ខេត្តកំពង់ឆ្នាំង៖ ខណៈពេលដែលមន្ទីរជំនាញ រកឃើញអ្នកឆ្លងកូវីដ១៩ថ្មី ចំនួន ៦នាក់បន្ថែមទៀត នៅខេត្តកំពង់ឆ្នាំង កាលពីថ្ងៃទី១០ឧសភា ក្រុមអាជីវករលក់ដូរ ក្នុងផ្សារសាលាលេខ៥ ស្ថិតនៅក្នុងស្រុកកំពង់ត្រឡាច…
ខេត្តកំពង់ឆ្នាំង៖ ខណៈពេលដែលមន្ទីរជំនាញ រកឃើញអ្នកឆ្លងកូវីដ១៩ថ្មី ចំនួន ៦នាក់បន្ថែមទៀត នៅខេត្តកំពង់ឆ្នាំង កាលពីថ្ងៃទី១០ឧសភា ក្រុមអាជីវករលក់ដូរ ក្នុងផ្សារសាលាលេខ៥ ស្ថិតនៅក្នុងស្រុកកំពង់ត្រឡាច នាព្រឹកថ្ងៃទី១១ ខែឧសភា បានរួសរាន់ទៅចូលលក់ដូរវិញហើយ។
សេចក្តីប្រកាសរបស់រដ្ឋបាលសាលាខេត្តកំពង់ឆ្នាំង បានសម្រេចអនុញ្ញាតឲ្យអាជីវករ ក្នុងផ្សារសាលាលេខ៥ បានលក់ដូរឡើងវិញ បន្ទាប់ពីផ្អាកដំណើរការលក់ដូរក្នុងផ្សារសាលាលេខ៥ ជាបណ្តោះអាសន្ន កាលពីថ្ងៃទី២៤ ខែមេសា ឆ្នាំ២០២១។
ក្នុងសេចក្តីប្រកាសរបស់រដ្ឋបាលសាលាខេត្តកំពង់ឆ្នាំង ក៏បានអំពាវនាវឲ្យបងប្អូនអាជីវករ បន្តអនុវត្តឱ្យបាន ៣កុំ ៣ការពារ ដើម្បីចូលរួមទប់ស្កាត់ការរីករាលដាលនៃជំងឺកូវីដ១៩។
គួររំលឹកថា ផ្សារសាលាលេខ៥ បានបិទចាប់ពីព្រឹកថ្ងៃទី២៤ ខែមេសា ឆ្នាំ២០២១ បន្ទាប់ពីរកឃើញ ស្ត្រីជាអាជីវករលក់មាស ចំនួន ៤នាក់ បានឆ្លងCovid 19។ ក្រោយការបិទផ្សារសាលាលេខ៥ អាជ្ញាធរស្រុកកំពង់ត្រឡាច បានប្រកាសឲ្យអ្នកពាក់ព័ន្ធ ពិសេសអាជីវករលក់ដូរ ក្នុងផ្សារសាលាលេខ៥ និងផ្សារកំពង់ត្រឡាច ស្ម័គ្រចិត្ត ទៅយកសំណាក ដើម្បីពិនិត្យរកមេរោគ Covid-19។ អាជីវករជាច្រើននាក់ បានស្ម័គ្រចិត្ត ទៅយកសំណាក។ ជាលទ្ធផល អ្នកពាក់ព័ន្ធក្នុងផ្សារសាលាលេខ៥ ត្រូវបានយកសំណាក ចំនួន ២លើក ពុំឃើញមានអ្នកឆ្លងកូវីដនោះទេ។
ទោះយ៉ាងណា នៅក្នុងសេចក្តីប្រកាសរដ្ឋបាលសាលាខេត្តកំពង់ឆ្នាំង មួយផ្សេងទៀត ដែលបានប្រកាស កាលពីថ្ងៃទី១០ ខែឧសភា បានរកឃើញអ្នកឆ្លងកូវីត ចំនួន ៦នាក់។ ក្នុងនោះ មាន៖ ១-ជនជាតិវៀតណាម ម្នាក់ នៅភូមិឆ្នុកទ្រូ ឃុំឆ្នុកទ្រូ ស្រុកបរិបូណ៌ ជាអ្នកមកពីរាជធានីភ្នំពេញ។ ២-នៅភូមិព្រៃគ្រីត្បូង ឃុំព្រៃគ្រី ស្រុកជលគិរី ជាកម្មករ នៅខណ្ឌមានជ័យ រាជធានីភ្នំពេញ និង៤នាក់ទៀត នៅភូមិកោះថ្កូវ ឃុំកោះថ្កូវ ស្រុកជលគីរី។ ៤នាក់នេះ ជាកម្មករធ្វើផ្លូវ នៅជ្រោយចង្វារ រាជធានីភ្នំពេញ៕ ពៅ សុខហ៊ាន
ចែករំលែកព័តមាននេះ