ខេត្តកំពង់ឆ្នាំង ៖ លោក ឈួរ ច័ន្ទឌឿន អភិបាលខេត្តកំពង់ឆ្នាំង នៅព្រឹកថ្ងៃទី២៨ តុលា ២០១៥ នេះបានអញ្ជើញចូលរួមរំលែកទុក្ខ និងនាំយកអំណោយទៅផ្តល់ជូនគ្រួសារដែលកូនលង់ទឹកស្លាប់រួមគ្នាចំនួន៤នាក់នៅភូមិតាកុល ឃុំពានី ស្រុកកំពង់ត្រឡាច ។
ពិធីនោះមានការអញ្ជើញចូលរួមពីលោក អ៊ុន សំអុល ប្រធានគណៈកម្មាធិកាសាខាកាកបាទក្រហមកម្ពុជាខេត្តកំពង់ឆ្នាំង លោក ប្រាក់ សោភ័ណ្ឌ នាយសាខាកាកបាទក្រហមខេត្ត ព្រមទាំងអជ្ញាធរស្រុក ឃុំ និងមន្ត្រីរាជការជាច្រើនរូបទៀត។
មានប្រសាសន៍ ក្នុងការកាន់ទុក្ខ ដ៏ក្រៀមក្រំនោះ លោក ឈួរ ច័ន្ទឌឿន អភិបាលខេត្តបានបញ្ជាក់ថា លោកសូមចូលរួមសោកស្តាយនូវការបាត់បង់សមាជិកគ្រួសារដោយសារការលង់ទឹកស្លាប់ដល់ទៅ៤នាក់ កាលពីថ្ងៃម្សិលមិញនេះ។
ក្នុងនាមលោកជាអាជ្ញាធរខេត្ត និងដើម្បីចូលរួមរំលែកមរណៈទុក្ខដ៏ក្រៀមក្រំនេះលោកបាននាំអំណោយមកផ្តល់ជូនគ្រួសាររងគ្រោះខាងលើដែលបានមកពីសាខាកាកបាទក្រហមខេត្ត សប្បុរសជន និងរបស់រូបលោកផា្ទល់ ដោយក្នុងមួយគ្រួសារៗ ទទួលបានអង្ករ៥០គីឡូក្រាម និងថវិកា១.៥៧៥.០០០រៀល៕
ចែករំលែកព័តមាននេះ