ខេត្តបន្ទាយមានជ័យ ៖ នគរបាលការិយាល័យកណ្តាលព្រហ្មទណ្ឌបង្ហាញមុខក្រុមជនសង្ស័យចំនួន៣នាក់ និងបញ្ជូនខ្លួនទៅសាលាដំបូងខេត្តបន្ទាយមានជ័យ នៅថ្ងៃម្សិលមិញនេះ ពីបទជាប់ពាក់ព័ន្ធនឹងករណីកំហែងយកលុយពីកម្មករខ្មែរមកពីធ្វើការនៅប្រទេសថៃ កាលពីចុងសប្តាហ៍កន្លងទៅនេះ។
លោកវរសេនីយ៍ត្រីភឿង ម៉ាន់សឹង្ហ នាយការិយាល័យនគរបាលព្រហ្មទណ្ឌកំរិតធ្ងន់បានឲ្យដឹងថា ជនសង្ស័យទាំង៣នាក់ដែលត្រូវចាប់ឃាត់ខ្លួនពីបទកំហែងយកមាន១-ឈ្មោះលីវ តាំងហូរ ភេទប្រុស អាយុ២៦ឆ្នាំ នៅភូមិគោរដ្ឋាន ឃុំអូរអំបិល ក្រុងសិរីសោភ័ណ ២-ឈ្មោះពេជ្រ ចាន្ត្រា ភេទប្រុស អាយុ២៨ឆ្នាំ នៅភូមិ៣ សង្កាត់ព្រះពន្លា ក្រុងសិរីសោភ័ណ និង៣-ឈ្មោះ ផល សីហា ភេទប្រុស អាយុ២២៨ឆ្នាំ នៅភូមិព្រះពន្លា សង្កាត់ព្រះពន្លា ក្រុងសិរីសោភ័ណ ។
លោកវរសេនីយ៍ឯក សិទ្ធិ ឡោះ ស្នងការរងទទួលបន្ទុកការិយាល័យកណ្តាលនគរបាលព្រហ្មទណ្ឌ បានឲ្យដឹងផងដែរថា កាលពីវេលាម៉ោង២រសៀល ថ្ងៃទី២២ តុលា ២០១៥ មានករណីកំហែងយកមួយ ដែលផ្តើមចេញពីអ្នករត់តាក់ស៊ីចំនួន៣នាក់ បានជំរិតយកលុយពីអ្នកជិះរថយន្តតាក់ស៊ីរបស់គេដែលមានជនរងគ្រោះម្នាក់ឈ្មោះព្រំ ភក្រ័ ភេទប្រុស អាយុ៣៥ឆ្នាំ នៅភូមិស្វាយពក ឃុំដូង ស្រុករមាសហែក ខេត្តស្វាយរៀង មកពីធ្វើការនៅប្រទេសថៃ ដោយជិះរថយន្តតាក់ស៊ីដែលមានម្ចាស់រថយន្តចំនួន២ ម្នាក់ឈ្មោះ ផល សីហា ជាអ្នកបើកបរ និងម្នាក់ទៀតឈ្មោះលីវ តាំងហូរ ដែលត្រូវជាប្អូនថ្លៃនោះជាព្រូរថយន្ត ចំណែកឈ្មោះពេជ្រ ចាន្ត្រា ជាអ្នករួមគំនិត ។
ក្នុងរថយន្តនោះ គឺមានតែជនរងគ្រោះម្នាក់ឯងមកពីថៃដល់ប៉ោយប៉ែត ខ្លួនបានជិះរថយន្តតាក់ស៊ីនោះក្នុងតម្លៃ៨០០បាតទៅដល់ភ្នំពេញ ពេលមកដល់ចំណុចស្ពានតាផាន់ ក្នុងភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ អ្នករត់តាក់ស៊ី២នាក់បងថ្លៃប្អូនថ្លៃនេះ គឺបានគំរាមកំហែងយកប្រាក់ពីជនរងគ្រោះចំនួន១០.០០០បាត រួចគេចខ្លួន ។
បន្ទាប់មកជនរងគ្រោះបានមកប្តឹងនគរបាលឱ្យធ្វើការស្រាវជ្រាវ និងជាមុខសញ្ញាចាស់ដែលកម្លាំងនគរបាលកំពុងតែស្រាវជ្រាវផងនោះ ទើបយើងឈានដល់ការចាប់ឃាត់ខ្លួនទាំង២នាក់ ឈ្មោះលីវ តាំងហូរ និងឈ្មោះផល សីហា រួមទាំងដកហូតវត្ថុតាងរថយន្ត១គ្រឿង ម៉ាកកាមរី ពណ៌ស្ពៃជ្រក់ ។
តាមចម្លើយសារភាពរបស់ជនសង្ស័យទាំង២នាក់បងថ្លៃប្អូនថ្លៃ បាននិយាយថា ពួកខ្លួនពិតជាបានប្រព្រឹត្តដូចពាក្យចោទប្រកាន់របស់ជនរងគ្រោះឈ្មោះ ព្រំភក្ត្រ័នោះមែន ១០.០០០បាត លុយដែលបានមក ខ្លួនបានប្រគល់ខ្លះឲ្យប្រពន្ធ ចាក់ហ្គាសអស់១.០០០បាត ឲ្យប្អូនថ្លៃឈ្មោះតាំងហូរ៥០០បាត សល់ប៉ុន្មានខ្លួនបានទិញថ្នាំញៀនមកជក់ជាមួយប្អូនថ្លៃរបស់គេ៕
ចែករំលែកព័តមាននេះ