រាជធានីភ្នំពេញ ៖ គណៈកម្មការស្រាវជ្រាវ ស៊ើបអង្កេត ករណីបង្ករបួសស្នាមលើអ្នកតំណាងរាស្ត្រគណបក្សសង្គ្រោះជាតិ ដែលត្រូវបានបង្កើតឡើងដោយក្រសួងមហាផ្ទៃ កាលពីថ្ងៃទី២៩ ខែតុលា បានចេញសេចក្តីអំពាវនាវមួយ ក្នុងបំណងស្វែងរកយុត្តិធម៌ជូនជនរងគ្រោះ និងដើម្បីមានមូលដ្ឋានគ្រប់គ្រាន់ក្នុងការប្រមូលភស្តុតាងតាមនីតិវិធី និងកំណត់ឱ្យបានច្បាស់លាស់នូវអត្តសញ្ញាណក្រុមជនដៃដល់បង្ករបួសស្នាមដល់អ្នកតំណាងរាស្ត្រចំនួន២រូប ដែលបានប្រព្រឹត្តកាលពីថ្ងៃទី២៦ ខែតុលា ឆ្នាំ២០១៥ វេលាម៉ោង១២និង២០នាទីថ្ងៃត្រង់ នៅចំណុចខាងក្រៅច្រកចេញខាងត្បូងឆៀងខាងកើតរបងវិមានរដ្ឋសភា ។
គណៈកម្មការស្រាវជ្រាវ ស៊ើបអង្កេត បានប្រកាសដល់សាធារណជនគ្រប់មជ្ឈដ្ឋាន មេត្តាចូលរួមសហការក្នុងការផ្តល់ព័ត៌មាន រូបភាព ឬចង្អុលបង្ហាញជនដៃដល់និងគូកន ក៏ដូចជាវត្ថុតាងផ្សេងៗដែលអាចដាក់បន្ទុក ឈានដល់ការចាប់ខ្លួនក្រុមជនទាំងនោះយកមកផ្តន្ទាទោសតាមច្បាប់ ។
រាល់ព័ត៌មានទាំងអស់ អាចផ្តល់មកគណៈកម្មការស្រាវជ្រាវ ស៊ើបអង្កេត តាមរយៈលេខទូរស័ព្ទ ០១២ ៨៤ ២០ ២៧ និង ០១២ ២៨ ២០ ២០ ឬជូនដល់សមត្ថកិច្ចដែលនៅជិតបំផុត ។
គណៈកម្មការស្រាវជ្រាវ ស៊ើបអង្កេត ធានានិងរក្សាការពារការសម្ងាត់ដាច់ខាត សម្រាប់បុគ្គលគ្រប់រូប ដែលបានសហការផ្តល់ព័ត៌មានឬចង្អុលបង្ហាញជនដៃដល់ ក៏ដូចជាផ្តល់ភស្តុតាងផ្សេងៗដែលពាក់ព័ន្ធដល់អំពើល្មើស ជូនដល់អាជ្ញាធរមានសមត្ថកិច្ច ។
សេចក្តីថ្លែងការណ៍របស់ប្រមុខរាជរដ្ឋាភិបាលជុំវិញការវាយដំតំណាងរាស្ត្របក្សប្រឆាំងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសជាផ្លូវការសូមឱ្យសមត្ថកិច្ចតាមចាបខ្លួនជនដៃដល់ ដែលប្រព្រឹត្តអំពើហិង្សាលើអ្នកតំណាងរាស្ត្រទាំង២រូប ។ មិនអាចយោគយល់ និងអត់ឱនឱ្យចំពោះអ្នកប្រព្រឹត្ត បើទោះបីអ្នកនោះជាអ្នកណាក៏ដោយ ទាំងអ្នកគាំទ្រគណបក្សប្រជាជនកម្ពុជា គាំទ្ររាជរដ្ឋាភិបាល ឬគាំទ្របក្សប្រឆាំង ឬអ្នកណាក៏ដោយដែលប្រព្រឹត្តអំពើដ៏ថោកទាបនេះ គឺត្រូវតែចាប់យកមកផ្តន្ទាទោសឱ្យខាងតែបាន ។
