ខេត្តកំពង់ធំ ៖ នៅក្នុងសាលប្រជុំខេត្ត លោក អ៊ុត សំអន អភិបាលខេត្ត តំណាងឲ្យព្រះសង្ឃ មន្ត្រីរាជការ កងកម្លាំងប្រដាប់អាវុធទាំង៣ប្រភេទ និងប្រជាពលរដ្ឋទូទាំងខេត្ត កាលពីព្រឹកថ្ងៃទី២៩ តុលា ២០១៥ បានអញ្ជើញអានលិខិតថ្វាយព្រះពរនៃព្រះរាជពិធីបុណ្យខួបលើកទី១១ នៃការឡើងគ្រងរាជសម្បត្តិរបស់ព្រះករុណា ព្រះបាទ
សម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ។
ក្នុងនាមទូលព្រះបង្គំយើងខ្ញុំទាំងអស់គ្នា ជាកូនចៅរបស់ព្រះអង្គ សូមសម្តែងនូវមនោសញ្ចេតនាអបអរសាទរសប្បាយរីករាយ និងកតញ្ញុតាធម៌ចំពោះមហាករុណាទិគុណដ៏ធំធេងរបស់ព្រះករុណាជាអម្ចាស់ជីវិតតម្កល់លើត្បូង ព្រះរាជបេសកកម្មដ៏ឧត្តុង្គឧត្តម ជាព្រះមហាក្សត្រប្រកបដោយទសពិធរាជធម៌ ព្រះបញ្ញាញាណវាងវៃផ្តល់ការគាំទ្រដ៏ស្មោះចំពោះគោលនយោបាយយុទ្ធសាស្ត្រចតុកោណរបស់រាជរដ្ឋាភិបាលកម្ពុជា ដែលដឹកនាំដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការការពារបូរណភាពទឹកដី និងការអភិវឌ្ឍលើគ្រប់វិស័យជូនជាតិមាតុភូមិ ធ្វើឲ្យប្រជារាស្ត្ររស់នៅប្រកបដោយសេចក្តីសុខក្សេមក្សាន្ត និងសេចក្តីថ្លៃថ្នូរ ក្នុងទូទាំងប្រទេស ។ បន្ទាប់ពីព្រះអង្គបានយាងសួរសុខទុក្ខកូនចៅ និងចូលរួមជាព្រះរាជអធិបតីដ៏ខ្ពង់ខ្ពស់ កាលពីថ្ងៃទី៩ ខែកក្កដា ឆ្នាំ២០១៥ នៅក្នុងព្រះរាជពិធីបុណ្យរុក្ខទិវានៅស្រុកសន្ទុក កន្លងមក ។
នៅក្នុងទិវាដ៏មហាប្រសើរនេះដែរ ទូលព្រះបង្គំយើងខ្ញុំទាំងអស់គ្នា សូមថ្វាយព្រះពរសព្ទសាធុការ សូមទេវតាថែរក្សាព្រះមហាស្វេតច្ឆត្រ ព្រះបារមីព្រះវិញ្ញាណក្ខន្ធអតីតព្រះមហាក្សត្រ ព្រះមហាក្សត្រីយានី ព្រមទាំងវត្ថុស័ក្តិសិទ្ធក្នុងលោក តាមជួយបីបាច់ថែរក្សាព្រះអង្គទ្រង់មានព្រះរាជសុខភាពល្អបរិបូណ៏ ព្រះកាយពលមាំមួន ព្រះបញ្ញាញាណភ្លឺថ្លា និងសូមមានព្រះជន្មាយុយឺនយូរជាងរយព្រះវស្សា ដើម្បីគង់ប្រថាប់នៅជាម្លប់ដ៏ត្រជាក់ត្រជុំសម្រាប់ប្រជានុរាស្ត្រខ្មែរយូរអង្វែងតរៀងទៅ ៕
ចែករំលែកព័តមាននេះ