ខេត្តតាកែវ ៖ ករណីសាងសង់ឃ្លាំងដ៏ធំមួយកន្លែងស្ថិតនៅភូមិតាឌូ សង្កាត់រការក្រៅ ក្រុងដូនកែវ ដែលម្ចាស់សាងសង់ជិតរួចរាល់ទៅហើយ ទើបមន្ត្រីភូមិបាលចុះទៅហាមឃាត់ និងចោទថាអត់ច្បាប់នោះ ឥឡូវនេះប្រធានមន្ទីរសុរិយោដីខេត្តតាកែវ បញ្ជាក់ហើយថា…
ខេត្តតាកែវ ៖ ករណីសាងសង់ឃ្លាំងដ៏ធំមួយកន្លែងស្ថិតនៅភូមិតាឌូ សង្កាត់រការក្រៅ ក្រុងដូនកែវ ដែលម្ចាស់សាងសង់ជិតរួចរាល់ទៅហើយ ទើបមន្ត្រីភូមិបាលចុះទៅហាមឃាត់ និងចោទថាអត់ច្បាប់នោះ ឥឡូវនេះប្រធានមន្ទីរសុរិយោដីខេត្តតាកែវ បញ្ជាក់ហើយថា មន្ទីរធ្លាប់បានចេញលិខិតឲ្យផ្អាកតាំងតែពីខែកុម្ភៈមកម្ល៉េះតែម្ចាស់សំណង់មិនស្តាប់ គិតតែពីសង់ ដូចអត់ខ្លាចច្បាប់ឡើយ ។ ទំនងដឹងចិត្តថា គ្មានអ្វីធំជាងតាស្រមូ៉មបើកផ្លូវទេដឹង ?
លោក នួន សុធា ប្រធានមន្ទីរសុរិយោដី សំណង់ និងនគរូបនីយកម្មខេត្តតាកែវ បានមានប្រសាសន៍ថា ករណីសំណង់ឃ្លាំងដ៏ធំនេះ គឺពុំមានច្បាប់អនុញ្ញាតឲ្យធ្វើការសាងសង់ទេ ហើយកាលពីដើមខែកុម្ភៈ ខាងមន្ទីរក៏ដូចជាខាងភូមិបាលក្រុងដូនកែវបានចេញលិខិតឲ្យផ្អាកការសាងសង់នោះ ប៉ុន្តែម្ចាស់សំណង់នេះមិនបានស្តាប់តាមឡើយ ហើយនៅតែបន្តសាងសង់ទៀត ។យ៉ាងណាក៏ដោយ ករណីនេះលោកទុកឲ្យ អាជ្ញាធរជាអ្នកមានវិធានការព្រោះសំណង់នេះពុំមានច្បាប់សាងសង់ទេ ។
បើតាមការលើកឡើងរបស់លោក សាង មករា ដែលជាម្ចាស់ឃ្លាំងនោះថា ខ្លួនបោកបានពឹងឲ្យមន្ត្រីម្នាក់ជាអ្នករត់ច្បាប់សាងសង់ឃ្លាំងនោះ ដោយបានចំណាយលុយជាបន្តបន្ទាប់ ហើយមន្ត្រីជាអ្នកបោះមេនោះបានឲ្យខ្លួនលោកចេះតែសាងសង់សិនទៅ ។ លុះដល់ថ្ងៃទី២៣ ខែមេសា ឆ្នាំ២០២១ ក៏មានក្រុមមន្ត្រីការិយាល័យភូមិបាលក្រុងដូនកែវចុះមកឲ្យ លោកផ្អាកការសាងសង់ ។ ម្ចាស់សំណង់ឃ្លាំងយក្សនេះបាននិយាយប្រាប់កោះសន្តិភាពបន្តទៀតថា ក្រុមមន្ត្រីដែលចុះមកនោះបាននិយាយស្រួលទេ…ដោយប្រាប់ឲ្យលោកយកលុយប្រមាណ៦ពាន់ដុល្លារ ទៅរត់ច្បាប់បន្តទៀត ទើបអាចសាងសង់បន្តបាន ។
ឱ ! មេៗមន្ត្រីជំនាញខេត្តតាកែវអើយ…ធ្វើដូចត្រីងៀតឆ្លៀតពងមែន…សង្ស័យលុយធំ ទើបបើកក្លៀកឱ្យសង់បន្តទៀត…។ ចាំមើលទៀត តើឱ្យរុះចេញ ឬសង់បន្ត ?
ចែករំលែកព័តមាននេះ