មណ្ឌលគិរី ៖ បន្ទាប់ពីមានការចេញផ្សាយនៅលើគេហទំព័រក្នុងស្រុកមួយក្រោមចំណងជើងថា«មន្ត្រីជំនាញ និងឈ្មួញឈើល្បីឈ្មោះក្នុងខេត្តមណ្ឌលគិរីកំពុងឃុបឃិតគ្នាបំផ្លាញព្រៃឈើ»កាលពីវេលាម៉ោង៨នឹង៣០នាទីព្រឹក ថ្ងៃទី២៦ តុលា ២០១៥ ដែលបាននិយាយរៀបរាប់និងចោទប្រកាន់ថា«ស្រី លីន ហៅខ្ទើយ ជាឈ្មួញឈើល្បីឈ្មោះដែលត្រូវបានគេដឹងថា ពូកែសូកប៉ាន់មន្ត្រីគ្រប់ជំនាញមិនអោយចាប់ឈើរបស់ខ្លួន កំពុងបំផ្លាញព្រៃឈើនៅមណ្ឌលគិរី ។ នៅលើគេហទំព័របានស្រង់ប្រភពពីប្រជាពលរដ្ឋបានឲ្យដឹងថា ក្នុងមួយថ្ងៃចែលីនដើរប្រមូលទិញឈើស្រុកអូររាំង ,ស្រុកកែវសីមាខេត្តមណ្ឌលគិរី រួចដឹកតាមរថយន្តកាមរីហើម ឡង់គ្រីស័រនិងTACOMAរបស់គេ ឆ្លងដែនយកទៅលក់នៅវៀតណាមតាមច្រករបៀងមួយចំនួននៅក្នុងស្រុកកែវសីមា ។
អ្នកស្រី ប៉ែន ស្រីលីន ដែលមានទីលំនៅក្នុងស្រុកកែវសីមាបានចេញមកបកស្រាយចំពោះការចោទប្រកាន់របស់គេហទំព័រក្នុងស្រុកមួយចំនួនថា« អ្នកស្រីពិតជាមិនអាចទទួលយកបានឡើយចំពោះការចេញផ្សាយរបស់គេហទំព័រមួយចំនួននាពេលថ្មីៗនេះ ត្បិតសព្វថ្ងៃអ្នកស្រី មិនបានជាប់ពាក់ព័ន្ឋជាមួយបទល្មើសព្រៃឈើអីនោះទេ ។គឺរយៈកាលកន្លងមកអ្នកស្រីពិតជាធ្លាប់បានរកស៊ីបន្តិចបន្តួចគ្រាន់យកមកប្រាក់មកចិញ្ចឹមគ្រួសារ មិនមែនដូចការចោទប្រកាន់ថា អ្នកស្រីជាឈ្មួញរកស៊ីធំ ឬជាថៅកែនៅស្រុកកែវសីមាឡើយ ។ ហេតុដូច្នេះហើយអ្នកស្រី ប៉ែន ស្រីលីន បានចេញសេចក្តីបំភ្លឺនេះ ទុកជាការជម្រាបជូនដល់អាជ្ញាធរនឹងសមត្ថកិច្ចដែលមានការពាក់ព័ន្ឋ កុំមានការយល់ច្រលំដូចការចុះផ្សាយរបស់គេហទំព័រក្នុងស្រុកមួយចំនួនណានោះ ដែលបានចោទប្រកាន់ដល់រូបអ្នកស្រីដោយគ្មានបានសួរអីមួយម៉ាត់ ។ ម៉្យាងវិញទៀតអ្នកស្រី ក៏បានបញ្ជាក់ថា សូមឲ្យគេហទំព័រក្នុងស្រុកដែលបានចុះផ្សាយអំពីព័ត៌មានប៉ះពាល់លើកិត្តិយសរបស់អ្នកស្រី ធ្វើយ៉ាងណាត្រូវចេញសេចក្តីបកស្រាយបំភ្លឺឲ្យបានសមរម្យឡើងវិញ ដើម្បីឲ្យសាធារណៈជនជ្រាបថា អ្នកស្រី ព្រមទាំងគ្រួសារ ពិតជាល្អស្អាតស្អំ ៕
ចែករំលែកព័តមាននេះ