ខេត្តបាត់ដំបង៖ ក្រុមអ្នកលេងពូថៅហោះចំនួន០៣នាក់ត្រូវកម្លាំងការិយាល័យព្រហ្មទណ្ឌកំរិតស្រាល កសាងសំណុំរឿងបញ្ជូនទៅកាន់ សាលាដំបូងខេត្ត នៅរសៀលថ្ងៃទី១១ ឧសភា នេះ ក្រោយពីត្រូវឃាត់ខ្លួនក្នុងអំពើហឹង្សាដ៏ឃោរឃៅមួយ ទៅលើយុវជនម្នាក់បណ្ដាលឲ្យរងរបួសធ្ងន់ពេលកំពុងធ្វើដំណើរតាមដងផ្លូវ។ នេះបើតាមការឲ្យដឹងពីមន្ត្រីការិយាល័យជំនាញ។…
ខេត្តបាត់ដំបង៖ ក្រុមអ្នកលេងពូថៅហោះចំនួន០៣នាក់ត្រូវកម្លាំងការិយាល័យព្រហ្មទណ្ឌកំរិតស្រាល កសាងសំណុំរឿងបញ្ជូនទៅកាន់ សាលាដំបូងខេត្ត នៅរសៀលថ្ងៃទី១១ ឧសភា នេះ ក្រោយពីត្រូវឃាត់ខ្លួនក្នុងអំពើហឹង្សាដ៏ឃោរឃៅមួយ ទៅលើយុវជនម្នាក់បណ្ដាលឲ្យរងរបួសធ្ងន់ពេលកំពុងធ្វើដំណើរតាមដងផ្លូវ។ នេះបើតាមការឲ្យដឹងពីមន្ត្រីការិយាល័យជំនាញ។
ប្រធានការិយាល័យព្រហ្មទណ្ឌកំរិតស្រាល លោក ឈឿង គឹមសុង បានឲ្យដឹងថា ក្រុមជនដៃដល់ទាំង០៣នាក់នោះមាន ១-ឈ្មោះ ចាន់ ប៊ុនធឿន ហៅលីន អាយុ២២ឆ្នាំ (ទើបចេញពីគុកបានកន្លះឆ្នាំ ) រស់នៅភូមិសូភី១ សង្កាត់រតនៈ ក្រុងបាត់ដំបង ២ឈ្មោះ ឡេ ឡេង ហៅ ឡុង អាយុ១៨ឆ្នាំ នៅភូមិព្រែកនរិន្ទ ឃុំព្រែកនរិន្ទ ស្រុកសង្កែ និង ៣ឈ្មោះ ឈុំ សម្បត្តិ ហៅ បាត់ អាយុ១៩ឆ្នាំ នៅភូមិកំពង់ក្របី សង្កាត់ស្វាយប៉ោ ក្រុងបាត់់ដំបង។ រីឯជនរងគ្រោះ ឈ្មោះ សុខ សីហា អាយុ១៦ឆ្នាំ នៅភូមិឡឥដ្ឋ សង្កាត់ព្រែកព្រះស្ដេច ក្រុងបាត់ដំបង រងបួសត្រង់គល់កដោយសារក្រុមជនដៃដល់គប់នឹងពូថៅ។
លោក ឈឿង គឹមសុង បាននិយាយថា ក្រុមជនសង្ស័យ បានស្ទាក់ចាំកាប់ប្រហារទៅលើជនរងគ្រោះដែលមិនធ្លាប់ស្គាល់និងមានជម្លោះជាមួយគ្នាម្ដងសោះ កាលពីយប់ថ្ងៃទី០៧ ឧសភា ពេលជនរងគ្រោះកំពុងជិះម៉ូតូតាមផ្លូវ ត្រង់ចំណុចភូមិតាកុក ឃុំនរា ស្រុកសង្កែ។ ពេលនោះក្រុមជនដៃដល់បានប្រើដុំថ្ម និងពូថៅគប់សំដៅជនរងគ្រោះត្រូវចំគល់កបណ្ដាលឲ្យរយៈ រងរបួសយ៉ាងធ្ងន់ធ្ងរ ដោយគ្មានមូលហេតុ តែទំនងក្រុមជនដៃដល់គប់ច្រឡំមនុស្ស ដែលបក្សពួកខ្លួនផ្ដល់សញ្ញាមិនច្បាស់។
បើតាមរឿងដែលនាំឲ្យមានការពូនស្ទាក់ចាំកាប់ប្រហារនេះគួរសត្រូវនេះ ជនដៃដល់ដែលមានប្រវត្តិទើបចេញពីគុក ឈ្មោះ ចាន់ ប៊ុនធឿន ហៅ លីន បានសារភាពនៅចំពោះមុខសមត្ថកិច្ចថា ពួកខ្លួនពិតជាបានប្រើពូថៅគប់ទៅលើជនរងគ្រោះខាងលើនេះមែន។ ជននេះបាននិយាយថា មុនពេលកើតហេតុបន្តិចនាយប់នោះ មិត្តភក្ដិខ្លួនម្នាក់បានជិះម៉ូតូឌុបប្រពន្ធ ហើយពេលជិះដល់កើតហេតុ ស្រាប់តែមានជនមួយក្រុមបានប្រើដុំថ្មគប់ត្រូវប្រពន្ធ ហើយមិត្តភក្ដិបានរាយការណ៏ប្រាប់ខ្លួនឲ្យជួយតាមរកមើលជនដែលគប់ត្រូវប្រពន្ធ (ប្រពន្ធពួកម៉ាក) ។
