ខេត្តកណ្តាល ៖ ផ្លូវជាតិលេខ២១Bបានរងការខូចខាតយ៉ាងធ្ងន់ធ្ងរ ពិបាកធ្វើដំណើរឆ្លងកាត់ច្រើនខែមកហើយ មកដល់ពេលនេះគ្មានអាជ្ញាធរ ឬក្រសួងមន្ទីរជំនាញធ្វើការជួសជុលឡើយ បណ្តែតបណ្តោយទុកឱ្យផ្លូវជាតិ
ខេត្តកណ្តាល ៖ ផ្លូវជាតិលេខ២១Bបានរងការខូចខាតយ៉ាងធ្ងន់ធ្ងរ ពិបាកធ្វើដំណើរឆ្លងកាត់ច្រើនខែមកហើយ មកដល់ពេលនេះគ្មានអាជ្ញាធរ ឬក្រសួងមន្ទីរជំនាញធ្វើការជួសជុលឡើយ បណ្តែតបណ្តោយទុកឱ្យផ្លូវជាតិតាំងពីខូចតិចតួចរហូតដល់ជង្ហុកធំៗច្រើនកន្លែង ។
ប្រជាពលរដ្ឋធ្វើដំណើរតាមផ្លូវជាតិលេខ២១Bបានប្រាប់ឱ្យដឹងថា ពេលនេះផ្លូវជាតិលេខ២១B ពិសេសនៅក្នុងភូមិសាស្ត្រស្រុកស្អាង និងស្រុកកោះធំ បានរងការខូចខាតច្រើនកន្លែង មានកន្លែងខ្លះជង្ហុកជ្រៅធំៗជាប់គ្នារដឹករកកន្លែងបើកវាងមិនបាន ។ ផ្លូវនេះបានចាប់ផ្តើមខូចជាអន្លើៗតាំងពី៥ខែមុនមកម្ល៉េះ ដំបូងឡើយមានជង្ហុកតូចៗទេ ប៉ុន្តែគ្មានខាងអាជ្ញាធរ ឬក្រសួងមន្ទីរជំនាញទៅធ្វើការជួសជុលឡើយ ទុកបណ្តែតបណ្តោយឱ្យខូចខាតធ្ងន់ធ្ងរច្រើនកន្លែងក៏នៅតែគ្មានការជួសជុលទៀត ។ អ្នកធ្វើដំណើរតាមផ្លូវនេះបានរអ៊ូរទាំគ្រប់ៗគ្នាថា ពេលនេះធ្វើដំណើរតាមផ្លូវជាតិលេខ២១Bដូចធ្វើដំណើរទៅឋាននរកអ៊ីចឹង ។
អ្នកបើករថយន្តឈ្នួលតាមផ្លូវជាតិលេខ២១B ពីតាខ្មៅទៅស្រុកកោះធំ បានប្រាប់ថា ផ្លូវជាតិលេខ២១B មានជង្ហុកធំៗច្រើនកន្លែងជាប់ៗគ្នា ស្ទើរបើកទៅមុខមិនរួច សូម្បីតែអ្នកជិះក្នុងរថយន្តក៏រអ៊ូរទាំខ្លាំងណាស់ដែរថា រលាក់ដូចបើកកាត់ដីអាចម៍បំណាស់ខែប្រាំង ។ ពីមុន ផ្លូវជាតិនៅល្អបើករថយន្តពីតាខ្មៅទៅស្រុកកោះធំ រយៈពេលតែមួយម៉ោងប៉ុណ្ណោះ តែពេលនេះផ្លូវខូចខាតច្រើនកន្លែងប្រើរយៈពេលរហូតដល់ទៅជាង២ម៉ោងទើបទៅដល់ ។
ប្រជាពលរដ្ឋបានប្រាប់ឱ្យដឹងថា មួយរយៈកន្លងទៅនេះ នៅតាមផ្លូវជាតិលេខ២១B តែងតែបង្កឱ្យមានគ្រោះថ្នាក់ចរាចរណ៍ញឹកញាប់ បណ្តាលឱ្យស្លាប់មនុស្ស គឺដោយសារតែអ្នកបើកបរបើកចៀសជង្ហុកទៅបុកគ្នាស្លាប់ ។
មហាជនបានរិះគន់ត្រង់ៗទៅលើអាជ្ញាធរខេត្ត ពិសេសលោក ម៉ឹង យូឡេង ប្រធានមន្ទីរសាធារណការ និងដឹកជញ្ជូនខេត្តកណ្តាល មួយរយៈនេះមិនមានបានគិតគូរពីបញ្ហាផ្លូវថ្នល់ខូចខាតនោះឡើយ ដេកលក់ឈឹងតែម្តង តែបែរជានាំគ្នារៀបចំធ្វើកន្លែងថ្លឹងរថយន្តយកលុយទៅវិញ ។
កន្លងទៅនេះ លោក ម៉ឹង យូឡេង ប្រធានមន្ទីរសាធារណការ និងដឹកជញ្ជូនខេត្តកណ្តាល បានប្រាប់ឱ្យដឹងថា ផ្លូវជាតិលេខ២១Bនេះ ការជួសជុលជាភារកិច្ចរបស់ខាងក្រសួងសាធារណការ និងដឹកជញ្ជូន ខាងមន្ទីរចប់អាណត្តិថែរក្សាជួសជុលជាង១ឆ្នាំទៅហើយ ។
ផ្លូវជាតិលេខ២១B ចាប់ពីក្រុងតាខ្មៅទៅដល់ជ្រៃធំ ស្រុកកោះធំ មានចម្ងាយជាង៦០គីឡូម៉ែត្រ មានស្ពានច្រើនកន្លែង ផ្លូវមួយខ្សែនេះជាផ្លូវសេដ្ឋកិច្ចដ៏សំខាន់មួយសម្រាប់ដឹកជញ្ជូនទំនិញចេញចូលពីប្រទេសវៀតណាម និងដឹកជញ្ជូនកសិផលផ្សេងៗទៅកាន់ទីផ្សារនានា ។ មួយរយៈមកនេះ ដោយសារតែផ្លូវខូចខ្លាំង និងច្រើនកន្លែងពេក ការដឹកជញ្ជូនទំនិញឆ្លងកាត់មានការថយចុះច្រើន ប្រជាពលរដ្ឋបានសំណូមពរឱ្យមានការជួសជុលឡើងវិញជាបន្ទាន់ ដើម្បីប្រជាជនងាយស្រួលធ្វើដំណើរ និងដឹកជញ្ជូនទំនិញផ្សេងៗបានរហ័សទាន់ពេលវេលា ៕
ចែករំលែកព័តមាននេះ