សម្តេចអគ្គមហាសេនាបតីតេជោ ហ៊ុន សែន បានប្រកាសជាផ្លូវការ នាយប់ថ្ងៃទី២៨ តុលា តាមកញ្ចក់ទូរទស្សន៍ជាតិកម្ពុជា ទាក់ទិននឹងព្រឹត្តិការណ៍នយោបាយ ដែលមានបាតុកម្មថ្មីៗកន្លងទៅ នៅវិមានមុខរដ្ឋសភាជាតិ ។
សម្តេចតេជោនាយករដ្ឋមន្ត្រី បានចាត់ទុកថា ទោះបីរឿងអ្វីក៏ដោយ មិនត្រូវឱ្យមានអំពើហិង្សាកើតទ្បើងជាដាច់ខាត មិនត្រឹមតែប៉ះពាល់ទៅលើរូបរាងកាយនៃអ្នកតំណាងរាស្ត្រដែលមានអភ័យឯកសិទ្ធិទេ ។ បើទោះបីជាប្រជាពលរដ្ឋធម្មតា ក៏មិនត្រូវទទួលរងផលប៉ះពាល់ណាមួយដែលចេញមកពីអំពើងហិង្សានេះដែរ ។
ជាមួយគ្នានេះ សម្តេចពញាចក្រី ប្រធានរដ្ឋសភា បានផ្តល់ប្រាក់ដល់អ្នកតំណាងរ្រាស្តក្នុងម្នាក់១ម៉ឺនដុល្លារអាមេរិក សម្រាប់ការព្យាបាលតំណាងរាស្ត្រទាំង២រូប សរុប២ម៉ឺន
ដុល្លារអាមេរិក ។
សម្តេចតេជោ មានប្រសាសន៍ថា នៅតែបន្តការស្នើសុំចំពោះរដ្ឋសភាជាតិ សូមឱ្យមានការទទួលខុសត្រូវក្នុងការព្យាបាលតំណាងរាស្ត្រទាំង២រូបនេះ កុំថា១ម៉ឺនដុល្លារ ច្រើនជាងនេះក៏ត្រូវតែធ្វើការព្យាបាល ។ ការខូចខាតរថយន្ត ក៏ត្រូវតែសំណូមពរដល់រដ្ឋសភាផ្តល់ថវិកាសម្រាប់ការជួសជុល ដើម្បីឱ្យរថយន្តនេះប្រើប្រាស់បានទ្បើងវិញ ។
ប្រទេសកម្ពុជារបស់យើង ជាប្រទេសប្រជាធិបតេយ្យនិងនីតិរដ្ឋ។ សិទ្ធិធ្វើបាតុកម្ម គឺត្រូវមាន ក៏ប៉ុន្តែបាតុកម្មមិនត្រូវឱ្យមានអំពើហិង្សាណាមួយកើតទ្បើងទេ មិនថាចំពោះតែអ្នកតំណាងរាស្ត្រទេ សូម្បីតែប្រជាពលរដ្ឋក៏មិនត្រូវទទួលរងនូវអំពើហិង្សាបែបនេះដែរ ។
អ្វីដែលគួរឱ្យចម្លែកនៅត្រង់ថា នៅទីនោះបាតុករបានរំសាយមុនម៉ោង១១ព្រឹក ហើយ ឧប្បត្តិហេតុបានកើតក្រោយម៉ោង១២ និងពុំមានហ្វូងបាតុករទេ ។ តើមនុស្សនេះចេញមកពីណា ?