ជននេះបានបន្ដថា ពេលឮពួកម៉ាកទូរស័ព្ទមកប្រាប់បែបនេះ ខ្លួនផ្ទុះកំហឹងឆាវ ហើយក៏ទូរស័ព្ទហៅពួកម៉ាកផ្សេងៗទៀត កែណ្ឌគ្នាទៅពូនស្ទាក់នៅទីនោះ ដើម្បីចាំកាប់ប្រហារសត្រូវ ដែលថ្លើមធំហ៊ានគប់ប្រពន្ធពួកម៉ាកខ្លួន។ ប៉ុន្តែជននេះបានបញ្ជាក់ថា ពេលនាំគ្នាទៅពូនស្ទាក់ ស្រាប់តែឃើញមនុស្សម្នាក់ជិះម៉ូតូឆ្លងកាត់តាមផ្លូវនោះ លុះជិះមកដល់ពួកខ្លួនគិតថា អ្នកជិះម៉ូតូម្នាក់នោះជាមុខសញ្ញាដែលគប់ប្រពន្ធពួកម៉ាកខ្លួន ទើបខ្លួនទាញពូថៅគប់តែម្ដង រីឯបក្សពួកខ្លួនប្រើដុំថ្មគប់ បណ្ដាឲ្យជនរងគ្រោះរងរបួស។ ប៉ុន្តែក្រោយមកទើបដឹងថា ជនរងគ្រោះដែលក្រុមខ្លួនគប់នោះ មិនមែនជាមុខសញ្ញាដែលស្ទាក់គប់ប្រពន្ធពួកម៉ាកខ្លួនទេ។
បើតាមប្រភពនានា ដែលធ្លាប់ស្គាល់ក្រុមអ្នកលេងពូថៅហោះនេះ បានឲ្យដឹងថា ក្រុមនេះមានបក្សពួកច្រើនណាស់ ដែលតែងដើរបង្កហឹង្សាទៅលើគួរសត្រូវរបស់ខ្លួនស្ទើរគ្រប់ទៅកន្លែង ជាពិសេសនៅតាមដងផ្លូវសាធារណៈ និង នៅតាមសួនច្បារនានា នៅក្នុងក្រុងបាត់ដំបង។ សាក្សីបាននិយាយថា ក្រុមនេះមានចរិកកាចសាហាវ ហើយតែប្រមូលផ្ដុំគ្នានៅតាមសួន និង នៅតាមដងផ្លូវ។ កន្លងទៅក្រុមនេះធ្លាប់ដេញវាយគូរសត្រូវរបស់ខ្លួនដណ្ដើមយកដាវ កាំបិត និង ទ្រព្យសម្បត្តិផ្សេងទៀតផង ហើយបក្សពួកក្រុមនេះមួយចំនួនក៏ធ្លាប់ត្រូវសមត្ថកិច្ចឃាត់ខ្លួនបញ្ជូនចូលគុកដែរ។
លោក ឈឿង គឹមសុង ប្រធានការិយាល័យព្រហ្មទណ្ឌកំរិតស្រាល បានបញ្ជាក់ថា ក្រុមនេះជាមុខសញ្ញាក្មេងទំនើង ដែលតែងបង្កគ្រោះថ្នាក់ដល់អ្នកដទៃនៅតាមសួនច្បារ ហើយមួយចំនួនក៏ជាមុខសញ្ញាប្រព្រឹត្តអំពើចោរកម្មទៀតផង។ ដោយឡែក ក្រុមអ្នកលេងពូថៅហោះចំនួន០៣នាក់ខាងលើនេះ ត្រូវកម្លាំងរបស់លោកតាមឃាត់ខ្លួនបានជាបន្តបន្ទាប់ កាលពីថ្ងៃទី១០ ឧសភាព ក្រោយបង្កហឹង្សារយៈពេល០៣ថ្ងៃ។ ប៉ុន្តែយ៉ាងណា ពេលនេះលោកស្នងការខេត្ត បានបញ្ជាកសាងសំណុំរឿងបញ្ជូនពួកគេទៅកាន់សាលាដំបូងខេត្ត នៅរសៀលថ្ងៃទី១១ ឧសភានេះហើយ៕ ដោយ៖ ឆោម ពិសម័យ
ចែករំលែកព័តមាននេះ