រាជធានីភ្នំពេញ ៖ លោកប៉ា សុជាតិវង្ស អភិបាលរាជធានីភ្នំពេញ បានបញ្ជាក់ជាថ្មីថា សាលារាជធានីភ្នំពេញពិតជាមានគម្រោងសាងសង់ផ្សារដើមគប្រាកដមែន ប៉ុន្តែគម្រោងនៃការសាងសង់នេះ បើមានបងប្អូនអាជីវករតែម្នាក់ជំទាស់មិនឱ្យសាងសង់នោះ គឺមិនមានការសាងសង់ថ្មីនោះទេ ។ ចំពោះពាក្យចចាមអារ៉ាមថា បងប្អូនអាជីវករទាំងអស់នៅផ្សារដើមគនឹងត្រូវអាជ្ញាធររាជធានីភ្នំពេញ បង្ខំឱ្យរើទីតាំងទៅលក់នៅព្រៃស ក្នុងសង្កាត់ព្រៃស ខណ្ឌដង្កោនោះ ជារឿងមិនពិត ដែលនេះជាការញុះញង់ឱ្យប្រជាពលរដ្ឋមានការយល់ច្រឡំប៉ុណ្ណោះ ។
នេះជាការលើកឡើងរបស់លោកអភិបាលរាជធានីភ្នំពេញ ប៉ា សុជាតិវង្ស បន្ទាប់ពីក្រុមអាជីវករផ្សារដើមគបានសួរនាំ នៅក្នុងវេទិកាសាធារណៈ កាលពីព្រឹកថ្ងៃទី២៨ តុលា២០១៥ នៅសាលមហាស្រពចេនឡា ស្ថិតក្នុងសង្កាត់ផ្សារដើមគ ខណ្ឌទួលគោក ។ ក្នុងវេទិកានេះ មានការចូលរួមពីលោក ឱម យ៉ិនទៀង ប្រធានក្រុមការងារចុះជួយមូលដ្ឋានខណ្ឌទួលគោក និងជាប្រធានអង្គភាពប្រឆាំងអំពើពុករលួយ លោក សួន រិនឌី តំណាងក្រុមប្រឹក្សារាជធានីភ្នំពេញ និងមានការចូលរួមពីប្រជាពលរដ្ឋក្នុងខណ្ឌទួលគោកយ៉ាងច្រើនកុះករ ។
លោកប៉ា សុជាតិវង្ស ថ្លែងទៀតថា គម្រោងសាងសង់ផ្សារដើមគថ្មីនេះ មិនមានការបង្ខំឱ្យអាជីវកររើទីតាំងចេញឆ្ងាយពីផ្សារដើមគទេ គឺអាចឲ្យប្រជាពលរដ្ឋលក់លើចិញ្ចើមផ្លូវដូចពេលសាងសង់ផ្សារធំថ្មីដែរ ។ ចំពោះអាជីវករដែលមានតូបនៅក្នុងផ្សារ ក្រោយការសាងសង់ផ្សាររួចនឹងបានតូបមួយនៅក្នុងផ្សារថ្មីនេះស្វ័យប្រវត្តិតែម្តង ដោយមិនតម្រូវឱ្យបង់លុយថ្លៃតូបឡើយ ។ ប៉ុន្តែបើប្រជាពលរដ្ឋជាអាជីវករមិនឱ្យសាលារាជធានីភ្នំពេញធ្វើការសាងសង់ នោះ សាលារាជធានីនឹងយកគម្រោងថវិកានៃការសាងសង់នេះទៅសាងសង់ផ្សាររដ្ឋថ្មីមួយទៀតក្នុងរាជធានីភ្នំពេញ ។
ក្នុងវេទិកានេះ ប្រជាពលរដ្ឋបានលើកឡើងជាសំណួរ និងសំណូមពរជាច្រើនចំណុចទៀតដូចជា ឱ្យមានការបំបាត់ហ្គេមបាញ់ត្រី ដែលកើតមាននៅក្នុងសង្កាត់ទឹកល្អក់ទី២ សុំឲ្យជួសជុលសួនច្បារចេនឡា ការជួសជុលលូ ផ្លូវ និងសុំឱ្យដោះស្រាយបញ្ហាសំរាមជាដើម ។
ចុងបញ្ចប់នៃវេទិកាសាធារណៈនេះ លោកអភិបាលរាជធានីភ្នំពេញបញ្ជាក់ថា រាល់សំណើនិងសំណូមពររបស់ប្រជាពលរដ្ឋទាំងអស់សាលារាជធានីភ្នំពេញនឹងប្រគល់ទៅឱ្យជំនាញនីមួយៗដើម្បីដោះស្រាយភ្លាមៗ ជូនប្រជាពលរដ្ឋហើយចំណុចដែលដោះស្រាយមិនបានភ្លាម យើងនឹងរួមគ្នាដោះស្រាយជាបន្តទៀតនៅថ្ងៃក្រោយ ៕
ចែករំលែកព័តមាននេះ