបានកញ្ចប់ប្រាក់ចំនួន១៤៨លានរៀល ពីមន្ទីរបរិស្ថានខេត្ត ក៏បានដាក់ឱ្យក្រុមហ៊ុនអនាម័យខេត្តដេញថ្លៃយក ដោយជួលកម្មករជាច្រើននាក់ឱ្យដើររើសសម្រាម និងជម្រះស្មៅសម្អាតតាមដងផ្លូវនានា នៅទូទាំងក្រុងប៉ៃលិន ឱ្យក្លាយទៅជាទីក្រុងស្អាត បរិស្ថានល្អ និងមានសោភ័ណភាពជាទីទាក់ទាញភ្ញៀវទេសចរជាតិ និងអន្តរជាតិគួរឱ្យចង់ទៅលេងកម្សាន្ត ។
ជាក់ស្តែង កាលពីវេលាម៉ោង៧និង៣០នាទីព្រឹក ថ្ងៃទី២៩ តុលា នៅភូមិប៉ាហ៊ីជើង ភូមិប៉ាហ៊ីត្បូង អូរតាពុកលើ និងភូមិផ្សេងៗទៀត ក្នុងសង្កាត់ប៉ៃលិន ក្រុងប៉ៃលិន ក្រុមកម្មករអនាម័យរើសសម្រាមជាច្រើននាក់ នាំគ្នាសម្អាតតាមដងផ្លូវនានា ដោយប្រមូលសម្រាមដាក់១កន្លែង ទុកឱ្យរថយន្តដឹកយកទៅចាក់ចោលនៅទីលានចាក់សំរាម ។
លោក សែប សារ៉ាន់ ហៅចិន អាយុ៥១ឆ្នាំ ជាមេការក្រុមហ៊ុនអនាម័យខេត្តប៉ៃលិនឈ្មោះ«វណ្ណៈភាព» ឱ្យដឹងថា ការធ្វើអនាម័យរើសសំរាមក្នុងក្រុងប៉ៃលិននេះ ក្រុមហ៊ុនដេញថ្លៃបានពីអាជ្ញាធរក្រុង រួចជួលប្រជាពលរដ្ឋចំនួន៣៦នាក់ ឱ្យដើររើសសំរាម និងជម្រះស្មៅលើចិញ្ចើមផ្លូវនានាតាមភូមិក្នុងក្រុងរហូតមកដល់ពេលនេះអស់រយៈពេលជិត១ខែហើយ ដោយម្នាក់ៗ ជួលក្នុង១ខែ៥០ម៉ឺនរៀល ។
ចំណែកកម្មករចំនួន១៨នាក់ទៀតជាអ្នកលើក និងដឹកសំរាមយកទៅចាក់ចោលនៅទីលានចាក់សំរាម ដោយជួលក្នុង១ខែ ៥៥ម៉ឺនរៀល ។ ការធ្វើអនាម័យដើររើសសំរាមនេះ ពួកគាត់ម្នាក់ៗ ត្រូវធ្វើការក្នុង១ថ្ងៃ ចម្ងាយ១គីឡូម៉ែត្រ ដោយបែងចែកនៅតាមគោលដៅ រៀងៗខ្លួន ។
ការរើសសំរាមចាប់ពីចំណុចស្តេចកន ក្នុងភូមិទួលស្រឡៅ សង្កាត់ទួលល្វា រហូតទៅទល់នឹងភូមិអូរតាវៅ សង្កាត់អូរតាវៅ ក្រុងប៉ៃលិន ។ នាពេលថ្មីៗកន្លងមក អាជ្ញាធរក្រុងបានទិញធុងដាក់សំរាមចំនួន៨០ធុង ដើម្បីប្រគល់ឱ្យក្រុមហ៊ុនរៀបចំយកទៅដាក់នៅតាមជ្រុងផ្លូវធំៗ និងផ្លូវកែងសាលាខេត្ត ។ ចំណែកឯធុងសម្រាមផលិតពីកង់រថយន្តចំនួន១០០ធុងទៀត ក្រុមហ៊ុននឹងយកទៅដាក់នៅក្បែរផ្លូវតូចៗក្នុងក្រុងដែរ ដើម្បីឱ្យប្រជាពលរដ្ឋយកសម្រាមទៅចាក់ក្នុងធុងនោះ ចៀសវាងបោះចូលពាសវាលពាសកាលនាំឱ្យបាត់បង់សណ្តាប់ធ្នាប់ សោភ័ណភាពក្រុង និងបង្កទៅជាមេរោគប៉ះពាល់ដល់សុខភាពខ្លួនឯង និងអ្នកដទៃ ។
លោក ឡូ លុយ អភិបាលរងក្រុងប៉ៃលិន បានឱ្យដឹងតាមទូរស័ព្ទថា អាជ្ញាធរក្រុងបានទទួលកញ្ចប់ថវិកាពីមន្ទីរបរិស្ថានខេត្ត រួចដាក់ឱ្យម្ចាស់ក្រុមហ៊ុនអនាម័យខេត្តប៉ៃលិនដេញថ្លៃយកទៅរៀបចំជួលកម្មករ និងទិញធុងសំរាម ព្រមទាំងដាក់បិទបដាប្រកាសសេចក្តីជូនប្រជាពលរដ្ឋឱ្យជ្រាបច្បាស់ ដោយនៅថ្ងៃខាងមុខមិនត្រូវបន្តបោះសំរាមចោលផ្តេសផ្តាសឡើយ ។
លោក ឡូ លុយ បានសំណូមពរឱ្យប្រជាពលរដ្ឋទាំងអស់ក្នុងខេត្តប៉ៃលិន យកចិត្តទុកដាក់ថែរក្សាអនាម័យក្រុងទាំងអស់គ្នា ដោយទីក្រុងអាចស្អាតទៅបានលុះត្រាតែចេះអនាម័យចាប់ពីខ្លួនយើង ម្នាក់ៗជាមុនសិន នោះអ្នកដទៃឃើញគេនឹងធ្វើតាមជាក់ជាមិនខានឡើយ ។
នេះជាលើកទី១ហើយ ដែលអាជ្ញាធរក្រុង ប៉ៃលិនរៀបចំអនាម័យដោយជួលកម្មករឲ្យរើសសំរាមក្នុងខេត្ត ៕
ចែករំលែកព័តមាននេះ