សម្តេចតេជោនាយករដ្ឋមន្ត្រី បានបញ្ជាដល់កងកម្លាំង ថ្ងៃនេះ បើទោះបីចេញពីណាក៏ដោយ ក៏ត្រូវតាមរកចាប់ខ្លួនអ្នកទាំងនោះឱ្យខាងតែបាន ដើម្បីផ្តន្ទាទោសទៅតាមច្បាប់ ។
ខ្ញុំសូមអំពាវនាវចំពោះអ្នកជាប់ពាក់ព័ន្ធទាំងអស់ សូមធ្វើកិច្ចសហការជាមួយនឹងអាជ្ញាធរមានសមត្ថកិច្ច ដើម្បីស្វែងរកចាប់ខ្លួនអ្នកទាំងនេះគឺជនដៃដល់ ។ ក្នុងនោះ មានទាំងអ្នកបើកបររថយន្ត សាមីខ្លួនអ្នកតំណាងរ្រាស្តផ្ទាល់ និងអ្នកថតវីដេអូ ថតរូបដែលបង្ហោះតាមហ្វេកប៊ុកទាំងទ្បាយ សូមមេត្តាផ្តល់រូបភាពទាំងនោះឱ្យមកសមត្ថកិច្ច ដើម្បីឱ្យសមត្ថកិច្ចអាចងាយរកឃើញនូវអត្តសញ្ញាណរបស់អ្នកប្រព្រឹត្តបទល្មើស។ កិច្ចសហការរបស់អ្នកជាប់ពាក់ព័ន្ធ បើគ្មានការសហការពីជនរងគ្រោះផ្តល់នូវព័ត៌មានហេតុការណ៍ដែលកើតទ្បើង អ្នកដែលចូលរួមនៅក្នុងព្រឹត្តិការណ៍នេះ វាពិតជាមានការលំបាកនៅក្នុងការស្វែងរក ។
ដូច្នេះខ្ញុំសង្ឃឹមថា អ្នកជាប់ពាក់ព័ន្ធទាំងអស់រាប់ទាំងអ្នកតំណាងរាស្ត្រទាំង២រូប នឹងផ្តល់នូវកិច្ចសហការពេញលេញជាមួយនឹងអាជ្ញាធរមានសមត្ថកិច្ច បងប្អូនជនរួមជាតិដែលថតរូបបាន គឺផ្តល់នូវរូបភាពទាំងនោះដើម្បីឱ្យយើងចាត់វិធានការតាមផ្លូវច្បាប់ ដោយគ្មានការលើកលែង និងគ្មានការរើសអើង ។ នៅកម្ពុជាមានស្តង់ដាតែមួយទេ អ្នកប្រព្រឹត្តកំហុស គឺត្រូវទទួលការផ្តន្ទាទោសតាមច្បាប់ ។
សង្ឃឹមថានឹងមានកិច្ចសហការដ៏ល្អ និងអំពាវនាវដល់ប្រជាពលរដ្ឋសូមស្ងប់ស្ងាត់ ការរកទទួលទាននៅតែបន្តធ្វើ ។ រឿងនេះបានកើតទ្បើងគួរឱ្យសោកស្តាយនៅទីនេះ ការប្រើប្រាស់សិទ្ធិបានប្រើប្រាស់រួចទៅហើយ ក៏ប៉ុន្តែរឿងរ៉ាវបានកើតក្រោយពេលការប្រើប្រាស់សិទ្ធិជារឿងដ៏ចម្លែក…។ ប៉ុន្តែទោះបីរឿងដ៏ចម្លែក ឬមិនចម្លែក បញ្ហាធំជាងគេគឺចាប់មនុស្សឱ្យបាន ហើយកាត់ទោសអ្នកទាំងនោះ ។
សម្តេចតេជោ បានអំពាវនាវដល់អ្នកដែលបានប្រព្រឹត្តអំពើទាំងនេះ បើសិនជាចេញសារភាពគឺជាការល្អបំផុត ដើម្បីទទួលខុសត្រូវចំពោះមុខច្បាប់។ ខ្ញុំសង្ឃឹមថា នឹងមានកិច្ចសហការល្អយ៉ាងពេញលេញ ហើយសង្ឃឹមទៅលើអាជ្ញាធរមានសមត្ថកិច្ច ពិសេសកម្លាំងប្រដាប់អាវុធ គឺនគរបាលក៏ដូចជាមន្ត្រីយុត្តិធម៌ទាំងទ្បាយធ្វើកិច្ចការដ៏ល្អ ។
សូមអំពាវនាវ អ្នកដែលដឹងរឿងរ៉ាវទាំងទ្បាយផ្តល់ព័ត៌មានឱ្យសមត្ថកិច្ច ដើម្បីចាប់ខ្លួនអ្នកប្រព្រឹត្តអំពើហិង្សាយកមកផ្តន្ទាទោសតាមផ្លូវច្បាប់ ៕
ចែករំលែកព័តមាននេះ